Yobu 6:1-30
6 Tsô Yobu gema kaa ér:
2 “Bee er ma i kar myohom ma ishimavihin yam,+Ma i ver i sha iyôgh ki karen kwagh a ican yam imôngo yô!
3 Gadia i yuhwa je hemba waarawa u shin uzegembamngerev.
Ka nahan m gbe ôron kwagh sha ibume* tsô ye.+
4 Gadia avaan a Uhembanagee Cii la tumem,Jijingi wam ngu man megh ku a;+Akaa a cieryol a Aôndo tim nongo van sha a mo.
5 Jakitoho+ ia vaa ijen shighe u i lu a toho yôô?
Shin nombua una vaa ijen shighe u a lu a kwaghyana?
6 Mba ye kwaghyan u nyohon ga a bar shio kpa?
Shin ka a ma kwagh u a nyoho ken zwa ga kpa i emberee?
7 Uma wam venda u benden ambaakaa la ave.
Nga er akaa a hôngor kwaghyan wam nahan.
8 Ma i shi ongo ase msen wam,Aôndo ma a shi erem kwagh u a sarem la!
9 Aôndo ma a shi lumun u njighen mo,Ma a shi lumun u naregh uwegh nagh karen a mo kera!+
10 Nahan ma i pever mo iyol;Ma m tsue sha iember, sha ci u mnyoonom ma ma lu memen mo ga ne,Gadia m nyiman mkaanem ma Un u a lu Icighan la ga.+
11 M ngu a tahav mbu keghen heree?+
Ka mkur u nyi a lu keghen mo ve me za hemen u lun uma?
12 Agee am nga er ka avande nahanaa?
Shin inyam yam ka togula ase?
13 Er i kar a akaa a wasem mo la cii kera nahanGbenda ngu u shi me wase iyol yamaa?
14 Or u nan kera tese anngô u nan dooshima ga cii yô+
Nan de u cian Uhembanagee Cii la.+
15 Anmgbianev av er kwagh sha ayom+Er ka kungwa u inyom nahan,Er mngerem ma shin ukungwambamngerevMba ka ve uma inyom la nahan.
16 Mngerem ma gban akpo ka ma na ve ile dimii,Shi senou a sough a yer shin ve.
17 Kpa shighe ka una va kuman yô ve kera lu a mngerem ga, kwagh ve a kure;Ka ve uma kera hen shighe u iceenyolough.
18 Igbenda ve goom shi i hure;Ka ve kua ve nyôr ken desereti maa ve saa kera.
19 Mbakasuav mba ken Tema+ ker ve;Mbazendev mba ken Sheba*+ kegh ve.
20 Ve va ahenge, sha ci u ve lu henen ér vea va zua a kwagh her;Ve va her kpa saa ve dang.
21 Kape ne hingir her a mo je la;+Ne nenge mcieryol u kwaghtseren wam, nahan ne cia.+
22 M kaa a ven mer ‘Nam nen kwagh’ shinii?
Shin m kaa mer dugh nen kwagh ken inyaregh yenegh kira erem nen iyua a mini?
23 M kaa mer i va warem sha uwegh ku orhyomShin i warem* sha ikyev i mba kighir moo?
24 Wam nen kwagh tsô me huan ving;+Wasem nen m kav ape m tsum la.
25 Kwaghôron u mimi nyoon ga!+
Kpa ka iwasen i nyi a zua a mi ken mkôôm wene?+
26 Ne mba nôngon ne kôôm kwaghôron wam sha ayomo?
Mkaanem ma or u nan hingir kera ke kera,+ ma ahumbe a purugh a mi la.
27 Ne fatyô u eren ishor sha ancôghol je kpaa,+Shi ijende yen je kpaa ne tee nan!*+
28 Yô gema kenger nen mo,Sha ci u me fatyô u eren ne ie ga.
29 Nea lumun yô, hide hen nen sha kwagh ne—Kure nen kwagh wam sha mimi—
Een, hide hen nen sha kwagh ne,Gadia perapera wam ngu her dông.
30 Nombor wam ngu ôron kwagh u iferee?
Zwa wam kera fa er kwagh a ze iyol gaa?
