Numeri 10:1-36
10 Yehova maa kaa a Mose ér:
2 “Er ibusa i tôngon ihiar,+ var i a var sha azurufa.* Tôngon i sha u yilan nongoior la, man shighe u i gbe u a hembe hen afo yô.
3 Shighe u i tôngo i ihiar cii yô, nongoior la cii u va kohol hen a we, hen hunda u tenti u kohol ker la.+
4 Aluer ka môm tseegh i tôngo yô, ka mbavesen mba ve hemen ior udubu udubu ken Iserael la tseegh ve va kohol hen a we ye.+
5 “Zum u ne tôngo busa la sha akenge kposo kposo yô, mba ve hee afo vegher u sha ityoughkitaregh la+ ve mough.
6 Zum u ne tôngo busa la sha akenge kposo kposo sha kwa har yô, mba ve hee afo vegher u ken imbusutariyan la+ ve mough. I tôngon busa la nahan hanma shighe u kwe môm u mough yô.
7 “Zum u ne lu yilan ior sha u ve kohol imôngo yô, tôngo nen ibusa i ihiar la,+ kpa de tôngon nen i sha akenge kposo kposo ga.
8 Upristi, ônov mba Aron, ve tôngo ibusa la.+ Tôngon nen i nahan, i hingir ne tindi gbem sha ikyov yen cii.
9 “Aluer ne mba nôngon ityav a mbahyomov enev mba ve lu eren ne ican la ken tar wen yô, tôngo nen ibusa i utya,+ nahan Yehova Aôndo wen una umbur ne, una yima ne sha ikyev i mbahyomov enev.
10 “Sha ashighe a en a ember kpaa+—ka ashighe a en a eren uiniongo+ man ashighe a mhii u weregh je la—tôngo nen ibusa sha iniav yenev mbi nanden+ man iniav yenev mbi bem;+ nahan Aôndo wen una umbur kwagh wen. Ka mo Yehova Aôndo wen.”+
11 Tsô ken inyom i sha uhar, ken uwer u sha uhar ayange 20 la,+ ibyeenegh kira mough sha tabernakel+ u Shiada la sha.
12 Maa Mbaiserael gba moughon ken taaikyôngo u Senai sha adondo adondo, er i vande tesen ér vea moughon la,+ ibyeenegh kira za tile ken taaikyôngo u Paran.+
13 Lu kwa u hiihii u ve mough er tindi u Yehova na Mose la tese je la.+
14 Nahan afo a kwe u ônov mba Yuda hii moughon sha akum a ve,* Nashon+ wan u Aminadabi lu orvesen u ikyum la.
15 Netanel+ wan u Suar, lu orvesen u ikyum i ipyaven u ônov mba Isakar.
16 Eliabi+ wan u Helon, lu orvesen u ikyum i ipyaven u ônov mba Sebulon.
17 Mba soughon tabernakel la yô,+ ônov mba Gershon+ man ônov mba Merari+ mba ve tôô tabernakel la, mough gba yemen.
18 Maa afo a kwe u ônov mba Ruben mough sha akum a ve, Elisur+ wan u Sedeur, lu orvesen u ikyum la.
19 Orvesen u ikyum i ipyaven u ônov mba Shimion yô, lu Selumiel+ wan u Surisadai.
20 Orvesen u ikyum i ipyaven u ônov mba Gadi yô, lu Eliasav+ wan u Deuel.
21 Tsô Mbakohati mba ve tôôn ikyav mbi ken icighanjiir la+ kpa mough. Lu u a tim tabernakel la cii man vea mase va nyôron ye.
22 Maa afo a kwe u ônov mba Eferaim kpa mough sha akum a ve, Elishama+ wan u Amihudi lu orhemen u ikyum la.
23 Orvesen u ikyum i ipyaven u ônov mba Manase yô, lu Gamaliel+ wan u Pedasur.
24 Orvesen u ikyum i ipyaven u ônov mba Benyamin yô, lu Abidan+ wan u Gidiôni.
25 Tsô afo a kwe u ônov mba Dan kpa mough sha akum a ve, lu ve ve mase ikwe la cii ken ijime ye, sha er vea kuran i yô, Ahieser+ wan u Amisadai lu orvesen u ikyum la.
26 Orvesen u ikyum i ipyaven u ônov mba Asher yô, lu Pagiel+ wan u Okeran.
27 Orvesen u ikyum i ipyaven u ônov mba Nafetali yô, lu Ahira+ wan u Enan.
28 Kape Mbaiserael lu moughon sha akum a ve, sha adondo adondo yemen je la.+
29 Maa Mose kaa a Hobabi, wan u Reuel+ terkem u Mose, Ormidian la ér: “Se mba moughon yemen hen ijiir i Yehova yange kaa ér, ‘Me na ne i’ la.+ Yô va a vese imôngo,+ se er a we doo doo, sha ci u Yehova tôndo zwa u nan Iserael akaa a dedoo.”+
30 Kpa a kaa a na ér: “Me za ga. Me hide me yem ken tar wam, hen ior av.”
31 Tsô a kaa a na ér: “Wea lumun yô, de undun se ga, sha ci u we u fa ape se haa afo ken taaikyôngo ne yô, u tesen se gbenda.*
32 Shi aluer u va a vese imôngo yô,+ kwagh u dedoo u Yehova a er a vese cii, se kpa se er a we nahan, a bunde ga.”
33 Nahan ve mough hen uwo u Yehova,+ ve gba yemen zende u ayange atar, areki+ u ikyuryan i Yehova lu hemen ve gbenda ayange atar la cii, keren ijiir i teman sha ci ve.+
34 Shi ibyeenegh ki Yehova+ lu sha a ve atetan, zum u ve hembe hen afo ve lu yemen la.
35 Zum u areki la una mough una gba yemen yô, Mose a kaa ér: “Mough sha Yehova,+ mbahyomov ou ve̱ sambe, mba ve ker u ihyom la ve yevese sha ishigh you kera.”
36 Una za tilen yô, a kaa ér: “Yehova, hide hen ikpela i udubu mba Iserael i i gande ôron la.”*+
