Yobu 42:1-17
42 Tsô Yobu gema kaa a Yehova ér:
2 “Hegen m fa, we u fatyô u eren akaa ciiMa kwagh u u we ishima u eren u una hemba u je kpa ngu ga.+
3 U kaa wer, ‘Ka an nan yisan awashima wam a mfe shio nee?’+
Sha nahan yô, yange m lam, kpa m lam a mfe shio,Sha akaa a ganden mo, a m fetyô u fan ga yô.+
4 Shi u kaa wer, ‘Kegh ase ato a mo, m ôr u kwagh.
Mo me pine u kwagh, nahan we kaam.’+
5 Ato am yange ungwa a ungwa kwagh wou,Kpa hegen ne, m nenge a we sha ashe am.
6 Sha nahan yô, m hide a kwagh u yange m ôr la.*+
M gema ishima, m shar shin vuulevu kua shin mtwe.”+
7 Yehova ôron mkaanem man a Yobu been yô, Yehova kaa a Elifasa Orteman la ér:
“Ishima vihim a we kua akar a ou a ahar+ la kpishi, sha ci u ne ôr kwagh wam sha mimi+ er wanakiriki wam Yobu nahan ga.
8 Yô, kôr nen anomabua ataankarahar man anomaiyôngo ataankarahar, za nen hen wanakiriki wam Yobu, za na nen nagh ku nanden sha ci wen. Wanakiriki wam Yobu una er msen sha ci wen.+ Me lumun zamber* u una zamber a mo ér mo m de tsahan ne sha lanegh enegh ga la kpee je. Gadia ne ôr mimi sha kwagh wam er wanakiriki wam Yobu a er nahan ga.”
9 Tsô Elifasa Orteman, man Bildadi Orshua, kua Sofar Ornaamati, ve yem ve za er vough er Yehova kaa ve nahan. Yehova kpaa ungwa msen u Yobu.
10 Yobu eren msen sha ci u akar a na cii yô,+ Yehova kar a ican i Yobu kera,+ na un hide hingir yôughyôugh.* Yehova na un akaa kuma er a yange vande lun a mi la nahan kwa har.+
11 Anmgbianev nav mba nomso man mba kasev kua azende a na a tse cii,+ va her a na va ya kwagh vea na hen ya na, ve zungwe a na imôngo shi ve sur un ishima sha akaabo a yange Yehova de er un la. Hanmô ve na un gbenger azurufa kua kunya u zanaria.
12 Nahan Yehova ver mlu u Yobu u ken masejime la doo doo hemba u hiihii la.+ Yobu lu a iyôngo 14,000, urakumi 6,000, ibua ihiar ihiar kwa 1,000, kua ungômbajaki 1,000.+
13 Shi a mar ônov mba nomso utaankaruhar, mba kasev utar.+
14 A ii wan na u kwase u hiihii la iti ér Yemima, u sha uhar la ér Keshia, man u sha utar la ér Kerenhapu.
15 Ken tar la cii, kwase môm dooashe kuma sha ônov mba Yobu mba kasev mbara ga, shi ter ve na ve dyako a anmgbianev vev mba nomso imôngo.
16 Akaa ne nga been yô, Yobu shi hide tsa anyom 140, a nenge a ônov nav kua ônov mba ônov nav zan zan ikyov inyiin.
17 Ken masejime yô Yobu kpe, zum u a tsa sha won kpishi shi saan un iyol yô.*
