Yobu 1:1-22
1 Ngise orgen lu ken tar u Ushi, i yilan un ér Yobu.*+ Lu or u perapera u eren kwagh sha mimi,*+ u cian Aôndo shi palegh kwaghbo yô.+
2 Yange mar ônov mba nomso utaankaruhar, mba kasev utar.
3 Uzendenya nav yô, lu iyôngo 7,000, urakumi 3,000, ibua 1,000,* ujaki* 500, shi lu a mbatomov kpishi, nahan a hemba ior mba sha ityoughkitaregh cii.
4 Ônov nav mba nomso mbara ve eren iniongo sha uya vev, hanmô sha iyange i nan. Shi ve lôhô anmgbianev vev mba kasev mba utar mbara kpaa ér ve va ya kwagh shi ve ma kwagh a ve imôngo.
5 Vea eren uiniongo mban a ningir a tseren yô, Yobu a tindi ér ve va sha er una wanger ve yô. Tsô a nder tugh tugh, hanmô ve yô a nande nagh+ sha ci u nan. Sha ci u Yobu a kaa ér: “Alaghga mbayev av er isholibo, ve tuhwa Aôndo ken asema a ve.” Lu kwagh u Yobu eren hanma shighe je ne.+
6 Tsô sha iyange igen la ônov mba Aôndo u mimi*+ nyôr va tile sha ishigh ki Yehova,+ maa Satan+ kpa nyôr a ve imôngo.+
7 Tsô Yehova pine Satan ér: “Ka han u dughu?” Satan gema kaa a Yehova ér: “Ka ken zende wam u ningir shin tar hurugh hurugh man u zenden shin u wue wue.”+
8 Yehova maa pine Satan ér: “U fa* kwagh u wanakiriki wam Yobu tsembelee kpa? Or môm shin tar kuma sha a na ga. Ka or u perapera u a eren kwagh sha mimi,*+ a cian Aôndo shi a palegh kwaghbo yô.”
9 Tsô Satan gema kaa a Yehova ér: “Ka gbilin Yobu a cie Aôndo yee?+
10 U wa igyar i kuran un u kase un+ a ya na kua hanma kwagh u a lu a mi cii gaa? U ver tom u ave a na doo doo,+ shi ilev nav kpa mbi samber sha tar cii.
11 Kpa naregh ase uwegh ough vihi akaa a a lu a mi la cii, tsô u nenge er una tuhwa u sha ishigh you je yô.”
12 Yehova maa kaa a Satan ér: “Nenge! Hanma kwagh u a lu a mi cii ngu sha ikyev you. Kpa or la iyol na yô, de benden un ave ga!” Satan maa kar sha ishigh ki Yehova kera.+
13 Tsô sha iyange igen la, er ônov mba Yobu mba nomso man mba kasev lu yan kwagh shi man wain hen ya u anmgbian ve u vesen la yô,+
14 ortom ugen va kaa a Yobu ér: “Ashen ibua you i lu kahan kwagh, ujaki kpaa lu yan kwagh ikyua a i,
15 maa Mbasabia va ta num sha mi kôr yem a mi, shi wua mbatomov sha sanker. Ka mo tseegh m war m va ôron we ye.”
16 Er lu lamen la je, ugen shi va gba va kaan ér: “Usu due hen Aôndo sha* sen va hia iyôngo kua mbatomov cica cii! Ka mo tseegh m war m va ôron we ye.”
17 Er lu lamen la je ugen shi za va gba va kaan ér: “Mbakaldi+ za va ikwe itiar va ta num sha urakumi kôr yem a mi, shi ve wua mbatomov sha sanker. Ka mo tseegh m war m va ôron we ye.”
18 Er lu lamen la je ugen shi za va gba va kaan ér: “Mbayev ou mba nomso man mba kasev ve lu yan kwagh shi man wain hen ya u anmgbian ve u vesen la.
19 Ica i gbe ga yô, ijeverahumbe mough ken taaikyôngo va ta sha azongo a iyoughough a anyiin la, i yôhôr i kighir agumaior la a kpe. Ka mo tseegh m war m va ôron we ye.”
20 Tsô Yobu mough sha ande akondo a na shi a hondo ityough; a gure a sua ityough inya
21 maa a kaa ér:
“Lu idyelegh m due ken iyav mbu ngôm ye,Shi ka idyelegh me hide me yem ye.+
Ka Yehova a ne ye,+ shi ka Yehova a ngohol ye.
I wuese iti i Yehova her.”
22 Ken akaa ne cii Yobu er isholibo shin kaa ér Aôndo er ma kwaghbo ga.*
Ngeren mba shin kpe
^ A fatyô u lun “U I Kôr Un Ihyom Yô.”
^ Shin “u lu a ibo ga, shi eren kwagh u vough.”
^ Zwa Heberu, “ibua ihiar ihiar kwa 500.”
^ Zwa Heberu, “ungômbajaki.”
^ Ka gbenda u i yilan mbatyomov mba Aôndo sha injakwagh ken zwa Heberu yô.
^ Zwa Heberu, “U ver ishima you sha.”
^ Shin “u a lu a ibo ga shi a eren kwagh u vough.”
^ Shin a fatyô u kaan ér, “Inyiar.”
^ Shin “na Aôndo ibo sha ma kwagh ga.”
