Numeri 34:1-29
34 Tsô Yehova shi ôr kwagh a Mose kaa ér:
2 “Ôr kwagh a Mbaiserael kaa a ve wer: ‘Zum u ne nyôr ken tar u Kaanan yô,+ ka inya i ia lu i yen, a lu dyako wen je ne, ka tar u Kaanan sha akighir a u.+
3 “‘Ikighirtar yen i ken imbusutariyan ia hii hen taaikyôngo u Zin, hen kpe u Edom. Vegher u sha ityoughkitaregh u ikighirtar yen i ken imbusutariyan la di una hii hen Zegemnger u Bar* la.+
4 Ikighirtar yen ia goom a yem ape kôndon yemen Akrabim la+ vegher u ken imbusutariyan, zan zan a za ar hen Zin, ia kar a za due ken imbusutariyan i Kadeshi-barnea.+ Shi ia hide a due Hasar-adar,+ a kar a za ar Asemon.
5 Ikighirtar la ia goom hen Asemon, ia yem hen Uwagh* u Igipiti, ia za kure hen Zegemnger.*+
6 “‘Ikighirtar yen i shin ityôtar a lu Zegemnger u Vesen* kua kpe na. A lu ikighirtar yen i shin ityôtar je la.+
7 “‘Ikighirtar yen i ken imbusutarimese yô, a lu i je ne: Ne tôndo ikighirtar yen, hii hen Zegemnger u Vesen la zan zan a za ar hen Uwo u Hor.
8 Shi ne tôndo ikighirtar la, hii hen Uwo u Hor, zan zan a za nyôr Lebo-Hamati,*+ ikighirtar la ia kar a za kighir hen Sedadi.+
9 Ikighirtar la ia yem a due Seferon, maa ia za kighir hen Hasar-enan.+ A lu ikighirtar yen i ken imbusutarimese je la.
10 “‘Shi ne tôndo ikighirtar yen sha ityoughkitaregh, a hii hen Hasar-enan, zan zan a za nyôr Sefan.
11 Ikighirtar la ia kar hen Sefan zan zan a za nyôr Ribela, sha ityoughkitaregh ki Ain, shi ia sen a za per ape Zegemnger u Kinereti* a kuan a senen vegher u sha ityoughkitaregh la.+
12 Ikighirtar la ia kar a yem hen Yordan, ia za kighir hen Zegemnger u Bar la.+ A lu tar wen+ man akighir a a kase u je la.’”
13 Nahan Mose ôr kwagh a Mbaiserael, a kaa ér: “Ka tar u ne pav ker sha ishor ne kar a hingir kwagh wen,+ vough er Yehova a kaa ér i na uipyaven mba utaankarunyiin man tiôn la je ne.
14 Sha ci u ipyaven u Mbaruben sha ya u ter ve, man ipyaven u Mbagadi sha ya u ter ve, kua vegher-ipyaven u Manase yô, ve vande ngohol dyako ve kera.+
15 Uipyaven mba uhar man tiôn mbara vande ngohol dyako ve vegher u sha ityoughkitaregh hen haregh u Yordan, ikyua a Yeriko ape iyange i dugh la.”+
16 Yehova shi lam a Mose, a kaa ér:
17 “Ka ati a ior mba vea pav tar la vea kar ne ua lu dyako wen je ne: a lu pristi Eleasar+ kua Yoshua+ wan u Nun.
18 Shi ken hanma ipyaven yô, tsua nen orvesen môm. Vea kar ne tar la ua hingir dyako wen.+
19 Ka ati a ior mba shon je ne: ken ipyaven u Yuda yô,+ a lu Kalebu+ wan u Yefune;
20 ken ipyaven u ônov mba Shimion yô,+ a lu Shemuel wan u Amihudi;
21 Ken ipyaven u Benyamin yô,+ a lu Elidadi wan u Kiselon;
22 ken ipyaven u ônov mba Dan yô,+ a lu orvesen Buki, wan u Yogeli;
23 ken ônov mba Yosev+ mba ken ipyaven u ônov mba Manase yô,+ a lu orvesen Haniel, wan u Efodi;
24 ken ipyaven u ônov mba Eferaim yô,+ a lu orvesen Kemuel, wan u Shifetan;
25 ken ipyaven u ônov mba Sebulon yô,+ a lu orvesen Elisafan, wan u Parnaki;
26 ken ipyaven u ônov mba Isakar yô,+ a lu orvesen Paltiel, wan u Asan;
27 ken ipyaven u ônov mba Asher yô,+ a lu orvesen Ahihudi, wan u Selomi;
28 ken ipyaven u ônov mba Nafetali yô,+ a lu orvesen Pedahel, wan u Amihudi.”
29 Ka ior mba Yehova kaa ér ve pav inya ve kar Mbaiserael ken tar u Kaanan je la.+
