Efangele ya ga Luke 5:1-39

  • Ba tshwara ditlhapi ka kgakgamatso; barutwa ba ntlha (1-11)

  • Molepero o a fodisiwa (12-16)

  • Jesu o fodisa motho yo o sa kgoneng go tsamaya (17-26)

  • Jesu o bitsa Lefi (27-32)

  • Potso ka go itima dijo (33-39)

5  Nako nngwe fa batho ba bantsintsi ba ne ba mo pitlagantse e bile ba reeditse lefoko la Modimo, o ne a eme go bapa le letšha la Genesareta.*+  Mme o ne a bona mekoro e mebedi e eme fa thoko ga letšha, mme batshwaraditlhapi ba ne ba dule mo go yone ba tlhatswa matloa a bone.+  O ne a palama mokoro o mongwe, o e neng e le wa ga Simone, a bo a mo kopa gore a o sutise a tsenelele go se kae mo lewatleng. Mme o ne a nna fa fatshe a bo a simolola go ruta batho bao a le mo mokorong.  Fa a fetsa go bua le batho bao, o ne a raya Simone a re: “Suteletsa mokoro kwa go leng boteng gone, mme lo digele matloa a lona kwa tlase gore lo tshware ditlhapi.”  Mme Simone o ne a mo raya a re: “Morutisi, re dirile ka natla bosigo jotlhe mme ga re a tshwara sepe,+ le fa go ntse jalo, ke tla digela matloa kwa tlase jaaka o bua.”  E rile ba dira jalo, ba ne ba tshwara* ditlhapi di le dintsi thata. Tota e bile, matloa a bone a ne a simolola go gagoga.+  Ka jalo, ba ne ba bitsa batshwaraditlhapi ba bangwe ba ba kwa mokorong o mongwe gore ba tle go ba thusa, mme ba ne ba tla ba bo ba tlatsa mekoro eo ka bobedi, mo e neng ya simolola go nwela.  Fa Simone Petere a bona seno, o ne a khubama fa pele ga ga Jesu a bo a re: “Tloga fa go nna Morena, ka gonne ke monna yo o nang le boleo.”  O ne a bua jalo ka gonne ene le ba a neng a na le bone ba ne ba gakgamatse e bile ba tshogile thata ka gonne ba ne ba tshwere ditlhapi di le dintsi, 10  bomorwa Sebede e bong Jakobe le Johane,+ ba ba neng ba kopanetse kgwebo le Simone, le bone ba ne ba gakgametse e bile ba tshogile. Mme Jesu o ne a raya Simone a re: “Tlogela go tshoga. Go tloga jaanong go ya pele o tla bo o tshwara batho ba tshela.”+ 11  Ka jalo, ba ne ba busetsa mekoro kwa lotshitshing, mme ba tlogela sengwe le sengwe ba bo ba mo sala morago.+ 12  Mo lekgetlong le lengwe fa a ntse a le kwa motseng mongwe, go ne go na le monna mongwe yo o tletseng lepero! Fa monna yono a bona Jesu, o ne a wela fa fatshe ka sefatlhego a bo a mo kopa a re: “Morena, fa e le gore o a batla, o ka mphodisa.”*+ 13  Ka jalo, o ne a otlolola seatla sa gagwe, a mo tshwara a bo a re: “Ke a batla! Fola.” Ka yone nako eo, lepero le ne la nyelela mo go ene.+ 14  Go tswa foo, o ne a laela monna yoo gore a se ka a bolelela ope a bo a re: “Mme tsamaya o ye go itshupa kwa moperesiting o bo o isa setlhabelo sa gore o fodisitswe, jaaka Moshe a laetse,+ gore batho ba bone gore tota o fodisitswe.”+ 15  Mme dikgang ka ga gagwe di ne tsa tswelela di anama, mme batho ba bantsintsi ba ne ba phuthega gore ba tle go mo reetsa le gore a ba fodise.+ 16  Le fa go ntse jalo, gantsi o ne a ya kwa mafelong a a se nang batho gore a ye go rapela. 17  Letsatsi lengwe fa a ntse a ruta, Bafarasai le barutisi ba Molao ba ba neng ba tswa kwa metsaneng yotlhe ya Galalea le Judea le kwa Jerusalema ba ne ba ntse foo; mme o ne a na le maatla a ga Jehofa* a go fodisa batho.+ 18  Mme batho bangwe ba ne ba tlisa monna mongwe yo o sa kgoneng go tsamaya, a rapame mo bolaong, mme ba ne ba leka go mo tsenya mo ntlong gore ba mmeye fa pele ga ga Jesu.+ 19  E re ka ba ne ba sa kgone go mo tsenya mo teng ga ntlo ka gonne batho ba ne ba le bantsi thata, ba ne ba palamela kwa marulelong, mme ba ne ba bula phatlha ba mo folosetsa kwa tlase ka bolao fa gare ga batho ba ba neng ba le fa pele ga ga Jesu. 20  E rile a bona tumelo ya bone o ne a raya monna yoo a re: “O itshwaretswe maleo a gago.”+ 21  Foo bakwadi le Bafarasai ba ne ba simolola go buisana ba re: “Ke mang yono yo o tlhapatsang? Ke mang yo o ka itshwarelang batho maleo fa e se Modimo fela?”+ 22  E re ka Jesu a ne a lemoga gore ba akanya ka eng, o ne a ba raya a re: “Ke ka ntlha yang fa lo akanya ka tsela eno? 23  Ke eng se se motlhofo, a ke go raya motho yono o re, ‘O itshwaretswe maleo a gago,’ kgotsa go mo raya o re, ‘Ema mme o tsamaye’? 24  E le gore lo itse gore Morwa motho o na le taolo ya go itshwarela batho maleo mo lefatsheng . . .” O ne a raya monna yoo yo o sa kgoneng go tsamaya a re: “Ema, tsaya bolao jwa gago, mme o ye gae.”+ 25  Ka yone nako eo, o ne a ema fa pele ga bone, a tsaya bolao jo a neng a robetse mo go jone, mme a ya gae, a galaletsa Modimo. 26  Botlhe fela ba ne ba itumela thata, mme ba simolola go galaletsa Modimo, e bile ba ne ba gakgametse tota ba bo ba re: “Re bone dilo tse di gakgamatsang gompieno!” 27  Jaanong morago ga seo, o ne a tswa mme a bona monna mongwe wa mokgethisi yo o bidiwang Lefi a ntse fa ofising ya lekgetho, mme o ne a mo raya a re: “Nna molatedi wa me.”+ 28  O ne a tlogela sengwe le sengwe, a ema a bo a mo sala morago. 29  Go tswa foo, Lefi o ne a direla Jesu mokete o mogolo mo ntlong ya gagwe, mme go ne go na le bakgethisi ba le bantsi le batho ba bangwe ba ba neng ba ja* le bone.+ 30  Fa Bafarasai le bakwadi* ba bona seno, ba ne ba ngongorega mo barutweng ba gagwe, ba re: “Ke ka ntlha yang fa lo ja e bile lo nwa le bakgethisi le baleofi?”+ 31  Jesu o ne a ba raya a re: “Batho ba ba sa lwaleng ga ba tlhoke ngaka, mme ba ba lwalang ba a e tlhoka.+ 32  Ke tletse go bitsa baleofi gore ba ikwatlhaye, e seng batho ba ba siameng.”+ 33  Ba ne ba mo raya ba re: “Barutwa ba ga Johane ba itima dijo gangwe le gape e bile ba rapela ka tlhoafalo, mme barutwa ba Bafarasai le bone ba dira jalo, le fa go ntse jalo, ba gago bone ba a ja e bile ba a nwa.”+ 34  Jesu o ne a ba raya a re: “Ga lo ka ke lwa dira gore ditsala tsa monyadi di itime dijo fa monyadi a sa ntse a na le tsone, gakere? 35  Le fa go ntse jalo, eleruri nako e tla tla ya gore monyadi+ a tlosiwe mo go tsone, mme ke gone di tla itimang dijo ka nako eo.”+ 36  Gape o ne a ba bolelela setshwantsho seno: “Ga go na ope yo o segang letsela le lesha mo seaparong se sesha a bo a le rokelela mo seaparong se segologolo. Fa a ka dira jalo, letsela le lesha le tla gagoga e bile letsela leo la seaparo se sesha le ka se tshwane le seaparo se segologolo.+ 37  Gape, ga go na ope yo o tshelang beine e ntšha mo medutwaneng* ya beine e megologolo. Fa a ka dira jalo, beine e ntšha e tla phatlola medutwana eo e bo e tshologa. 38  Mme beine e ntšha e tshwanetse go tshelwa mo medutwaneng ya beine e mesha. 39  Ga go na ope yo e reng fa a sena go nwa beine ya bogologolo a bo a batla e ntšha, ka gonne a re, ‘Ya bogologolo e monate.’”

Dintlha Tse di Kwa Tlase

Go tewa Lewatle la Galalea.
Seger., “tswalela.”
Seger., “mphepafatsa.”
Kgotsa “ba ntse ka go sekama fa tafoleng.”
Seger., “bakwadi ba bone.”
Bona “Modutwana” mo Ditlhaloso Tsa Mafoko.