Numeri 33:1-56
33 Kape Mbaiserael lu haan afo yemen, er ve due ken tar u Igipiti+ akum akum,+ sha hemen u Mose man Aron je ne.+
2 Mose lu ngeren ajiir a ve lu haan afo shi moughon yemen la sha adondo adondo, sha imo i Yehova, man ka ajiir a ve lu haan afo shi moughon yemen sha adondo adondo je ne:+
3 Ve mough hen Ramese+ ken uwer u hiihii ayange 15 a uwer la.+ Sha iyange i i dondo sha iyange i Paseka la je,+ Mbaiserael due sha ashe a Mbaigipiti cii a mciem shio.*
4 Mbaigipiti di lu iin ônov vev mbaiundav mba Yehova wua la cii,+ sha ci u Yehova ôr mbaaôndo vev ijir.+
5 Nahan Mbaiserael mough hen Ramese, za haa afo hen Sukoti.+
6 Ve va mough hen Sukoti ve za haa afo hen Eteham+ u a lu hen kpe u taaikyôngo la.
7 Mba va moughon hen Eteham yô, ve hide ve ver ishigh vegher u Pihahiroti, u ú tile ker ve u nenge a Baal-sefon+ la, ve za haa afo sha ishigh ki Migedol.+
8 Maa ve va mough hen Pihahiroti, ve kar hen atô u zegemnger+ ve yem ken taaikyôngo,+ ve zende zende u ayange atar ken taaikyôngo u Eteham,+ maa ve za haa afo hen Mara.+
9 Ve mough hen Mara ve va ar hen Elim. Amboramnger lu hen Elim 12 kua atineavilegh 70, maa ve haa afo her.+
10 Ve mough hen Elim, ve za haa afo hen kpe u Zegemnger u Nyian.
11 Ve va mough hen Zegemnger u Nyian, ve za haa afo ken taaikyôngo u Sen.+
12 Shi ve mough hen taaikyôngo u Sen, ve za haa afo hen Dofeka.
13 Shighe karen yô ve mough hen Dofeka ve za haa afo hen Alushi.
14 Ve mough hen Alushi, ve za haa afo hen Rafidim,+ ape mngerem lu ma ior a ma ga la.
15 Shi ve mough hen Rafidim, ve za haa afo hen taaikyôngo u Senai.+
16 Ve mough hen taaikyôngo u Senai, ve za haa afo hen Kiberoti-hataava.+
17 Ve va mough hen Kiberoti-hataava, ve za haa afo hen Haseroti.+
18 Shi ve va mough hen Haseroti ve za haa afo hen Ritema.
19 Shi ve va mough hen Ritema, ve za haa afo hen Rimon-perese.
20 Maa ve mough hen Rimon-perese, ve za haa afo hen Libena.
21 Ve mough hen Libena, ve za haa afo hen Risa.
22 Shi ve va mough hen Risa ve za haa afo hen Kehelata.
23 Maa ve mough hen Kehelata ve za haa afo hen uwo u Sefer.
24 Mba va moughon hen uwo u Sefer yô ve za haa afo hen Harada.
25 Maa ve va mough hen Harada, ve za haa afo hen Makeloti.
26 Ve mough+ hen Makeloti, ve za haa afo hen Tahati.
27 Shi ve va mough hen Tahati ve za haa afo hen Tera.
28 Ve mough hen Tera maa ve za haa afo hen Miteka.
29 Shighe karen yô, ve mough hen Miteka ve za haa afo hen Hasemona.
30 Ve mough hen Hasemona ve za haa afo hen Mosera.
31 Maa ve mough hen Mosera ve za haa afo hen Bene-Yakan.+
32 Shi ve mough hen Bene-Yakan, ve za haa afo hen Hor-hagidigadi.
33 Shi ve mough hen Hor-hagidigadi ve za haa afo hen Yotabata.+
34 Ve va mough hen Yotabata, ve za haa afo hen Aberona.
35 Ve va mough hen Aberona, ve za haa afo hen Eshion-geber.+
36 Shi ve va mough hen Eshion-geber, ve za haa afo hen taaikyôngo u Zin,+ ka hen Kadeshi je la.
37 Ve va mough hen Kadeshi, ve za haa afo hen Uwo u Hor,+ hen ijootar i Edom.
38 Tsô pristi Aron unde sha uwo u Hor er Yehova kaa nahan, a za kpe sha heregh ken inyom i sha 40 i Mbaiserael due ken tar u Igipiti kera la, ken uwer u sha utaan, sha iyange i hiihii i uwer shon.+
39 Aron lu anyom 123 shighe u kpe sha uwo u Hor la.
40 Tsô tor u Aradi,+ Orkaanan u tema ken Negebi, ken tar u Kaanan la, ungwa ér Mbaiserael mba van.
41 Tsô shi ve va mough hen Uwo u Hor,+ ve za haa afo hen Salamona.
42 Shi ve va mough hen Salamona, ve za haa afo hen Punon.
43 Ve va mough hen Punon, ve za haa afo hen Oboti.+
44 Shi ve va mough hen Oboti, ve za haa afo hen Iye-abarim, hen ijootar i Moabi.+
45 Ve va mough hen Iyim,* ve za haa afo hen Dibon-gadi.+
46 Shi ve mough hen Dibon-gadi, ve za haa afo hen Alemon-dibelataim.
47 Ve va mough hen Alemon-dibelataim, ve za haa afo hen iwo i Abarim,+ hen ishigh ki Nebo.+
48 Ken masejime yô, ve mough hen iwo i Abarim ve za haa afo hen taaikyôngo u Moabi, hen Yordan, ikyua a Yeriko.+
49 Ve haa afo hen Yordan ve lu her, hii hen Bete-yeshimoti zan zan za ar Abel-shitim,+ hen taaikyôngo u Moabi.
50 Tsô Yehova lam a Mose hen taaikyôngo u Moabi hen kpe Yordan ikyua a Yeriko, a kaa ér:
51 “Lam a Mbaiserael, kaa a ve wer, ‘Ne mba peren Yordan ne nyôr ken tar u Kaanan.+
52 Zenda nen ior mba ken tar la cii sha ishigh yenegh kera, shi vihi nen ieev vev mbi sha awen+ kua ieev vev mbi keren a ker kpaa cii,+ hembe nen ajiir a ve a taven* cii kera.+
53 Ne ngohol tar la ne tema ker, sha ci u me na ne tar la ua hingir kwagh wen kpee je.+
54 Pav tar la sha ishor i eren,+ kar nen sha icombor yen vough vough. Seer nen mba ve ngee la dyako, mba ve ngee ga la di pande nen dyako ve.+ Hanma or yô, dyako u nan una lu ape ishor i nan i gbe la, ne ngohol inya a lu dyako wen sha uipyaven mba uter enev.+
55 Kpa, aluer ne zenda ior mba ken tar la sha ishigh yenegh kera ga yô,+ mba ne de ve lu her la vea hingir er ka kwagh u kuman ne ken ishe, man er ka asaa u kuman ne ken ahan nahan, shi vea za ne iyol ken tar u ne tema ker la.+
56 Nahan me gema me er ne kwagh u m we ishima u eren a ve la.’”+
Ngeren mba shin kpe
^ Zwa Heberu, “a uwegh ku kenden sha.”
^ Alaghga ka gbenda u ngeren Iye-abarim tiônôô.
^ Nenge Ngeren u Pasen Asember, “Ijiir i taven.”
