Yobu 36:1-33
36 Elihu shi kaa ér:
2 “Wa ishima a mo her kpuaa m pase u,Gadia m shi a kwaghôron her sha ci u Aôndo.
3 Me ôr kwagh u m fe la vindi vindi,Me pase perapera u un u a gbem la.+
4 Mimi je, mkaanem am ka ma aiegh ga;Un u A lu a mfe kpishi la+ ngu heen, sha ishigh you je.
5 Jighilii yô, Aôndo ka u ageegh,+ shi vende or môm ga;Tahav nav mbu fan kwagh* gba ikyôr.
6 Una kura uma u mbaaferev ga,+Kpa kuren ijir i mba i nzughul a ve la sha mimi.+
7 Tôôn ashe a na sha mbaperapera kera ga;+Ka a ver ve tor a ator imôngo,*+Ka i kende a ve sha gbem sha won.
8 Kpa ka a̱ kange ve sha mshirimShi a̱ hôn ve sha ikyor i ican a dugh yô,
9 A pase ve kwagh u ve er yô,Akaabo a ihyagh ve i ne ve er la.
10 Ka a bugh ve ato ér ve ungwa mkôômShi a kaa a ve ér ve de u eren kwaghbo.+
11 Aluer ve ungwa imo na shi ve civir un yô,A kpe ve iyol ken ayange a ve cii,Shi anyom a ve kpaa aa doo,+
12 Kpa aluer ve ungwa ga yô, vea tim sha sanker*+Vea kpe a mfe shio.
13 Mbavendan Aôndo vea nyoon ishima.
Ka una kange ve je kpaa ve vaa ve ker iwasen ga.
14 Ka ve kpe* iyev iyev,+Ken uma ve cii ka ve lu vea* nomso mba eren gbaga ken tempel.+
15 Kpa Aôndo ka a yima mba i lu eren ve ican la ken ican ve;Ka a bugh ve ato u ungwan un, zum u i lu kighir ve la.
16 Ka a urugh we zum u u lu nôngon u nyôron ken ican la+A va a we hen ijiir i gbanger i i hagher ga yô.+
A ver u kwaghyan u wan ahôm sha tebul kpishi, sha u surun we ishima.+
17 Nahan ijir i i ôr mbaaferev la ia lu sha ishima you,+Zum u i ôr i i kur vough yô.
18 Kpa wa ikyo sha er iyugh you la ia za a we ken ihyom i kôron* ga yô,+Inyaregh ki yamen ishô ki ngeen kpaa ki de tsumen a we ga.
19 Mliam ou ma vaan keren iwasen,Shin ma iniôngon you i kpoghuloo ia yange u u nyôron ken icana?+
20 De tômon wer tugh mbu ile,Shighe u ior ka ve sambe sha ajiir a ve kera la, ga.
21 Wa ikyo sha er u va yem eren kwaghbo,Nahan una hemba doon we a ican i yan ga yô.+
22 Nenge! Agee a Aôndo hemba cii,Ka hanma ortesen nan lu er un nahana?
23 Ka an nan tese un* gbenda na+Shin nan kaa a na ér, ‘Kwagh u u er ne ka u shami ga’?+
24 Umbur u kenden a tom na sha,+Tom na u ior ve we atsam ve teren la.+
25 Ior cii nenge a u,Kpa orumace ka nan nenge a u ken ica.
26 Nenge, mlu u Aôndo hemba mfe wase ica je;+Iyenge i anyom a na gande u tôvon fan.+
27 Ka a kohol aber a mnger a kôndo a mi;+A za gema a hingir ura man irkpii;
28 Maa abeen a hide a haa a shin inya;+A nôô ura sha uumace.
29 Ma or a fatyô u fan msamber u abeen,Kua idyuran i i dugh ken tenti* na la kpa?+
30 Nenge er ka a samber inyiar*+ na sha miShi ka a cir aiv a* zegemnger yô.
31 Ka sha akaa ne ka a koso ior ye;*Ka a na ve kwaghyan mgbeghaa.+
32 Ka a gema ave a na a cir inyiar,A goom a i i yem vegher ugen kposo.+
33 Idyuran na ka i pase kwagh na,Uzendenya je kpa ka ve fa or u nan* lu van yô.
Ngeren mba shin kpe
^ Zwa Heberu, “Ishima na.”
^ Shin a fatyô u kaan ér, “Ka a ver ator.”
^ Shin “ikyagh ki tswamegh.”
^ Shin “Uma ve ka a kpe.”
^ Shin a fatyô u kaan ér, “Uma ve ka a saa ishe hen atô u.”
^ Shin “ave a kuren a sha ihyom.”
^ Shin a fatyô u kaan ér, “nan puu; nan pine un kwagh sha kwagh u.”
^ Zwa Heberu, “ityumbe.”
^ Shin “iwanger.”
^ Shin “mze u.”
^ Shin a fatyô u kaan ér, “a kure ior ijir ye.”
^ Shin a fatyô u kaan ér, “kwagh u a.”
