Numeri 11:1-35
11 Tsô ior gba gban ahon sha ishigh ki Yehova tsung. Yehova ongo yô, ishima vihi un, maa usu due hen Yehova gba hian mbagenev sha akpeafoogh la.
2 Ior mba ngur vaan a Mose yô, a zamber a Yehova,+ maa usu la pir.
3 Maa i ii ijiir la iti ér Tabera,* sha ci u usu due hen Yehova hia ve.+
4 Ikpelaior+ i i nyôr nongo a ve la* gba tômon akaa sha hua,+ maa Mbaiserael kpaa shi gba vaan kaan ér: “Ka an nana na se inyam se ya?+
5 Se umbur ishu i yange se yaan ken Igipiti gbilin, man ukukumba* man uwatamelon kua mbaalabusa man galiki la nahan sar se je gande!+
6 Man nenge hegen se gbe uman a uma sha wono. Se mba a kwagh ugen heen môm ga, saa di mana ne tseegh.”+
7 Kwagh ka a er yô, mana+ ne gema lu er ka asange a koliande+ nahan, shi lu iyol er ka tsur u pupuu u ken* kon nahan.
8 Ior ve due ve za kura un, ve wua un sha nase gayô ve kume un shin lu, maa ve jiidi un shin tsua, gayô ve kaa uberedi mba vingir a mi,+ a lu ken zwa er ka kuese u sha mkure nahan.
9 Avure aa gbaan hen afo tugh yô, mana la kpa a haa.+
10 Tsô Mose ungwa ior gba vaan sha hanma tsombor cii, hanma or hen hunda u tenti u nan. Nahan ishima vihi Yehova tsung,+ shi Mose kpa kwagh la doo un ga kpishi je.
11 Maa Mose kaa a Yehova ér: “Er nan u er wanakiriki wou ican yum nahana? Er nan i kera doo u a mo ga, u gem ior mba ve lu zegeuikya ne cii, u shile sha a moo?+
12 Ka mo m we iyav mbu ior mban cii yee? Man ka mo m mar ve ye shinii? Ve u kaan a mo wer ‘Kôr ve sha ikyum er oryese ka a kôr wan u man atumba nahan,’ sha er me za a ve ken tar u yange u tôndo zwa wer u na uter vev la yee?+
13 Ka han me zua a inyam me na ior mban ciilii? Gayô ve zer vaan sha ishigh yagh kaan ér, ‘Na se inyam se ya!’
14 Me fatyô u tôôn ikyav mbi ior mban cii mo tswen ga, mbi gandem.+
15 Aluer kape i lu u u er a mo ne yô, guda gba wuan mo hegen tsô.+ Aluer doo u a mo yô, de kera den wer m seer nengen a ican ga.”
16 Yehova gema kaa a Mose ér: “Kohol mo iorov 70 ken mbatamen mba Iserael, nomso mba u fe wer ka mbatamen, shi mba mbavesen hen atô u ior yô,+ za a ve hen tenti u kohol ker la, ve za tile her a we imôngo.
17 Me sen+ me va lam a we heregh,+ shi me pande jijingi+ u a lu sha a we la me haa sha a ve, vea wasen we u tôôn ior mba ve lu zegeuikya ne, sha er u kera tôô mbi tswen ga yô.+
18 Kaa ior mbara wer, ‘Tsegha nen ayol a en nyian, gadia kper+ ne ya inyam kpee a bunde ga, sha ci u ne zer vaan sha ato a Yehova+ kaan ner: “Ka an nana na se inyam se ya? Guda shighe u se lu ken Igipiti la.”+ Nahan Yehova una na ne inyam ne ya kpee je.+
19 Ne ya i iyange i môm shin ayange 2 shin ayange 5 shin ayange 10 shin ayange 20 tseegh tsô ga,
20 kpa ne ya i uwer jimin, zan zan ia va due ne sha ahenga, ia hingir kwagh u ndôhôr ne ishima,+ sha ci u ne venda Yehova u a lu hen atô wen la, ne lu vaan sha ishigh nagh kaan ér: “Er nan jim se dugh ken Igipiti kera ase?”’”+
21 Mose maa kaa ér: “Ior mba m lu a ve ne, ve kuma nomso 600,000+ mba zan angahar,* man we iyol you u kaa wer, ‘Me na ve inyam vea ya a kuma ve uwer jimin’!
22 Aluer i sôngo akumauile cica cii je kpa, vea ya a kuma vee? Shin aluer i kôr ishu i shin zegemnger cii je yô, vea ya a kuma ve ha?”
23 Yehova maa kaa a Mose ér: “Uwegh ku Yehova yina shinii?+ Hegen u nenge aluer kwagh u m ôr la una er shin una er ga yô.”
24 Maa Mose due za ôr ior mkaanem ma Yehova man. Shi a kohol nomso 70 ken mbatamen mba nongoior la, a va a ve ve va tile ve kase tenti la.+
25 Tsô Yehova sen ken ibyeen+ va lam a na,+ maa a pande jijingi+ u lu sha a na la, a haa sha mbatamen mba 70 mbara cii. Jijingi la tem sha a ve je maa, ve gba eren er ka uprofeti nahan,*+ kpa ve kera za hemen u eren nahan ga.
26 Iorov uhar mbagen lu ken afo her, ati a ve lu Eldadi man Medadi. Tsô jijingi la sen sha a ve, sha ci u ve kpa ve lu ken mba i nger ve ati la, kpa ve due ve za hen tenti la ga. Nahan ve gba eren er ka uprofeti nahan ken afo.
27 Maa gumor ugen yevese va kaa a Mose ér: “Eldadi man Medadi mba eren er ka uprofeti nahan ken afo!”
28 Tsô Yoshua+ wan u Nun, u lu wanakiriki u Mose hii iyev je la gema kaa ér: “Terem Mose, yange ve!”+
29 Kpa Mose kaa ér: “U ngu gban iyuhwe sha ci wamaa? Ei, m tôm mer ior mba Yehova cii ma ve lu uprofeti, shi Yehova ma a hee jijingi na sha a ve!”
30 Mba been yô, Mose hide ken afo vea mbatamen mba ken Iserael mbara.
31 Tsô ahumbe due hen Yehova purugh a utakange vegher u shin zegemnger la va haa her afo kpuun,+ gbanger je kuma zende u iyange i môm, vegher ne man vegher la, hen afo cii. Ve cir hen inya tav sha je kuma aseva ahar.*
32 Tsô ior shi kuran utakange mbara sha iyange la cii, man tugh mbura cii, kua iyange i i dondo la cii, or môm kura yina uhoma pue* ga; ve tsen hen inya kpuun ken afo.
33 Kpa er inyam la lu ior mbara ken zwa her, ve lu a tam ga je tsô, ishima vihi Yehova a ve, Yehova gba timin ve sha bouange u vesen.+
34 Nahan ve ii ijiir la iti ér Kiberoti-hataava,*+ sha ci u lu hen ijiir la ve ii mba ve lu tômon akaa sha hua la ye.+
35 Ior mbara va mough hen Kiberoti-hataava gba yemen Haseroti, ve za haa afo hen Haseroti.+
Ngeren mba shin kpe
^ Inja na yô ér, “Mhie,” ka u usu hian kwagh vindi vindi je la.
^ A shi nan kpa, lu Mbaiserael ga mba ve lu hen atô ve la.
^ Shin “ufurum mba kiriki.”
^ Shin “iniôndo i.”
^ Ikyav tese ér lu nomso mba ve lu a gbong gbong iyol u zan ityav yô.
^ Shin “ve gba ôron kwaghôron u profeti.”
^ Ishiva i môm yange i lu usentimita 44.5 (uinci 17.5). Nenge Ngeren u Seer u B14 la.
^ Homa môm yange a kuma ulita 220. Nenge Ngeren u Seer u B14 la.
^ Inja na yô ér, “Iwar i Iin Kwaghtômon.”
