Mga Hukom 10:1-18
10 Katapos ni Abimelec, hi Tola nga anak nga lalaki ni Pua, nga anak nga lalaki ni Dodo, usa nga lalaki han Isacar, binuhát basi talwason an Israel.+ Nag-ukoy hiya ha Samir ha kabukiran han Efraim.
2 Naghukom hiya ha Israel ha sulod hin 23 ka tuig. Katapos, namatay hiya ngan iginlubong ha Samir.
3 Katapos niya, hi Jair nga Gileadita binuhát ngan naghukom ha Israel ha sulod hin 22 ka tuig.
4 May-ada hiya 30 nga anak nga lalaki nga nasakay ha 30 nga asno, ngan may-ada hira 30 nga syudad, nga gintatawag nga Havot-jair+ tubtob hini nga adlaw; aada ito ha tuna han Gilead.
5 Katapos hito namatay hi Jair ngan iginlubong ha Kamon.
6 An mga Israelita nagbuhat na liwat hin maraot ha pagkita ni Jehova,+ ngan nagtikang hira pag-alagad ha mga Baal,+ ha mga imahen ni Astoret, ha mga dios han Aram,* ha mga dios han Sidon, ha mga dios han Moab,+ ha mga dios han mga Ammonita,+ ngan ha mga dios han mga Filisteo.+ Ira ginbayaan hi Jehova ngan waray mag-alagad ha iya.
7 Tungod hito naglarab an kasina ni Jehova ha Israel, ngan iya hira iginbaligya ha kamot han mga Filisteo ngan han mga Ammonita.+
8 Salit ira ginpakurian ngan duro nga gintalumpigos an mga Israelita hito nga tuig—18 ka tuig nga ira gintalumpigos an ngatanan nga Israelita ha bahin han Jordan nga tuna hadto han mga Amorita ha Gilead.
9 An mga Ammonita natabok liwat ha Jordan basi makiggirra ha Juda, ha Benjamin, ngan ha panimalay ni Efraim; ngan an Israel duro nga nag-antos.
10 Salit an mga Israelita nangaro hin bulig kan Jehova,+ nga nasiring: “Nakasala kami ha imo, kay ginbayaan ka namon, amon Dios, ngan nag-alagad kami ha mga Baal.”+
11 Kondi hi Jehova nagsiring ha mga Israelita: “Diri ba gintalwas ko kamo tikang ha Ehipto+ ngan tikang ha mga Amorita,+ ha mga Ammonita, ha mga Filisteo,+
12 ha mga taga-Sidon, ha Amalek, ngan ha Midian han ira kamo gintalumpigos? Han nangaraba kamo ha akon, gintalwas ko kamo tikang ha ira kamot.
13 Kondi iyo ako ginbayaan ngan nag-alagad kamo ha iba nga mga dios.+ Salit diri ko na kamo tatalwason utro.+
14 Pakadto kamo ha mga dios nga iyo ginpili ngan pangaro kamo hin bulig.+ Hira an patalwasa ha iyo ha panahon han iyo pag-antos.”+
15 Kondi an mga Israelita nagsiring kan Jehova: “Nakasala kami. Buhata ha amon anoman an maopay ha imo pagkita. Basta alayon talwasa la kami hini nga adlaw.”
16 Ngan ira ginpananggal tikang ha butnga nira an mga dios han iba nga mga nasud ngan nag-alagad kan Jehova,+ salit waray na niya mailob an* pag-antos han Israel.+
17 Inabot an panahon nga gintirok an mga Ammonita,+ ngan nagkampo hira ha Gilead. Salit an mga Israelita nagtirirok ngan nagkampo ha Mizpa.
18 An katawohan ngan an mga prinsipe han Gilead nagsiring ha usa kag usa: “Hin-o an mangunguna ha pakiggirra ha mga Ammonita?+ Hiya an magin lider ha ngatanan nga umurukoy han Gilead.”
