Numeri 3:1-51
3 Ka icombor* i Aron man Mose, sha iyange i Yehova lam a Mose sha uwo u Senai la je ne.+
2 Ngun ka ati a ônov mba Aron je ne: lu Nadabi waniunda na, man Abihu+ man Eleasar+ man Itamar.+
3 Ka ati a ônov mba Aron, upristi mba i tsegha ve, i ver ve* sha u ve eren tom u pristi je la.+
4 Nahan kpa, Nadabi man Abihu yange ve kpe sha ishigh ki Yehova, sha ci u ve nande usu u i na zwa ga yô sha ishigh ki Yehova,+ ken taaikyôngo u Senai; ve lu a mar wan ga. Kpa Eleasar+ man Itamar+ za hemen u eren tom u pristi vea ter ve Aron.
5 Yehova maa kaa a Mose ér:
6 “Kporom a ipyaven u Levi+ ve va tile sha ishigh ki pristi Aron, ve wasen un tom.+
7 Ve wasen un kua nongoior la cii sha ishigh ki tenti u kohol ker la, sha u eren tom ve ken tabernakel la.
8 Ve nengen sha ikyav mbi ken tenti u kohol ker la cii,+ shi ve eren ityom ve sha ci u Mbaiserael, sha u eren ityom i hen tabernakel la.+
9 Gema Mbalevi na Aron kua ônov nav. Ka mba i ne ve a na yô, i dugh ve ken Mbaiserael i na un.+
10 Ver Aron man ônov nav ve eren ityom ve i pristi,+ or u i ne nan ian ga* u nan ve ikyua yô, i wua nan.”+
11 Yehova za hemen u lamen a Mose, a kaa ér:
12 “Nenge! Mo m tsua Mbalevi ken Mbaiserael sha ityough ki ônovmbaiundav* ken Mbaiserael cii.+ Mbalevi vea hingir kwagh wam.
13 Gadia hanma waniunda ka u wam je.+ Sha iyange i m wua hanma waniunda ken tar u Igipiti la je,+ m tsegha hanma waniunda ken Iserael cii sha ci wam, u orumace man u zendenya kpaa.+ Vea hingir mba av. Ka mo Yehova.”
14 Yehova shi lam a Mose ken taaikyôngo u Senai,+ a kaa ér:
15 “Nger ônov mba Levi ati sha uya mba uter vev man sha icombor ve. Hanma wan u nomso u hii uwer môm zan zan yem hemen cii, nger nan iti.”+
16 Nahan Mose nger ve ati sha imo i Yehova, vough er a kaa un nahan.
17 Ka ati a ônov mba Levi je ne: ka Gershon man Kohati kua Merari.+
18 Gema ka ati a ônov mba Gershon sha icombor ve je ne: ka Libeni man Shimei.+
19 Ônov mba Kohati sha icombor ve yô, lu Amram man Isehar man Heberon kua Ushiel.+
20 Ônov mba Merari sha icombor ve yô, lu Maheli+ man Mushi.+
Mban lu icombor i Mbalevi sha uya mba uter vev.
21 Icombor i i due ken Gershon yô, lu Mbalibeni+ man Mbashimei. Mban lu icombor i Mbagershon.
22 Iyenge i nomso mba ken a ve, mba hii uwer môm zan zan yem hemen, mba i nger ve ati cii yô, lu 7,500.+
23 Icombor i Mbagershon yange i haa afo ken ijime i tabernakel,+ vegher u shin ityôtar la.
24 Orvesen u hen ya u ter u Mbagershon yô, lu Eliasav wan u Lael.
25 Tom u ônov mba Gershon+ ken tenti u kohol ker yô, lu u nengen sha tabernakel man tenti+ man kwagh u cirin sha mi,+ kua ikyondo i sha hunda+ u tenti u kohol ker la,
26 man akondo a kasen+ tembe la, kua ikyondo i yisan+ i sha hunda u tembe u u kase tabernakel man atse la, man ikyor i tenti, kua hanma tom u u gbe u zough a akaa ne cii.
27 Icombor i i due ken Kohati yô, lu Mbaamram man Mbaisehar man Mbaheberon kua Mbaushiel. Mban lu icombor i Mbakohati.+
28 Iyenge i nomso mba hii uwer môm zan zan yem hemen cii yô, lu 8,600; tom ve lu u nengen sha icighanjiir la.+
29 Icombor i ônov mba Kohati haa afo vegher u ken imbusutariyan i tabernakel la.+
30 Orvesen u hen ya u icombor i Mbakohati lu Elisafan, wan u Ushiel.+
31 Tom ve lu u nengen sha Areki+ man tebul la+ kua daarimenger+ man atse la,+ kua mkam+ ma eren tom a mi ken icighanjiir la, man ikyondo i yisan+ kua hanma tom u u gbe u zough a akaa ne cii.+
32 Orvesen u lu ityough sha Mbalevi cii yô, lu Eleasar+ wan u pristi Aron, un lu nengen sha mba eren tom hen icighanjiir la.
33 Icombor i i due ken Merari yô, lu Mbamaheli man Mbamushi. Mban lu icombor i Merari.+
34 Iyenge i nomso mba hii uwer môm yem hemen, mba i nger ve ati cii yô, lu 6,200.+
35 Orvesen u hen ya u icombor i Merari yô, lu Suriel wan u Abihail. Mban haa afo vegher u imbusutarimese i tabernakel la.+
36 Tom u ônov mba Merari yô, lu u nengen sha mtôm ma lun ipye+ ma tabernakel la, kua itilan na+ man mtôm nam+ man agbur a na a lun a aan man mkam nam cii,+ kua hanma tom u u gbe u zough a akaa ne cii;+
37 man mtôm ma ma kase tembe la ningir tser la, kua agbur a ma a lun a aan+ man amande a tenti a ma, kua ikyor i tenti i ma cii.
38 Mba ve haa afo sha ishigh ki tabernakel vegher u sha ityoughkitaregh, sha ishigh ki tenti u kohol ker, vegher u iyange i dugh la yô, lu Mose man Aron kua ônov nav. Tom ve lu u nengen sha icighanjiir la, lu tom u ve eren sha ci u Mbaiserael je la. Or u i ne nan ian ga* u yange nana mgbôghom her cii yô, i wua nan.+
39 Iyenge i nomso mba ken Levi mba hii uwer môm yem hemen, mba Mose man Aron nger ve ati sha icombor ve, sha imo i Yehova yô, lu 22,000.
40 Maa Yehova kaa a Mose ér: “Nger ati a ônovmbaiundav mba nomso mba ken Iserael cii, mba hii uwer môm yem hemen,+ ôr iyenge ve shi nger ati a ve shin inya.
41 Ngohol Mbalevi sha ci wam sha ityough ki ônovmbaiundav mba Mbaiserael cii—ka mo Yehova+—shi ngohol uzendenya mba Mbalevi sha ityough ki ônovmbaiundav mba uzendenya mba Mbaiserael cii.”+
42 Tsô Mose nger ati a ônovmbaiundav mba Mbaiserael cii, vough er Yehova ôr un nahan.
43 Ingyegh ki ônovmbaiundav mba nomso, mba hii uwer môm yem hemen, mba i nger ve ati cii, lu 22,273.
44 Yehova shi ôr kwagh a Mose kaa ér:
45 “Ngohol Mbalevi, ve tile sha ityough ki ônovmbaiundav mba Mbaiserael cii, shi ngohol uzendenya mba Mbalevi, ve tile sha ityough ki uzendenya vev. Mbalevi vea hingir kwagh wam. Ka mo Yehova.
46 Ônovmbaiundav mba Mbaiserael 273 mba ve hembe iyenge i Mbalevi ken inya la yô,+ ka ishe i a paa ve a mi je ne:+
47 ngohol ushekel* utaan sha ityough ki hanma or,+ sha shekel u hen icighanjiir* la. Shekel môm ka ugera* 20.+
48 Gema inyaregh kira na Aron man ônov nav, ka ishe i paan ior mba ve neer ken iyenge la je la.”
49 Nahan Mose ngohol inyaregh ki paan kira, sha u paan ior mba ve hembe iyenge i Mbalevi ken inya la.
50 A ngohol inyaregh kira hen ônovmbaiundav mba Mbaiserael, lu ushekel 1,365, sha shekel u hen icighanjiir la.
51 Mose maa gema inyaregh ki ipaan kira na Aron kua ônov nav, sha imo i* Yehova, vough er Yehova kaa Mose nahan.
Ngeren mba shin kpe
^ Zwa Heberu, “ikyov.”
^ Zwa Heberu, “i iv ave a ve.”
^ Zwa Heberu, “or u ken inya,” inja na yô, ka or u nan lu ken tsombor u Aron ga je la.
^ Zwa Heberu, “hanma waniunda u a bugh sagh.”
^ Zwa Heberu, “or u ken inya,” inja na yô, ka or u nan lu Orlevi ga je la.
^ Shekel môm yange a yuhwa i kuma ugeram 11.4. Nenge Ngeren u Seer u B14 la.
^ Shin “sha icighan shekel.”
^ Gera môm yange a yuhwa i kuma ugeram 0.57. Nenge Ngeren u Seer u B14 la.
^ Zwa Heberu, “zwa u.”
