Numeri 19:1-22
-
Tulebua u nyian man mngerem ma wanger kwagh (1-22)
19 Yehova shi ôr kwagh a Mose man Aron, a kaa ér:
2 “Ka tindi u Yehova a we je ne, ‘Kaa Mbaiserael wer ve kôr tulebua u nyian u a lu gbang gbang, a lu a ihyogholough iyol ga,+ shi i lu a vande kangen un igbur ga yô, ve va na u.
3 Gema na nen pristi Eleasar, a due a mi ken akôngoafoogh, i za sôngo sha ishigh nagh.
4 Maa pristi Eleasar a er awambe a bua la sha ihôwe na, a mishi a kwa taankaruhar ken vegher u hunda u tenti u kohol ker la jighilii.+
5 Maa i nande tulebua la sha ashe a na, i nande ikyôvor nagh man inyam na man awambe a na kua ambi a na cii.+
6 Shi pristi la una tôô kon u sedar man hisop+ man ikyondo i nyian bong, una kende ken usu u i nande bua la a lu hian ker la.
7 Pristi la maa a kire akondo a na shi a ôô iyol, a been yô una hide ken afo; kpa pristi la una kera lu wang ga zan zan aikighe.
8 “‘Or u a nande tulebua la kpaa, a kire akondo a na sha mnger shi a ôô iyol sha mnger, una kera lu wang ga zan zan aikighe.
9 “‘Or u nan lu wang yô nana kura mtuhwem ma tulebua la,+ nana za haa ken akôngoafoogh hen ijiir i wang, nongoior u Iserael u ver mtuhwem mara sha er a nungwan sha mngerem ma wanger akaa a mi yô.+ Ka nagh ku isholibo.
10 Or u nan kor mtuhwem ma tulebua la nana kire akondo a nan, nana kera lu wang ga zan zan aikighe.
“‘Kwagh ne i lu tindi u tsan gbem hen Mbaiserael man or u van a va u nan tem her atô ve la.+
11 Or u nan bende a ikyom i or cii nana kera lu wang ga zan zan ayange ataankarahar.+
12 Or la nana wanger iyol i nan sha mngerem mara* sha iyange i sha utar la, nahan sha iyange i sha utaankaruhar la yô, nana hingir wang. Kpa aluer nan wanger iyol i nan sha iyange i sha utar la ga yô, sha iyange i sha utaankaruhar la kpa nana lu wang ga.
13 Hanma or u nan bende a ikyom i or man nan wanger iyol i nan ga cii yô, nan hôngor a tabernakel u Yehova,+ i wua or la* ken Iserael kera.+ Er i mishi nan mngerem ma wanger kwagh a mi la+ iyol ga yô, nan ngu wang ga her. Hôngor u nan la ngu sha a nan her.
14 “‘Ka tindi u a dondon sha kwagh u or u nan kpe ken tenti je ne: Hanma or u nan nyer ken tenti la, man hanma or u nan vande lun ken tenti la cii nana kera lu wang ga zan zan ayange ataankarahar.
15 Hanma ikyagh ki ki lu ivegher i cir kuur sha mi ga cii, kia kera lu wang ga.+
16 Hanma or u nan lu ken toho man nan bende a or u i woo sha sanker, shin ikyom i or shin akuhe a or shin ijiir i iin ior yô, nana kera lu wang ga ayange ataankarahar.+
17 I kese mtuhwem ma nagh ku isholibo ku i nande la sha ci u or u nan lu wang ga la, i haa mngerem ma kuan sha mtuhwem mara shin ikya.
18 Maa or u lun wang+ nana tôô hisop+ nana wa shin mngerem mara, nana dugh a mishi sha tenti la kua sha mkam mara cii, shi nana mishi sha ior mba yange ve lu her la, kua sha or u nan bende a akuhe shin nan bende a or u i woo nan shin nan bende a ikyom i or shin nan bende a ijiir i iin ior la kpaa.
19 Or u wang la nana mishi ma sha or u a lu wang ga la sha iyange i sha utar la kua sha iyange i sha utaankaruhar la, nana wanger isholibo i nan sha iyange i sha utaankaruhar la;+ maa or la nana kire akondo a nan shi nana ôô iyol sha mnger, nahan nana hingir wang aikighe.
20 “‘Kpa or u nan lu wang ga, man nan vende u wanger iyol i nan yô, i wua nan* ken nongo la kera kpee je,+ sha ci u nan hôngor a icighanjiir u Yehova. Í mishi nan mngerem ma wanger kwagh a mi la iyol ga, nahan nan ngu wang ga.
21 “‘Kwagh ne a lu ve tindi u tsan gbem: Or u nan lu mishin mngerem ma wanger kwagh a mi la+ nana kire akondo a nan, or u nan bende a mngerem ma wanger kwagh a mi la kpaa, nana kera lu wang ga zan zan aikighe.
22 Hanma kwagh u or u wang ga la nan bende a mi cii una kera lu wang ga, shi or u nan bende a kwagh shon kpaa nana kera lu wang ga zan zan aikighe.’”+
