Numeri 9:1-23
9 Tsô Yehova lam a Mose ken taaikyôngo u Senai, ken uwer u hiihii,+ ken inyom i sha uhar i ve due ken tar u Igipiti kera la, a kaa ér:
2 “Mbaiserael ve kohol iyol i nan nagh ku Paseka+ sha shighe u i ver la vough.+
3 Uwer ne ayange 14 aikighe yô, ne kohol iyol i Paseka sha shighe u i ver la. Zum u ne lu kohol iyol u eren un yô, dondo nen hanma kwagh u i tese ér i er la cii.”+
4 Nahan Mose kaa a Mbaiserael ér ve kohol iyol i nan nagh ku Paseka.
5 Maa ve kohol iyol i nan nagh ku Paseka ken taaikyôngo u Senai, ken uwer u hiihii ayange 14 aikighe. Mbaiserael er vough er Yehova kaa Mose nahan.
6 Ior mbagen gema lu mba ve hôngor ayol a ve sha u benden a ikyom i or yô,+ nahan ve fatyô u kohol iyol i Paseka sha iyange la ga. Tsô ior mban va hen Mose man Aron sha iyange la,+
7 ve va kaa a na ér: “Se hôngor ayol a ase sha u benden a ikyom i or. Nahan se er nena? A er nan man a yange se u nan Yehova nagh a Mbaiserael imôngo sha shighe u i ver laa?”+
8 Nahan Mose kaa a ve ér: “Tamber nen heela, m ungwa kwagh u Yehova una ôr sha kwagh wen yô.”+
9 Yehova maa kaa a Mose ér:
10 “Kaa Mbaiserael wer, ‘Aluer ma or ken a ven shin or u ken ikyov yen i ken hemen je kpaa, nan bende a ikyom i or nahan nan kera ngu wang ga,+ shin nan yem zende u icaa je kpa, nana kohol iyol i nan Yehova nagh ku Paseka.
11 Ve kohol iyol i yan un ken uwer u sha uhar,+ ayange 14 aikighe. Ve ya un sha beredi u i we kwa sha mi ga yô, kua ikyaiue i yuan.+
12 Ve de den kwagh môm ker a tsaan her ga,+ shi ve de hemben kuhe na ga.+ Ve er un er tindi u Paseka la a tese ér i er nahan vough.
13 Kpa or u nan lu wang shin nan ze zende ga, man nan we iyol sha ci u nan nagh ku Paseka ga yô, i wua imbaor la*+ sha ci u nan na nagh ku Yehova sha shighe u i ver la ga. Or la nana due iyolishô sha isholibo i nan la ga.
14 “‘Man aluer ka or u van a va u nan tem her a ven kpaa, nan kpa nana er iniongo i nagh ku Paseka u Yehova la.+ Nana er un er tindi u Paseka a tese la, man gbenda u i gbe u a er un la.+ Or u nan tem shir kua marnya u ken tar la cii, ve dondo tindi shon môm.’”+
15 Tsô sha iyange i i tim tabernakel la,+ ibyeenegh va cir tabernakel shon, ka tenti u Shiada la je la, kpa ka va lun aikighe yô, kwagh lu sha tabernakel la er ka usu nahan, zan zan sev kar aven.+
16 Ka kwagh u za hemen u eren je la: ibyeenegh kira ki cir un atetan, a luun tugh yô ki lu er ka usu nahan.+
17 Shighe u ibyeenegh kira kia mough sha tenti sha yô, Mbaiserael kpa ve mough fese ve gba yemen,+ ape ibyeenegh kira ki za til yô, Mbaiserael kpa ve haa afo her.+
18 Mbaiserael lu moughon sha imo i Yehova, shi lu haan afo sha imo i Yehova.+ Shighe u ibyeenegh kira kia tema sha tabernakel la cii, Mbaiserael kpa ve haa afo ve lu her.
19 Shighe u ibyeenegh kira kia lu sha tabernakel her ayange kpishi yô, Mbaiserael kpa ve ungwa imo i Yehova, ve mough ga.+
20 Ashighe agen ibyeenegh kira ki lu sha tabernakel ayange kpuaa tseegh. Yehova una na zwa ga yô, ve haa afo ve lu her, Yehova una naan zwa yô, ve mough.
21 Ashighe agen yô, ibyeenegh kira ki lu her aikighe zan zan kpernan pepe tseegh, kia moughon pepe yô, ve kpa ve mough. A lu atetan shin a lu tugh kpaa, shighe u ibyeenegh kira ki mough cii, ve kpa ve mough.+
22 A lu ayange ahar shin a lu uwer môm shin a hemba nahan kpaa, er ibyeenegh kira ki lu sha tabernakel her je, Mbaiserael kpa ve haa afo ve lu her, ve mough ga. Kpa kia moughon yô, ve kpa ve mough.
23 Ve lu haan afo sha imo i Yehova, shi ve lu moughon sha imo i Yehova, ve za hemen u ungwan imo i Yehova er Yehova kaa a Mose ér ve er nahan.
Ngeren mba shin kpe
^ Zwa Heberu, “i bee a nan hen ior mba nan kera.”
