Numeri 31:1-54
31 Tsô Yehova kaa a Mose ér:
2 “Or iyev+ sha Mbamidian sha ci u Mbaiserael.+ U been yô, a ii u a ior ou imôngo.”*+
3 Nahan Mose lam a ior, a kaa ér: “Tsua nen ior ken a ven, wa nen ve ago iyol sha er vea za* nôngo ityav a Midian, vea or iyev i Yehova sha Midian yô.
4 Tsua nen iorov 1,000 ken hanma ipyaven ken uipyaven mba Iserael cii, ve nyôr shoja.”
5 Nahan ken udubu mba Iserael la,+ i tsua iorov 1,000 ken hanma ipyaven, kohol cii lu iorov 12,000, i wa ve ago iyol sha ci u utya.*
6 Tsô Mose tindi iorov 1,000 ken hanma ipyaven, ken utya, Pinehashi+ wan u pristi Eleasar kpa za a mbautyaav mbara imôngo, un lu a mkam ma tseghan kua ibusa i utya+ ken uwe.
7 Ve za ta ityav sha Midian, vough er Yehova kaa Mose nahan, ve wua hanma nomsoor cii.
8 Mbagenev mba i wua, u seer sha mbara yô, lu ator a Midian. A yô, lu Evi man Rekem man Sur man Hur kua Reba, ator ataan a Midian la, shi ve wua Balam+ wan u Beor kpaa sha sanker.
9 Kpa Mbaiserael gema kôr kasev man mbayev mba Midian yem a mi, shi ve ya ishar sha ilev vev man uzendenya vev kua akaa a ve lu a mi cii.
10 Shi agar a ve a vesen a ve tema ker kua agar a ve a kiriki cii, ve nande sha usu.
11 Ve kura ishar i ve ya la cii, uumace man zendenya kpaa.
12 Ve va a ior mba ve kôr la kua akaa a ve ya ishar sha mi la hen Mose man pristi Eleasar, kua hen nongoior u Iserael cii, hen ape ve haa afo hen taaikyôngo u Moabi+ hen kpe Yordan, ikyua a Yeriko la.
13 Tsô Mose man pristi Eleasar kua mbavesen mba nongoior la cii, due u za keghen ve gbenda ken akôngoafoogh.
14 Kpa ishima vihi Mose a mbavesen mba utyaav kua mbavesen mba ior dubu dubu man mbavesen mba ior deri deri mba ve lu za hiden ken utya la,
15 Mose kaa a ve ér: “Ne de kasev cii mba uma heree?
16 Nenge! Ka ve je Balam yange wa ve kwagh ve va mee Mbaiserael ve kera er kwagh a Yehova sha mimi ga,+ sha kwagh u Peor,+ nahan bouange va sha nongoior u Yehova ye.+
17 Yô wua nen hanma wanyenomso, shi wua nen hanma kwase u nan vande yaven a or cii.
18 Kpa mbayevkasev mba ve lu a vande yaven a or ga la yô, de nen ve ve lu uma.+
19 Lu nen ken akôngoafoogh ayange ataankarahar. Hanma or wen u nan woo or* kua hanma or wen u nan bende a or u i woo nan cii,+ nana wanger iyol i nan+ sha iyange i sha utar man sha iyange i sha utaankaruhar, ne man ior mba ne ker ve la cii.
20 Shi wanger nen isholibo sha hanma ikyondo man hanma kwagh u i er sha ikyôv man hanma kwagh u i er sha aive a ivo* kua hanma kwagh u i er sha kon cii.”
21 Pristi Eleasar maa kaa a mbautyaav mba ve za ityav la ér: “Ka tindi u Yehova yange kaa Mose je ne ér,
22 ‘Ka zanaria man azurufa man togula man iyôgh kua kwaza* man inyelegh,
23 hanma kwagh u a fatyô u sôron ken usu tseegh ne kar a mi ken usu, nahan una hingir wang ye. Nahan kpa, shi i wanger un sha mngerem ma wanger kwagh a mi la kpaa.+ Hanma kwagh u a fatyô u sôron un ken usu ga cii, kire nen un sha mnger.
24 Shi ne kire akondo a en sha iyange i sha utaankaruhar la, ne hingir wang, maa ne nyôr ken afo.’”+
25 Yehova maa kaa a Mose ér:
26 “Ôr iyenge i akaa a i ye ishar sha mi la, iyenge i uumace kua uzendenya mba i kôr ve la cii, er kwagh ne vea pristi Eleasar kua mbayaav mba nongoior la.
27 Pav kwagh u i ye ishar sha mi la ker avegher ahar; a na ior mba ve ze ityav la vegher môm, ugen la di a na nongoior la cii.+
28 Gema ngohol uma* môm ken uuma 500 mba ior man ibua man ujaki man iyôngo hen ushoja mba ve ze ityav la, i lu kpandegh ku Yehova.
29 Dugh nen akaa ne ken vegher u i ne ve la, na nen pristi Eleasar, i lu iyua i i ne Yehova yô.+
30 Ken vegher u i ne Mbaiserael la di, ngohol nen môm ken 50 u ior man u ibua man u ujaki man u iyôngo kua u hanma inja zendenya cii, gema na nen Mbalevi+ mba ve eren tom hen tabernakel u Yehova la.”+
31 Tsô Mose man pristi Eleasar er vough er Yehova kaa Mose nahan.
32 Nahan akaa a a shi ken ishar i ior mba ve za ityav ve ya la, lu iyôngo 675,000,
33 ibua 72,000,
34 man ujaki 61,000.
35 Kasev mba ve lu a vande yaven a or ga yô,+ lu kasev* 32,000.
36 Vegher u lu kwar u ior mba ve za ityav la, kohol cii yô, iyôngo lu 337,500.
37 Iyôngo i i dugh ker i ta Yehova kpandegh a mi yô, kohol lu 675.
38 Ibua lu 36,000, i dugh 72 ker i ta Yehova kpandegh a mi.
39 Ujaki lu 30,500, i dugh 61 ker i ta Yehova kpandegh a mi.
40 Uumace* lu 16,000, i dugh iorov 32 ker i ta Yehova kpandegh a mi.
41 Nahan Mose gema kpandegh ku i na Yehova iyua a mi la na pristi Eleasar,+ vough er Yehova kaa Mose nahan.
42 Gema ken vegher u i na Mbaiserael, u Mose pav kposo a kwagh u i na ior mba ve za ityav la yô,
43 ken vegher shon la, iyôngo lu 337,500,
44 ibua lu 36,000,
45 ujaki lu 30,500,
46 ior* lu 16,000.
47 Maa Mose dugh môm ken 50 u ior man zendenya, ken vegher u lu kwar u Mbaiserael la, a na Mbalevi+ mba ve nengen sha tom u ken tabernakel u Yehova la,+ vough er Yehova kaa Mose nahan.
48 Tsô ior mba i tsua ve ken akumautya udubu imôngo la,+ ka mba hemen ior dubu dubu man mba hemen ior deri deri je la, ve va hen Mose,
49 ve va kaa a Mose ér: “Mbayev ou ôr iyenge i ior mba ve ze ityav ve lu sha ikyev yase la, man or wase môm kpa nan saa ga.+
50 Nahan yô, de hanmô wase nana na Yehova iyua sha kwagh u nan zough a mi la, ka akaa a sha zanaria man mshirim ma shin angahar, man mbaagba man myôm ma ken ave ma veren ikyav a mi, man mbaabinkwini* kua akaa a eren hwe a mi agen, sha er se na iwom sha ci u ayol a ase* sha ishigh ki Yehova yô.”
51 Tsô Mose man pristi Eleasar ngohol zanaria la hen ve, ka akaa a eren hwe a mi la cii je la.
52 Zanaria u ve na Yehova iyua a mi la cii, kohol lu ushekel 16,750,* lu kwagh u mba hemen ior dubu dubu man mba hemen ior deri deri va na je la.
53 Ior mba ve za ityav la cii, hanmô ve ya ishar.
54 Mose man pristi Eleasar ve ngohol zanaria u mba hemen ior dubu dubu man mba hemen ior deri deri va a mi hen tenti u kohol ker la, ér i lu kwagh u umbur sha ci u ior i Iserael sha ishigh ki Yehova.
Ngeren mba shin kpe
^ Zwa Heberu, “a za ver u a ior ou imôngo.” Ka injakwagh i ôron kwagh u kuugh.
^ Shin “sha er vea lu mbautyaav, vea za.”
^ Shin “sha er vea lu mbautyaav yô.”
^ Shin “uma.”
^ Shin “ice i ivo.”
^ Shin “kuza.” Kwagh ne kpa ka iyôgh.
^ Nenge Ngeren u Pasen Asember.
^ Shin “uuma.”
^ Shin “uuma mba iorov.”
^ Shin “uuma.”
^ Shin “inyarev mbi ken ato.”
^ Shin “uuma asev.”
^ Shekel môm yange a yuhwa i kuma ugeram 11.4. Nenge Ngeren u Seer u B14 la.
