Numeri 36:1-13
-
Tindi u ivaa i kasev mba lun a dyako (1-13)
36 Tsô mbayaav mba ônov mba Gileadi, wan u Makir,+ wan u Manase, u ken icombor i ônov mba Yosev, va va ôr kwagh a Mose kua mbavesen, ka mbayaav mba Mbaiserael je la.
2 Ve kaa ér: “Yehova yange kaa a terem ér a kar Mbaiserael inya sha ishor i eren,+ i lu dyako ve; shi Yehova kaa a terem ér a gema dyako u anngô wase Selofehadi, a na ônov nav mba kasev.+
3 Nahan aluer ve vôso ior mba ken ipyaven u Iserael ugen yô, a dugh dyako u kasev mbara ken dyako u uter asev, a gema a seer ken dyako u ipyaven u vea za lu ker la, nahan a dugh dyako la ken dyako wase u i er ishor i ne se la kera.
4 A va kôron ken inyom i Jubilii+ i ior i Iserael yô, shi a tôô dyako u kasev mbara a seer sha dyako u ipyaven u vea za lu ker la, nahan a dugh dyako ve ken dyako u ipyaven u uter asev kera.”
5 Nahan Mose kaa a Mbaiserael sha iniezwa i Yehova ér: “Kwagh u ipyaven u ônov mba Yosev a lu ôron la ka u vough.
6 Ka mkaanem ma Yehova a ôr sha kwagh u ônov mba Selofehadi mba kasev je ne: ‘Vea fatyô u vôson or u ve soo cii. Kpa ve vôso i lu or u hen tsombor u ipyaven u ter ve.
7 I de tôôn dyako u hen ipyaven u Iserael ugen yemen a mi hen ugen ga, Mbaiserael ve var a dyako u ipyaven u uter vev.
8 Shi hanma wankwase u nan lu a dyako ken ipyaven u Iserael yô, nana vôso or u hen ipyaven u ter u nan,+ sha er Mbaiserael vea lu a dyako u uter vev her yô.
9 I de tôôn dyako u hen ipyaven ugen i yemen a mi hen ipyaven ugen ga, uipyaven mba Iserael ve var a dyako ve.’”
10 Tsô ônov mba Selofehadi mba kasev er vough er Yehova kaa Mose nahan.+
11 Mahela man Tirsa man Hogela man Milka kua Noa, ônov mba Selofehadi mba kasev mbara,+ ve vôso ônov mba anmgbianev mba ter ve.
12 Ve hingir kasev mba ior mba ken icombor i Manase, wan u Yosev, sha er dyako ve una lu hen ipyaven u tsombor u ter ve her yô.
13 Ka atindi man ajiraôron a Yehova ôr Mbaiserael sha ikyev i Mose, hen taaikyôngo u Moabi, hen Yordan, ikyua a Yeriko je ne.+
