Yobu 5:1-27
5 “Yila ase yôô! Or ngu u vengese we kpa?
Man ken uicighanmbaiorov yô, ka an u gema hen nanaa?
2 Gadia iyugh ia wua ibumeor,Iyuhwe kpaa ia za a orlanenkwagh ken ku.
3 M nenge ibumeor ngu wan amise,Kpa ica gba ga je i wa ijiir na i teman ifyan.
4 Ônov nav mba ica a mkor,Shi i njighe ve hen hundagar,+ a or u yiman ve shio.
5 Or u lun ijen ka nan ya kwagh u nan sunda yô,Ka a lu ken usaa kpa nan za tôô,Akaa a ve lu a mi la kpaa ka i hôn a.
6 Gadia aferakaa nga dugh ka shin vuulevu ga,Zayol kpaa ka shin inya a menden ga.
7 I mar or ér nana ya ican,Vough er amerama a usu ka aa baver ve a kôndo sha nahan.
8 Kpa a lu mo we yô ma m ze a ikyaa yam hen Aôndo,Ma m yer ijir yam hen Aôndo,
9 Hen un u a eren akaa a vesen man a a gande u timen sha mi,A a kpiligh iyol shi a gande u ôron iyenge la.
10 Ka a nôô ura sha tarA tindi mngerem ma kua hen inya.
11 Ka a kende a icanor sha,Shi or u i tume nan iyol la kpaa a mough a nan sha, a war nan.
12 Ka a bunde mbaawashima mba mbaayomov,Sha er tom u ave ve ua saa ishe yô.
13 Ka a kôr mbafankwagh sha ayom a ve la,+Nahan mbaawashima mba mba bughun ashe ve bunde.
14 Ka ve tagher ishigh a ime atetan,Shi ka a lu iyange sha tembe kpaa ve peven a pev er ka tugh yô.
15 Ka a yima sha ikyev i sanker u ken zwa ve la kera,A yima mbaatsanev sha ikyev i mbaageev,
16 Nahan mbagbanjime ve lu a ishimaverenkeghen,Kpa zwa u eren afer yô i cir u.
17 Nenge! Saan or u Aôndo a kôôm nan la iyol;Nahan de vende tsaha u Uhembanagee Cii la ga!
18 Gadia ka a na mnyoon, kpa a hide a kange avav;Ka a vihi, kpa a hide a sôr sha ave a na je.
19 Una yima u sha ikyev i akaabo ataratar,U sha utaankaruhar la je kpa una bula u ga.
20 Una paa u sha ikyev i kuugh kera sha shighe u ijen,Kua sha ikyev i tahav mbu sanker kpaa sha shighe u utya.
21 A kura u sha ikyev i nombor u ôron akaa a nyoon,+Shi u cia mtim zum u una va la ga.
22 U se mtim man ijen,Shi u cia inyamkyume i shin tar kpaa ga.
23 Gadia awen a ken toho aa bula u ga,*Shi inyamkyume i ken toho kpaa ia lu ken bem a we.
24 U fa je wer kwagh za tenti wou iyol ga,*Shighe u u za u za nengen sule wou kpaa,U nenge kwagh môm una saa ga.
25 U mar mbayev kpishi,Ônov ou vea ngee er ka imendenev mbi sha tar nahan.
26 U taver iyol her zan zan u kar senen shin uwar je kpaa,Er aile a samuyia a i sondo a sha shighe u a nahan.
27 Nenge! Se tôv sha kwagh ne, man kape i lu je la.
Ungwa shi lumun a mi kpaa.”
