Yobu 19:1-29
19 Tsô Yobu kaa ér:
2 “Ka hanma shighe je ne de u vihin mo ishima ker,+Ôron akaa a sôôn mo ken vangeree?+
3 Ka kwa pue je ne lu puun mo ne;Ne er a mo dang kpa kunya kôr ne a iyol yen ga.+
4 Aluer m er kwagh u shami ga je kpa,Ka mo kwagh a tserem ye.
5 Aluer ne mba nengen ner ne hembam,Kaan ér ka inja yam i ze a mo yô,
6 Fa nen ner ka Aôndo a tsume a mo,A kôrom ken kper na ye.
7 Nenge, m zer yilan kaan mer ‘Ipila!’ kpa or ungwam her ga;+M zer vaan mer i wasem, kpa ijirôron i sha mimi ngi ga.+
8 A maa kpekpe u awen a yisa gbenda wam, me fatyô u karen ga;A cir igbenda yam sha ime.+
9 A ngohol icivir yamShi a bughum idyer i icivirigh* sha ityo kera.
10 A sombom hanma vegher cii, zan zan m kar timin;A wuhe ishimaverenkeghen yam er ka kon nahan.
11 Ishima vihi un a mo kpishi,A tôô ér mo m ngu orhyom na.+
12 Mbautyaav nav kohol va kasem,Ve kase tenti wam ve yisa.
13 A zenda anngôôv av ve gba ica a mo,Shi mba ve fem kpa ve gema ijime a mo.+
14 Ahuraior a am* yem kwagh ve,Shi mba m fe ve tsembelee la kpa hungur a mo.+
15 Mbavannya mba hen ya wam+ man ikpan yam i ukase cii,M hingir ve er ka or u van a va nahan;M hingir ortyôtyev hen ishigh vev.
16 M yila ortom wam kpa a bughum zwa ga;M bugh zwa wam m zamber un mer a zungwem mhôônom.
17 Iôôn yam ndôhôr kwase wam ishima,+Anmgbianev av* kpaa m hingir ve ihyuma i vihin tsung.
18 Mbayev mba cuku je kpa mba kera nem icivir ga;Zum u ka mea mough sha yô, ve lamen sha a mo ve seen.
19 Azende a am a kôôsôô cii, m ndôhôr a ishima,+Mba ve doom ishima la kpaa, ve mough num a mo.+
20 Akuhe a am var sha kwavyolough wam man inyam yam,+M war sha ikyughur.*
21 Shi zungwem nen mhôônom, ne akar a am, zungwem nen mhôônom,Gadia uwegh ku Aôndo iyol na bende a mo.+
22 Er nan ne zer tôvon mo a ican er ka Aôndo nahan,+Ne zer tan num sha a mo a uwer gban shio?*+
23 Bee er ma i nger mkaanem am inya,Ma i nger ma ken takeda yô!
24 Ma i gber ma sha vande igbekekeA kwagh u ngeren kwagh a mi u iyôôgh man u sha inyelegh!
25 Gadia m fa dedoo mer oryiman wam*+ ngu uma;Ngu van, una va mough una tile sha vuulevu.
26 Kwavyolough wam ua va saan ishe nahan yô,Me nenge a Aôndo er m lu a iyol yam her ne je,
27 Un shon u me nenge a na iyol yam,Ashe am aa nenge a na, a lu a orgen ga la.+
Kpa ken atô u ishima yam yô, kundam iyol!*
28 Sha ci u ka ne pine ner, ‘Ka sha nyi gbenda se tev u a icana?’+
Gadia ka mo iyol yam m lu zayol ye.
29 Ne ayol a en kpa cia nen sanker,+Sha ci u sanker ka a tsaha or sha akaabo a nan;Fa nen ner orjir ngu.”+
