Numeri 5:1-31
5 Yehova shi ôr kwagh a Mose kaa ér:
2 “Kaa Mbaiserael ve due a hanma orimande ken afo kera,+ man hanma or u kwagh a dugh nan ken iyol,+ man hanma or u nan kera lu wang ga sha ci u nan bende a ikyom i or yô.+
3 A lu nomsoor shin a lu kwase kpaa, due nen a nan. Due nen a ve ken akôngoafoogh, sha er vea hôngor+ a afo a mba m tem* hen atô ve la ga yô.”+
4 Nahan Mbaiserael er nahan, ve due a ve ken akôngoafoogh. Mbaiserael er vough er Yehova kaa Mose nahan.
5 Yehova za hemen u ôron kwagh a Mose, a kaa ér:
6 “Kaa Mbaiserael wer, ‘Aluer nomsoor shin kwase nan er ma isholibo i ior ve eren, nan kera er kwagh a Yehova sha mimi ga yô, imbaor la nan ngu a ibo.+
7 Nana pase+ isholibo i nan er la, shi nana hide a kwagh u nan lu a ibo sha mi la her vough, shi nana seer môm ken utaan u kwagh shon;+ nana na or u nan er nan kwaghbo la.
8 Kpa aluer or la nan ngu a anmgbian u ikyua ikyua u nana ngohol kwagh u i hide a mi la ga yô, i hide a mi i na Yehova. Una hingir kwagh u pristi, kua nomiyôngo u nan iwom u una na iwom a mi sha ci u nan la kpaa.+
9 “‘Hanma icighankwagh+ u Mbaiserael ve ve a mi hen pristi cii yô, una hingir u na.+
10 Uicighanmbaakaav mba hanma or vea lu mba nan. Kpa kwagh u nan ve a mi hen pristi yô, una hingir u pristi la.’”
11 Yehova shi za hemen u lamen a Mose, a kaa ér:
12 “Lam a Mbaiserael, kaa ve wer, ‘Ka kwagh u a er aluer kwase u or hingir u eren kwagh ken kpe, nan er kwagh a nan sha mimi ga,
13 orgen za yav a nan+ kpa nom u nan fa ga, shi kwagh shon due ken igbar ga, nahan kwase la nan hingir u hôngor iyol i nan, kpa or ngu u eren shiada sha kwagh u nan ga shi i kôr nan a mi ga je ne:
14 Aluer nom la gba iyuhwe sha kwagh u nan, shi ka shin nan a kwase u nan ér a er kwagh sha mimi ga, zum u nan hôngor iyol i nan, shin aluer nan gba iyuhwe shi ka shin nan a kwase u nan ér a er kwagh sha mimi ga, zum u nan hôngor iyol i nan ga kpaa,
15 or la nana va a kwase u nan la hen pristi, shi nana va a nagh sha ci u kwase u nan kpaa, nana va a mwem ma barli ma kuman môm-ken-pue u efa.* Nana de haan mkurem sha mi ga, shi nana de pendan ferankinsensi sha mi kpaa ga, sha ci u ka nagh ku sha samuyia ku iyuhwegh, nagh ku sha samuyia ku umbur ibo.
16 “‘Pristi a kporom a kwase la nana va tile sha ishigh ki Yehova.+
17 Pristi a kese icighanmnger hen ikyagh ki inyaagh, maa a er vuulevu hen inya hen tabernakel la a haa shin mngerem mara.
18 Pristi a va a kwase la nana va tile sha ishigh ki Yehova, a sagh nan ice, a gema nagh ku sha samuyia ku umbur ibo la a penda nan sha akevaveegh, ka nagh ku sha samuyia ku iyuhwegh kura je la,+ pristi a gema a kôr mngerem ma yuan ma van a ifyan la ken uwe.+
19 “‘Pristi maa a er kwase la nana bum, a kaa a nan ér: “Aluer orgen nan yav a we er u lu sha ikyev i nomou ne ga,+ shi u er kwagh kpe, u hôngor iyol you ga yô, ifyan i mngerem ma yuan man ma van a mi la i de kôron we ga.
20 Kpa aluer u er kwagh kpe er u lu sha ikyev i nomou ne, u hôngor iyol you, u yav a orgen kposo,+ ka nomou ga yô—”
21 Maa pristi una er kwase la nana bum ér ifyan i kôr nan, pristi una kaa a kwase la ér: “Yehova a̱ er u hingir kwagh u wan ifyan a mi man kwagh u bumun a mi hen ior ou, Yehova a̱ er anam a ou* a kpe,* shi a̱ er u mor iyav kpaa.
22 Mngerem ma van a ifyan man ma̱ nyôr u shin uya, ma̱ er u mor iyav, shi ma er anam a ou* a kpe.”* Kwase la maa nana kaa ér: “Amen! Amen!”*
23 “‘Pristi la maa a̱ nger afan ne shin takeda, a ôô a shin mngerem ma yuan mara.
24 Maa a na kwase la mngerem ma yuan ma van a ifyan la a ma, mngerem ma van a ifyan mara ma a nyôr nan ken iyol, ma a na a gba nyoon nan.
25 Maa pristi a̱ ngohol nagh ku sha samuyia ku iyuhwegh la+ sha ave a kwase la, a cia nagh ku sha samuyia kura keen man keen sha ishigh ki Yehova, maa a va a ku ikyua a atse la.
26 Pristi a ongo nagh ku sha samuyia la ken ikyevwe poo, ku lu nagh ku umbur,* a nande ku sha atse la.+ Una been yô, a na kwase la mngerem mara a ma.
27 Una naan kwase la mngerem mara nana maan yô, aluer nan hôngor iyol i nan, nan er kwagh sha mimi ga a nom u nan yô, mngerem ma van a ifyan mara ma a nyôr nan ken iyol, ma a na a nyoon nan, nana mor iyav, ma a er anam a nan* aa kpe,* nahan kwase la nana hingir kwagh u wan ior ifyan a mi hen ior mba nan.
28 Kpa aluer kwase la nan hôngor iyol i nan ga, nan ngu wang yô, nana kera ya mtsaha la ga, nahan nana fatyô u wan iyav maren wan.
29 ‘“Ka tindi u sha kwagh u iyuhwegh je ne,+ zum u kwase nan er kwagh kpe, nan hôngor iyol i nan shighe u nan lu sha ikyev i nom u nan her,
30 shin zum u or nan hingir u gban iyuhwe sha kwagh u kwase u nan, i kera wanger nan a kwase u nan ga, sha ci u nan hen ér kera ngu eren kwagh a nan sha mimi ga yô. Nana za a kwase u nan a za tile sha ishigh ki Yehova, pristi a er kwase la akaa a i tese ken tindi ne cii.
31 Or la nana lu a ibo ga, kpa kwase u nan yô nana due iyolishô sha kwaghbo u nan la ga.’”
Ngeren mba shin kpe
^ Shin “mba m tim tabernakel.”
^ Môm-ken-pue u efa yange a kuma ulita 2.2. Nenge Ngeren u Seer u B14 la.
^ Ikyav tese ér mba ôron ka kwagh u alegh a maren a mi.
^ Shin “a saa ishe.” Alaghga mba ôron ér nana kera mar ga.
^ Ikyav tese ér mba ôron ka kwagh u alegh a maren a mi.
^ Shin “a saa ishe.” Alaghga mba ôron ér nana kera mar ga.
^ Shin “I lu nahan! I lu nahan!”
^ Shin “sha er a lu anivur u a til sha ityough ki nagh kura jimin cii yô.”
^ Ikyav tese ér mba ôron ka kwagh u alegh a maren a mi.
^ Shin “aa saa ishe.” Alaghga mba ôron ér nana kera mar ga.
