Efangele ya ga Luke 14:1-35
14 Nako nngwe o ne a ya go ja dijo kwa ntlong ya moeteledipele mongwe wa Mofarasai ka Sabata, mme ba ne ba mo lebile ka kelotlhoko.
2 Mme monna mongwe yo o neng a na le bolwetse jo bo dirang gore mmele wa gagwe o ruruge,* o ne a le fa pele ga gagwe.
3 Ka jalo, Jesu o ne a botsa batho ba ba itseng Molao wa ga Moshe thata le Bafarasai a re: “A go ka fa molaong go fodisa ka Sabata kgotsa nnyaa?”+
4 Mme ba ne ba didimala fela. Foo o ne a tshwara monna yoo, a mo fodisa a bo a mo letla gore a tsamaye.
5 Morago ga moo o ne a ba raya a re: “Ke mang mo go lona, yo e ka reng fa morwawe kgotsa poo ya gagwe e wela mo sedibeng,+ a ka se kang a mo ntsha ka yone nako eo ka letsatsi la Sabata?”+
6 Mme ga ba a ka ba kgona go mo araba.
7 E re ka a ne a bona gore banna ba ba laleditsweng ba itlhophela manno a a kgethegileng thata,+ o ne a ba bolelela setshwantsho seno. O ne a ba raya a re:
8 “Fa mongwe a go laleditse kwa moketeng wa lenyalo, o se ka wa nna mo mannong a a kgethegileng thata.+ Gongwe mongwe yo o tlotlegang go go feta, le ene a ka tswa a laleditswe.
9 Foo yo o lo laleditseng o tla tla a bo a go raya a re, ‘Sutela monna yono a nne fano.’ Ka nako eo o tla ema o tlhabilwe ke ditlhong o ya go nna kwa mannong a a kwa moragorago.
10 Mme fa o laleditswe, tsamaya o ye go nna mo mannong a a kwa moragorago, gore fa motho yo o go laleditseng a tla, a go reye a re, ‘Tsala, tla o nne mo mannong ano a a kgethegileng thata.’ Foo batho ba bangwe botlhe ba ba laleditsweng ba tla go tlotla.+
11 Gonne mongwe le mongwe yo o ikgodisang o tla kokobediwa, mme ope fela yo o ikokobetsang o tla godisiwa.”+
12 Morago ga moo, o ne a raya monna yo a neng a mo laleditse a re: “Fa o laletsa batho go tla dijong tsa motshegare kgotsa tsa maitseboa, o se ka wa bitsa ditsala tsa gago kgotsa bomorwarrago kgotsa ba losika lwa gago kgotsa baagelani ba gago ba ba humileng. Fa o dira jalo, gongwe le bone ba ka nna ba go laletsa, mme jaanong ba tla bo ba go duela.
13 Mme fa o dira moletlo, o laletse bahumanegi, batho ba ba golafetseng, ba ba tlhotsang le ba ba foufetseng;+
14 mme o tla itumela, ka gonne ga ba na sepe se ba ka go duelang ka sone. Gonne o tla duelwa fa basiami ba tsosiwa mo baswing.”+
15 Fa mongwe wa batho ba ba laleditsweng a utlwa dilo tseno, o ne a mo raya a re: “Go itumela motho yo o jang* mo Bogosing Jwa Modimo.”
16 Jesu o ne a mo raya a re: “Monna mongwe o ne a dira moletlo o mogolo wa dijo tsa maitseboa,+ mme o ne a laletsa batho ba le bantsi.
17 O ne a roma motlhanka wa gagwe ka nako ya dijo tsa maitseboa gore a ye go raya ba ba laleditsweng a re, ‘Tlang, ka gonne sengwe le sengwe se siame.’
18 Le fa go ntse jalo, botlhe ba ne ba simolola go dira diipato.+ Wa ntlha o ne a mo raya a re, ‘Ke rekile tshimo mme ke batla go ya go e bona; ke kopa gore o ntetle ke tsamaye.’
19 Mme yo mongwe o ne a re, ‘Ke rekile dikgomo di le lesome mme ke ya go di tlhatlhoba; ke kopa gore o ntetle ke tsamaye.’+
20 Yo mongwe gape o ne a re, ‘Ke sa tswa go nyala, ka jalo nka se kgone go tla.’
21 Mme motlhanka yoo o ne a tla a bo a bolelela mong wa gagwe dilo tseno. Foo mong wa ntlo o ne a galefa mme a raya motlhanka wa gagwe a re, ‘Itlhaganele mme o ye kwa ditseleng tse dikgolo le kwa mebileng ya motse, mme o tle le bahumanegi le batho ba ba golafetseng, ba ba tlhotsang le ba ba foufetseng.’
22 Moragonyana motlhanka yoo o ne a re, ‘Mong wa me, ke dirile jaaka o laetse, mme go sa ntse go na le manno a a se nang batho.’
23 Ka jalo, mong wa gagwe o ne a mo raya a re, ‘Ya kwa ditseleng tse dingwe tsa motse, mme o ba pateletse go tla, gore ntlo ya me e tle e tlale.+
24 Gonne ke a lo bolelela, ga go na ope wa banna bao ba ba neng ba laleditswe yo o tla jang dijo tsa me tsa maitseboa.’”+
25 Jaanong batho ba bantsintsi ba ne ba tsamaya le ene, mme o ne a retologa a bo a ba raya a re:
26 “Fa mongwe a batla go nna morutwa wa me o tshwanetse go nthata go feta* rraagwe, mmaagwe, mosadi wa gagwe, bana ba gagwe, bomogolowe le bomonnawe, tota le botshelo* jwa gagwe.+ Go seng jalo ga a ka ke a nna morutwa wa me.+
27 Ope fela yo o sa tseyeng kota ya gagwe ya tlhokofatso* a bo a ntshala morago, ga a ka ke a nna morutwa wa me.+
28 Ka sekai, ke mang mo go lona yo e ka reng fa a batla go aga tora a bo a sa nne fa fatshe pele a bala ditshenyegelo, gore a bone gore a o na le madi a a lekaneng go e wetsa?
29 Go seng jalo, a ka nna a thaya motheo wa yone mme a bo a sa kgone go e fetsa, mme botlhe ba ba mo lebileng ba tla mo sotla,
30 ba re: ‘Monna yono o ne a simolola go aga mme o ne a palelwa ke go fetsa.’
31 Kgotsa ke kgosi efe e e reng fa e ya go tlhabana le kgosi e nngwe e bo e sa nne fa fatshe pele e batla kgakololo ya gore a e tla kgona go fenya ntwa ka masole a le 10 000 mme e ya go tlhabana le kgosi e e tlang ka masole a le 20 000?
32 Tota e bile, fa e lemoga gore e ka se kgone go dira jalo, e tla re kgosi e nngwe e sa ntse e le kgakala thata, yone e tla roma setlhopha sa baemedi e ya go kopa gore ba agisane.
33 Ka tsela e e tshwanang, itseng gore ope wa lona yo o ka se kang a tlogela dilo tsa gagwe tsotlhe ga a ka ke a nna morutwa wa me.+
34 “Eleruri, letswai le molemo. Mme fa letswai le tswapoga, le tla lokiwa ka eng?+
35 Ga le a tshwanela go tsenngwa mo mmung kgotsa go tlhakanngwa le motshotelo. Batho ba a le latlha. A yo o nang le ditsebe a reetse.”+
Dintlha Tse di Kwa Tlase
^ Ka Seesemane bolwetse jono bo bidiwa dropsy kgotsa edema, bo dira gore mmele o tlale metsi.
^ Seger., “yo o jang senkgwe.”
^ Seger., “Fa mongwe a tla mo go nna o tshwanetse go tlhoa.”
^ Seger., “psy·kheʹ.” Bona Ditlhaloso Tsa Mafoko.
^ Bona Ditlhaloso Tsa Mafoko.
