Mga Hukom 14:1-20
14 Katapos, hi Samson linugsad ngadto ha Timnah, ngan ha Timnah nakakita hiya hin Filisteo nga babaye.*
2 Salit sinagka hiya ngan nagsiring ha iya tatay ngan nanay: “Ha Timnah may usa nga Filisteo nga babaye nga nakakuha han akon atensyon, ngan karuyag ko nga kuhaon niyo hiya para ha akon sugad nga asawa.”
3 Kondi an iya tatay ngan nanay nagsiring ha iya: “Waray ka ba mabilngan nga babaye ha imo mga paryente ngan ha ngatanan naton nga katawohan?+ Kinahanglan mo ba lumakat ngan magkuha hin asawa tikang ha diri turi nga mga Filisteo?” Kondi hi Samson nagsiring ha iya tatay: “Kuhaa hiya para ha akon, kay hiya an naangay ha akon.”*
4 Waray masantop han iya tatay ngan nanay nga tikang ito kan Jehova, kay namimiling Hiya hin higayon kontra ha mga Filisteo, kay an mga Filisteo an nagmamando ha Israel hito nga panahon.+
5 Salit hi Samson linugsad ngadto ha Timnah upod an iya tatay ngan nanay. Pag-abot niya ha mga urubasan han Timnah, kitaa! may leon nga inabot nga nauwang ha iya.
6 Katapos, an espiritu ni Jehova naghatag ha iya hin kusog,+ ngan iya gintunga an leon, sugad han pagtunga han usa ha nati nga kanding pinaagi han iya la mga kamot. Kondi waray niya isumat ha iya tatay o nanay an iya ginbuhat.
7 Katapos, linugsad hiya ngan nakiistorya ha babaye, ngan hiya pa gihapon an naangay ha pagkita ni Samson.+
8 Ha urhi han binalik hi Samson basi iupod na pag-uli an babaye,+ sinimang hiya basi kitaon an patay nga lawas han leon, ngan didto ha patay nga lawas han leon may panon han mga putyukan ngan may dugos.
9 Salit iya ginkaros an dugos ngadto ha iya mga kamot ngan ginkaon ito samtang nagbabaktas hiya. Han naabtan niya an iya tatay ngan nanay, gintagan niya hira hito basi kaunon. Kondi waray niya hira sumati nga iya ito ginkaros tikang ha patay nga lawas han usa nga leon.
10 An iya tatay linugsad ngadto ha babaye, ngan hi Samson nag-andam hin panagtawo didto, kay ito an kasagaran nga ginbubuhat han batan-on nga mga lalaki.
11 Han nakita nira hiya, nagdara hira hin 30 nga abay nga lalaki basi umupod ha iya.
12 Katapos, hi Samson nagsiring ha ira: “Alayon tuguti ako nga maghatag ha iyo hin patigo. Kon durante han pito ka adlaw han panagtawo matigo niyo ito ngan maisumat ha akon an baton, tatagan ko kamo hin 30 nga lino nga karsonsilyo ngan 30 nga bado.
13 Pero kon diri niyo maisumat ha akon an baton, kinahanglan tagan niyo ako hin 30 nga lino nga karsonsilyo ngan 30 nga bado.” Hira nagsiring: “Isumat ha amon an imo patigo; karuyag namon ito mabatian.”
14 Salit hiya nagsiring ha ira:
“Tikang ha parakaon may ginawas nga karaunon,Ngan tikang ha makusog may ginawas nga matam-is.”+
Ha sulod hin tulo ka adlaw, waray nira matigo an patigo.
15 Han ikaupat ka adlaw, nagsiring hira ha asawa ni Samson: “Limbungi an imo bana+ basi isumat niya ha amon an baton ha patigo. Kay kon diri, ikaw ngan an mga aada ha panimalay han imo tatay susunugon namon ha kalayo. Gin-imbitar ba niyo kami dinhi basi kuhaon an amon mga panag-iya?”
16 Salit an asawa ni Samson nagtangis ha iya ngan nagsiring: “Sigurado nga nangangalas ka ha akon; diri ka nahigugma ha akon.+ Naghatag ka hin patigo ha akon katawohan, pero waray mo isumat ha akon an baton.” Hi Samson nagsiring ha iya: “Aw, waray ko ngani ito isumat bisan ha akon kalugaringon nga tatay ngan nanay! Sadang ko ba ito isumat ha imo?”
17 Kondi nagtinangis hiya kan Samson ha nahibilin nga mga adlaw han pito ka adlaw nga panagtawo. Ha kataposan, han ikapito ka adlaw, ginsumatan hiya ni Samson kay ginpinirit niya hiya. Katapos, iya iginsumat ha iya katawohan an baton ha patigo.+
18 Salit han ikapito ka adlaw antes matunod an adlaw,* an kalalakin-an han syudad nagsiring ha iya:
“May-ada pa ba mas matam-is kay han dugos,Ngan may-ada pa ba mas makusog kay han leon?”+
Hiya binaton ha ira:
“Kon waray niyo gamita ha pag-arado an akon bata pa nga baka nga babayé,+Diri unta niyo matitigo an akon patigo.”
19 Katapos, an espiritu ni Jehova naghatag ha iya hin kusog,+ ngan linugsad hiya ngadto ha Askelon+ ngan ginpamatay an 30 han ira kalalakin-an ngan ginkuha an ira mga bado ngan ginpanhatag an liwanan nga mga bado ha mga nakabaton han patigo.+ Nasisina gud hiya samtang nasagka hiya tipabalik ha balay han iya tatay.
20 Katapos, an asawa ni Samson+ iginhatag ha usa han iya mga abay nga lalaki nga inupod ha iya.+
