Numeri 23:1-30
23 Balam maa kaa a Balaki ér: “Ta atse hen ijiir ne ataankarahar,+ sôngom anomabua ataankarahar kua anomaiyôngo ataankarahar.”
2 Fese je maa Balaki er vough er Balam kaa nahan. Balaki man Balam na nagh sha nombua man nomiyôngo sha atse la seer seer.+
3 Balam maa kaa a Balaki ér: “Tile hen nagh ough ku nanden heen, mo me za ken hemen. Alaghga Yehova una za kohol mo her una lam a mo. Hanma kwagh u a pasem cii me ôr u.” Nahan a unde sha igyungu.
4 Tsô Aôndo za kohol Balam her,+ maa Balam kaa a na ér: “M ta atse ataankarahar sha nongo, m na nombua man nomiyôngo sha a seer seer.”
5 Tsô Yehova wa Balam mkaanem man ken zwa, ér:+ “Hide za hen Balaki, ka kwagh u u za ôr je ne.”
6 Nahan hidi yô, a nenge er Balaki man mbavesen mba Moabi cii tile hen nagh nagh ku nanden yô.
7 Maa a ôr injakwagh ne, a kaa ér:+
“Balaki tor u Moabi za kua a mo ken Aram+Hen iwo i sha ityoughkitaregh, a kaa ér:
‘Va wam Yakob ifyan.
Een, va puu Iserael.’+
8 A er nan ve me wa ior mba Aôndo a we ve ifyan ga la ifyanaa?
Man a er nan ve me puu ior mba Yehova a puu ve ga laa?+
9 M tile sha ityough ki avandegh m nenge a ve,Sha agungu kpaa, m tile m ta ashe m nenge a ve.
Mba ior mba ve tem sha tseeneke ve yô;+Ve nyôr nongo a akuraior agen ga.+
10 Ka an nana fatyô u ôron iyenge i vuulevu u Yakob?+
Môm ken unyiin u Iserael tseegh je kpa nana fatyô u ôron iyenge na ga.
De m* kpe ku u orperapera,De mkur wam a lu er u ve nahan.”
11 Balaki maa kaa a Balam ér: “Ka nyi u er a mo nee? M va a we heen mer va wa mbahyomov av ifyan, kpa nenge ase, ka iveren u gema u lu haan ve ye.”+
12 A gema a kaa a na ér: “Kera ka hanma kwagh u Yehova a wem ken zwa cii me ôr ga zee?”+
13 Balaki kaa a na ér: “Wea lumun yô va a mo imôngo hen ijiir igen, ape u za nenge a ve yô. U nenge a ve mbagenev, a lu ve cii ga. Wam ve ifyan heregh.”+
14 Nahan a kua a na a yem a na hen gburumaa u Sofim, sha ityough ki Pisega,+ a za ta atse ataankarahar her, a na nombua man nomiyôngo sha a seer seer.+
15 Nahan Balam kaa a Balaki ér: “Tile hen nagh ough ku nanden heen, m za keela m za zua a na.”
16 Tsô Yehova za kohol Balam, a wa mkaanem man ken zwa na, a kaa ér:+ “Hide za hen Balaki, ka kwagh u u za ôr je ne.”
17 Nahan hidi her a na yô, a nenge a tile hen nagh nagh ku nanden, shi mbavesen mba Moabi kpa lu vea na. Balaki maa pine un ér: “Ka nyi Yehova a ôrô?”
18 Maa a ôr injakwagh ne, a kaa ér:+
“Mough sha Balaki, ungwa.
Kegh ato a mo we wan u Shipor.
19 Aôndo ka or man una er aie yee?+
Ngu wan u or u ka nan vaa afanyô* la ga.+
Aluer a ôr kwagh yô, una kera er un gaa?
Man aluer a kaa kwagh yô, una kera kure kwagh shon gaa?+
20 Nenge! I va a mo ér m va ver ve doo doo;Nahan a na ve iveren,+ me fatyô u hiden a i ga.+
21 Lumun tahav mbu ahiriv môm sha Yakob ga,Shi lumun ér or a za Iserael iyol kpaa ga.
Yehova Aôndo na ngu a ve,+Mba wuese un genger genger ér ngu tor ve.
22 Aôndo ngu duen a ve ken Igipiti kera.+
Ngu ve er ka akor a bua-toho nahan.+
23 Or môm nana fatyô u kanger Yakob ikyôr ga,+Shi ishor i môm kpaa ia fatyô u kôron Iserael ga.+
Hen shighe ne a fatyô u ôron kwagh u Yakob man Iserael ér:
‘Nenge kwagh u Aôndo a er ne!’
24 Ikyurior ne ia mough sha er ka begha nahan,Ia kighir a mough a tile sha er ka begha yô.+
Ia yav inya ga zan zan saa ia ya kwagh u i ker laShi ia ma awambe a mba i woo ve la.”
25 Balaki maa kaa a Balam ér: “Aluer u fatyô u wan un ifyan ga yô, u veren kpaa de kera veren un doo doo ga.”
26 Balam gema kaa a Balaki ér: “M vande kaan a we mer, ‘Me er hanma kwagh u Yehova a ôr cii’ gaa?”+
27 Balaki gema kaa a Balam ér: “Shi va m za a we hen ijiir igen kpaa. Alaghga a lu kwagh u vough sha ishigh ki Aôndo u mimi la u we wan un ifyan her sha ci wam.”+
28 Nahan Balaki yem a Balam sha ityough ki Peor, u a ver ishigh vegher u Yeshimon* la.+
29 Maa Balam kaa a Balaki ér: “Ta atse hen ijiir ne ataankarahar, sôngom anomabua ataankarahar kua anomaiyôngo ataankarahar.”+
30 Tsô Balaki er vough er Balam kaa nahan, a na nombua man nomiyôngo sha atse la seer seer.
