Numeri 14:1-45
14 Tsô nongoior la cii ger mliam, ior gber kwelegh gba vaan genger genger hen tugh mbura cii.+
2 Mbaiserael cii gba gban ahon a Mose man Aron,+ nongoior la cii gba lamen sha a ve kaan ér: “Guda yange ma se kpe ken tar u Igipiti, gayô guda yange ma se kpe ken taaikyôngo ne!
3 Er nan ve Yehova a lu van a vese ken tar ne ér se va kpe sha sankere?+ A ya ishar sha kasev asev man ônov asev.+ Ngun nahan guda u hiden yemen ken Igipiti gaa?”+
4 Je yô ve lu kaan ker ayol a ve ér: “Se tsua nen orhemen, se hide se yem nen ken Igipiti!”+
5 Tsô Mose man Aron ve gure ve kuma ishigh inya sha ishigh ki nongo u Mbaiserael u u kohol her la cii.
6 Maa Yoshua+ wan u Nun man Kalebu+ wan u Yefune, mba ve lu ken mba ve za u za nengen tar la mker la, ande akondo a ve,
7 ve kaa a Mbaiserael mba ve kohol her la cii ér: “Tar u se ze ker sha u za nengen u mker la, u doo kpen kpen je.+
8 Aluer doo Yehova a vese yô, una nyôr a vese ken tar la, shi una na se u kpee je, ka tar u u mgbough a atumba man iyough yô.+
9 Kpa de hendan nen kwagh a Yehova ga, shi de cian nen ior mba ken tar la kpaa ga,+ sha ci u se tim ve kera.* Kera mba a kwagh u kuran ve ga, Yehova ngu a vese.+ De cie nen ve ga.”
10 Nahan kpa, nongoior la cii lu ôron kwagh u tan ve awen.+ Tsô iengem i Yehova ande hen Mbaiserael cii, sha tenti u kohol ker la.+
11 Maa Yehova kaa a Mose ér: “Shi nan je man ior mban vea de u lahan mo?+ Ka hanma shighe je man vea gema nan mo jighjigh, er m er uivande mban cii her atô ve nee?+
12 De m haa ve bouange, m bee a ve kera, m gema u hingir ikyurior i i hembe ve iyenge man agee yô.”+
13 Kpa Mose kaa a Yehova ér: “Nahan Mbaigipiti mba yange u due a ior mban hen atô ve kera sha agee a ou la vea za ungwa,+
14 maa vea gba ôron ior mba hen tar ne kwagh ne. Shi ior mban kpa ve ungwa ér we Yehova u ngu her atô u ior ne,+ shi u ande her a ve ishigh a ishigh.+ We u ngu Yehova, shi ibyeenegh you tile sha a ve, u ngu yemen ve sha hemen ken ibyeenegh ki lun er ityôgh nahan atetan, man usu u lun er ityôgh nahan tugh.+
15 Aluer u wua ior mban cii kwa môm* yô, akuraior a a ongo gwa wou la, aa kaa ér:
16 ‘Yehova fatyô u nyôron a ior mban ken tar u yange bum ér una na ve la ga, nahan a wua ve ken taaikyôngo.’+
17 Yô, Yehova, ma u shi tese agee a ou a hemban la, er yange u tôndo zwa nahan, u kaa wer:
18 ‘Yehova vihin ishima fele ga, tesen dooshima wuee,+ den ior kwaghbo man tindi u peren, kpa oriboo yô, ka a tsaha nan keng, ka bunden ga, tsahan ônov sha kwaghbo u uter vev, zan zan kov u sha utar man kov u sha unyiin kpaa.’+
19 Wea lumun yô, gba den ior mban kwaghbo ve sha dooshima wou u a been ga la tsô, vough er u lu vanden den ve, hii ken Igipiti je zan zan hegen nahan.”+
20 Maa Yehova kaa ér: “Me de ve kwaghbo ve, vough er u kaa nahan.+
21 Nahan kpa, er m lu u uma ne, tar cii ua iv a iengem i Yehova.+
22 Nahan cii kpa, ken mba ve nenge a iengem yam man uivande+ mba m er ken Igipiti man ken taaikyôngo ne, kpa ve ze hemen u karen mo+ i kom kwa pue hegen, shi ve ongo imo yam ga ne yô, or ve môm+
23 nana nenge a tar u yange m bum a uter vev sha kwagh u u la ga. Or môm ken mba ve nem icivir ga ne nana nenge a u mayange ga.+
24 Kpa er ieren i wanakiriki wam Kalebu+ i kaha a i mbagen mbara, shi a dondom a ishima na i môm yô, me nyôr a na ken tar u a ze ker la kpee je, shi ônov nav vea ngohol u a hingir u ve.+
25 Er Mbaamaleki man Mbakaanan+ ve tem shin pev* ne yô, kper hide ver nen ishigh u yemen ken taaikyôngo, sha gbenda u zan hen Zegemnger u Nyian la.”+
26 Yehova maa kaa a Mose man Aron ér:
27 “Ka hanma shighe je man nongoior u ifer ne ua de u eren mo ivevere?*+ M ungwa ivever i Mbaiserael ve lu eren mo la.+
28 Kaa nen a ve ner, ‘Ka kwagh u Yehova a kaa je ne, “Er m lu u uma ne, me er a ven vough er m ongo ne lu ôron nahan!+
29 Ne kpe, akom a en aa haa inya ken taaikyôngo heen,+ ne mba hii anyom 20 yem hemen mba yange i nger ne ati cii, ne mba ne lu eren mo ivever* ne cii.+
30 Or wen môm kpa nana nyôr ken tar u yange m bum* mer me na ne tema nen ker la ga,+ saa Kalebu wan u Yefune man Yoshua wan u Nun tseegh.+
31 “‘“Me nyôr a ônov enev mba yange ne kaa ner a ya ishar sha a ve la,+ ka ve vea fa tar u ne vende u la ye.+
32 Kpa akom a en yô, aa haa inya ken taaikyôngo ne.
33 Ônov enev vea hingir mbakuranilev ken taaikyôngo ne anyom 40,+ vea kimbi injar i ieren yen i mimi ga* la, zan zan ikyom i or u masetyô ken a ven ia kar gban ken taaikyôngo ne.+
34 Anyom a ne tsa ken taaikyôngo ne aa zua sha ayange 40 a yange ne za nenge tar la mker la,+ inyom i môm sha ityough ki hanma iyange, inyom i môm sha ityough ki hanma iyange, ne ya mtsaha sha akaabo a en la anyom 40,+ nahan ne fa er ka a hendan* a mo ve i lu yô.
35 “‘“Ka mo Yehova m ôr kwagh ne ye. Nongoior u wan ifer u u kohol u lu hendan a mo ne cii, ka kwagh u me er a u je ne: Kwagh ve una kure ken taaikyôngo ne, vea kpe heen.+
36 Ior mba yange Mose tindi ve ér ve za nenge tar la mker, mba ve na nongoior la cii hii u gban ahon a na, zum u ve hide a ibaver i bo sha kwagh u tar shon la cii,+
37 ka ve mba ve va a ibaver i bo sha kwagh u tar la je la, a tsaha ve, vea kpe sha ishigh ki Yehova.+
38 Kpa Yoshua wan u Nun, man Kalebu wan u Yefune, ve mba ve lu ken mba yange ve za nenge tar la mker la yô, vea lu uma her, a bunde ga.”’”+
39 Mose er Mbaiserael cii mkaanem man yô, ior gba zungwen tsung.
40 Tseegh ga, shi ve mough tugh tugh ve gba nôngon ér vea unde sha ityough ki uwo la, ve lu kaan ér: “Se wa iyol ka u se za sha ijiir i Yehova a er kwagh u i la je ne, gadia se er isholibo.”+
41 Kpa Mose kaa ér: “Er nan ne lu peren tindi u Yehova? Kwagh ne a za a doo ga.
42 De kôndon nen ga, sha ci u Yehova ngu a ven ga; mbahyomov enev vea za hemba ne.+
43 Gadia Mbaamaleki man Mbakaanan mba keela, vea za tagher ishigh a ven,+ vea wua ne sha sanker. Er ne gem ijime a Yehova yô, Yehova kpa una lu a ven ga.”+
44 Nahan kpa, ve norom ve za unde sha ityough ki woogh,+ kpa areki u ikyuryan i Yehova man Mose yô, ve mough her atô u afo la ga.+
45 Tsô Mbaamaleki man Mbakaanan mba ve tema sha uwo la, sen va ta ityav sha ve, sambe ve zan zan za ar Horma.+
Ngeren mba shin kpe
^ Zwa Heberu, “mba beredi her a vese.”
^ Zwa Heberu, “er ka or môm nahan.”
^ Shin “pev u lun gburumaa.”
^ Shin “ua de u hendan (gban ahon) a moo?”
^ Shin “ne lu hendan a mo; ne lu gban ahon a mo.”
^ Zwa Heberu, “m kende uwegh sha.”
^ Zwa Heberu, “idya yen.”
^ Shin “ka a lu ihyom.”
