Numeri 28:1-31
28 Yehova shi kaa a Mose ér:
2 “Ôr kwagh a Mbaiserael kaa ve wer, ‘Ver nen ishima sha er ne naan mo nagh agh yô, ka kwaghyan* wam je la. Naan nen mo nagh agh ku sha usu sha ci u ihyuma i dedoo,* sha ashighe a i gbe u ne naan la vough vough.’+
3 “Kaa a ve wer, ‘Ka nagh ku sha usu ku ne naan Yehova je ne: Hanma iyange yô, naan nen nagh ku nanden sha agumaiyôngo ahar, a a lu gbang gbang shi a lu inyom i môm i môm yô.+
4 U na nagh a gumiyôngo u môm pepe, gumiyôngo ugen la di u va na nagh a mi aikighe,+
5 a môm-ken-pue u efa* u mwem ma kengese, i nungwa mkurem ma olev u i kume un yô, ma kuman môm-ken-unyiin u hin* sha mi, i lu nagh ku sha samuyia.+
6 Ka nagh ku nanden ku a naan Yehova sha usu hanma shighe,+ ku yange i hii kwagh u ku sha Uwo u Senai, sha u ku lu ihyuma i dedoo* yô.
7 I naan ku vea nagh ku kwaghman ku kuman môm-ken-unyiin u hin ku i ne a ku imôngo la, sha hanma gumiyôngo.+ Gema ikyôhô la* haa hen icighanjiir la, i lu nagh ku kwaghman ku i ne Yehova yô.
8 Na gumiyôngo ugen la aikighe. Shi na nagh ku sha samuyia ku ashen u ne pepe la a nagh ku kwaghman sha mi, i lu nagh ku i ne Yehova sha usu sha ci u ihyuma i dedoo* yô.+
9 “‘Nahan kpa, sha Iyange i Memen yô,+ i na agumaiyôngo ahar a lun inyom i môm i môm a a lu a ihyogholough iyol ga yô, kua mwem ma kengese ma kuman uhar-ken-pue u efa ma i nongo mkurem sha mi yô, a lu nagh ku sha samuyia. I na ku vea nagh ku kwaghman ku i ne a ku imôngo la.
10 Ka nagh ku nanden ku sha Iyange i Memen ku a na u seer sha nagh ku nanden ku i ne hanma shighe man nagh ku kwaghman ku i ne vea ku imôngo la je la.+
11 “‘Sha mhii u hanma uwer* yô, ne naan Yehova nagh ku nanden sha agumabua ahar man nomiyôngo môm, kua agumaiyôngo ataankarahar a a kom inyom i môm i môm, a a lu a ihyogholough iyol ga yô.+
12 Sha hanma nombua yô, na nen nagh ku sha samuyia+ sha mwem ma kengese ma kuman uikyaren utar-ken-pue ma i nongo mkurem sha mi yô. Shi na nen mwem ma kengese ma kuman uikyaren uhar-ken-pue ma i nongo mkurem sha mi yô, sha nomiyôngo la,+ a lu nagh ku sha samuyia.
13 Shi hanma gumiyôngo yô, na nen un a nagh ku sha samuyia, sha mwem ma kengese ma kuman ikyaren i môm-ken-pue, ma i nongo mkurem sha mi yô, a lu nagh ku nanden ku i ne Yehova sha usu sha ci u ihyuma i dedoo*+ yô.
14 Shi iniav vev mbi kwaghman yô, i luun tiôn u hin u wain sha bua môm,+ man môm-ken-utar u hin sha nomiyôngo môm,+ man môm-ken-unyiin u hin sha gumiyôngo môm.+ Ka nagh ku nanden ku sha uwer ku a naan hanma uwer zan zan inyom a kar been je ne.
15 Shi na nen Yehova nagh ku isholibo sha anivo môm, u seer sha nagh ku nanden ku i ne hanma shighe la, kua nagh ku kwaghman ku ka i na a mi imôngo la.
16 “Ken uwer u hiihii, ayange a u 14 la, a lu Paseka u Yehova.+
17 A va luun ayange 15 ken uwer ne yô, a er iniongo. A ya beredi u i we kwa sha mi ga yô ayange ataankarahar.+
18 Sha iyange i hiihii la, a lu icighanmkohol. De eren nen ma tom u taver ga.
19 Shi na nen Yehova nagh ku nanden sha usu, sha agumabua ahar, man nomiyôngo môm man agumaiyôngo ataankarahar a a lu inyom i môm i môm yô. Na nen uzendenya mba ve lu a ihyogholough iyol ga yô.+
20 Na nen ve a iniav vev mbi sha samuyia imôngo, i lu mwem ma kengese ma i nongo mkurem sha mi yô,+ uikyaren utar-ken-pue sha nombua môm, man uikyaren uhar-ken-pue sha nomiyôngo môm.
21 Shi na nen ikyaren i môm-ken-pue sha hanma gumiyôngo ken agumaiyôngo a ataankarahar la seer seer,
22 kua anivo môm sha ci u nagh ku isholibo, sha er a na iwom sha ci wen yô.
23 Ne na akaa ne u seer sha nagh ku nanden ku pepe, ku ku lu nagh ku nanden ku i ne hanma shighe la.
24 Hanma iyange yô, ne naan akaa ne sha gbenda u i ne la vough vough, zan zan ayange ataankarahar, a lu kwaghyan,* a lu nagh ku i ne Yehova sha usu sha u i lu ihyuma i dedoo* yô. I naan akaa ne vea nagh ku nanden ku i ne hanma shighe la, kua nagh ku kwaghman ku ka i na a mi imôngo la.
25 Sha iyange i sha utaankaruhar la ne er icighanmkohol.+ De eren nen ma tom u taver ga.+
26 “‘Sha iyange i iyiav yenev mbi mbi hii vian,+ shighe u ne lu va nan Yehova nagh ku sha samuyia u he yô,+ er nen icighanmkohol sha iniongo yen i ulahadi.+ De eren nen ma tom u taver ga.+
27 Ne na Yehova nagh ku nanden sha ci u ihyuma i dedoo,* sha agumabua ahar man nomiyôngo môm, man agumaiyôngo ataankarahar a lun inyom i môm i môm,+
28 man gema nagh vev ku sha samuyia ku mwem ma kengese ma i nongo mkurem sha mi yô, a lu uikyaren utar-ken-pue sha hanma bua, man uikyaren uhar-ken-pue sha nomiyôngo môm la,
29 kua ikyaren i môm-ken-pue sha hanma gumiyôngo ken agumaiyôngo a ataankarahar la seer seer,
30 man anivo môm, sha er a na iwom sha ci wen yô.+
31 Ne na ve u seer sha iniav mbi nanden mbi i ne hanma shighe la, kua nagh ku sha samuyia ku i ne a mbi imôngo la. I lu ilev mbi mbi lu a ihyogholough iyol ga yô,+ a iniav vev mbi kwaghman imôngo.
Ngeren mba shin kpe
^ Shin “ihyuma i doon; ihyuma i kundun iyol.” Zwa Heberu, “ihyuma i nan mmem.”
^ Zwa Heberu, “beredi.”
^ Môm-ken-pue u efa yange a kuma ulita 2.2. Nenge Ngeren u Seer u B14 la.
^ Hin môm yange a kuma ulita 3.67. Nenge Ngeren u Seer u B14 la.
^ Shin “ihyuma i doon; ihyuma i kundun iyol.” Zwa Heberu, “ihyuma i nan mmem.”
^ Shin “msôrom mara.”
^ Shin “ihyuma i doon; ihyuma i kundun iyol.” Zwa Heberu, “ihyuma i nan mmem.”
^ Zwa Heberu, “uwer wen.”
^ Shin “ihyuma i doon; ihyuma i kundun iyol.” Zwa Heberu, “ihyuma i nan mmem.”
^ Zwa Heberu, “beredi.”
^ Shin “ihyuma i doon; ihyuma i kundun iyol.” Zwa Heberu, “ihyuma i nan mmem.”
^ Shin “ihyuma i doon; ihyuma i kundun iyol.” Zwa Heberu, “ihyuma i nan mmem.”
