Numeri 4:1-49
4 Tsô Yehova ôr kwagh a Mose man Aron, a kaa ér:
2 “I ôr iyenge i ônov mba Kohati+ ken ônov mba Levi, sha icombor ve man sha uya mba uter vev,
3 ka mba hii anyom 30+ zan zan kighir anyom 50,+ ken mba i ne ve u eren tom ken tenti u kohol ker la cii.+
4 “Ka tom u ônov mba Kohati vea eren ken tenti u kohol ker la je ne,+ ka icighankwagh tsung:
5 Zum u i lu moughon twev yô, Aron vea ônov nav ve nyôr ve va sagh ikyondo i yisan la,+ ve gema ve cir sha areki+ u Shiada la.
6 Vea cir kwaghcirin u sha akôv a ayu* sha mi, shi vea samber ikyondo i lun buluu-buluu* sha mi, shi vea wa igbough mbi tôôn un a mi la kpaa.+
7 “Shi vea samber ikyondo i buluu-buluu* sha tebul u beredi u sha ishi la,+ shi vea ver agbande man ukôôpu man utasa man ujôôgu mba nagh ku kwaghman sha mi;+ nagh ku i ne sha beredi hanma shighe la+ ku lu sha mi her.
8 Vea samber ikyondo i nyian bong sha a, shi vea cir kwagh u cirin u sha akôv a ayu* sha mi, shi vea wa igbough mbi tôôn un a mi kpaa.+
9 Maa vea tôô ikyondo i buluu-buluu* vea cir daarimenger+ u tsaren usu la, kua amenger a na+ man ugbegba nav* man agbande a na a usu,+ kua mkam ma haan mkurem ma tsaren amenger la cii.
10 Ve kange un a ikyav nav cii ken kwagh u cirin kwagh a mi u sha akôv a ayu,* ve gema ve penda sha kpande u tôôn kwagh a mi.
11 Ve samber ikyondo i buluu-buluu* sha atse a sha zanaria la,+ ve cir a sha kwagh u cirin kwagh a mi u sha akôv a ayu,* maa ve wa igbough mbi tôôn a a mi la kpaa.+
12 Maa ve tôô ikyav mbi tomov mbi ve eren tom a mi ken icighanjiir hanma shighe la cii,+ ve wa mbi ken ikyondo i buluu-buluu,* ve tôô kwagh u cirin kwagh a mi u sha akôv a ayu* ve cir sha mi, maa ve tôô ve ver sha kpande u tôôn kwagh a mi.
13 “Ve̱ dugh mtwem* ken atse a nanden nagh la,+ ve gema ve tôô ikyondo i sha mou u nyian dindee ve cir sha atse shon.
14 Ve tôô ikyav mbi i eren tom a mi sha atse la cii, ve penda sha a: ka agbande a usu man ufôôku man ushebul man atasa man ikyav mbi sha atse la cii je la;+ ve cir kwagh u cirin kwagh a mi u sha akôv a ayu* sha mi, shi ve wa igbough mbi tôôn a a mi la kpaa.+
15 “Aron man ônov nav ve cir icighanjiir la+ kua ikyav mbi ken icighanjiir la cii, sha shighe u moughon twev la. Vea been yô, ônov mba Kohati ve va nyôr ve tôô mbi,+ kpa ve de benden icighanjiir la ave ga, sha er vea kpe ga yô.+ Ka tom u ônov mba Kohati vea eren sha ci u icighanjiir la je la.
16 “Tom u Eleasar+ wan u pristi Aron yô, ka u nengen sha mkurem ma haan ken amenger tsaren,+ kua insensi u human doon+ man nagh ku sha samuyia ku i ne hanma shighe la, kua mkurem ma tseghan kwagh a mi mara.+ Una nengen sha tabernakel man hanma kwagh u a lu ker cii, kua sha icighanjiir man ikyav mbi ker kpaa.”
17 Yehova shi lam a Mose man Aron, a kaa ér:
18 “De den nen ipyaven u tsombor u Mbakohati+ a timin ken Mbalevi kera ga.
19 Kpa er nen kwagh ne sha ci ve, sha er vea lu uma her, vea kpe sha ci u ve za ikyua a uicighanmbaakaav yum ga yô.+ Aron man ônov nav ve nyôr ker ve za na hanma ve tom u nana er man kwagh u nana tôô yô.
20 Ve de nyer ker, ve gberen ashe sha uicighanmbaakaav kwa môm tsô kpaa ga, gayô vea kpe.”+
21 Tsô Yehova shi ôr kwagh a Mose kaa ér:
22 “I ôr iyenge i ônov mba Gershon,+ sha uya mba uter vev man sha icombor ve.
23 Nger ati a mba hii anyom 30 zan zan kighir anyom 50, ken mba i ne ve u eren tom ken tenti u kohol ker la cii.
24 Ka tom u i ne icombor i Mbagershon, man ikyav mbi vea tôôn je ne:+
25 Vea tôôn akondo a tenti a tabernakel,+ kua tenti u kohol ker man kwagh u cirin un a mi, kua kwaghcirin u sha akôv a ayu* u i cir sha ijime na la,+ kua ikyondo i yisan i sha hunda u tenti u kohol ker la,+
26 man akondo a i kase tembe a mi la,+ kua ikyondo i yisan i sha hunda u tembe+ u u kase tabernakel man atse la, man ikyor i tenti i sha mi a ikyav vev cii, man hanma kwagh u i eren tom a mi her cii. Ka tom ve je la.
27 Ka Aron vea ônov nav vea nengen sha tom man ikyav mbi Mbagershon+ vea tôôn la cii ye; na ve akaa ne cii i lu tom ve.
28 Ka tom u icombor i Mbagershon ia eren sha ci u tenti u kohol ker la je la,+ man or u nana nengen sha tom ve ne yô, ka Itamar+ wan u pristi Aron.
29 “Ônov mba Merari kpaa,+ nger ati a ve sha tsombor ve man sha ya u ter ve.
30 Nger ati a mba hii anyom 30 zan zan kighir anyom 50, ken mba i ne ve u eren tom u tenti u kohol ker la cii.
31 Ka akaa a vea tôôn,+ a lu tom ve sha ci u tenti u kohol ker la je ne: vea tôôn mtôm ma lun ipye+ ma tabernakel la, kua itilan na+ man mtôm nam+ kua agbur a na a lun a aan sha mi;+
32 man mtôm+ ma ma kase tembe la, kua agbur a ma a lun a aan,+ man amande a tenti a ma+ kua ikyor i tenti i ma kua ikyav mbi sha mi cii, man hanma tom u u gbe u zough a akaa ne cii. Tese nen ve ikyav mbi tomov mbi vea tôôn la sha ati ati.
33 Ka tom u icombor i ônov mba Merari+ vea eren ken tenti u kohol ker la je ne, Itamar wan u pristi Aron una nengen sha tom ve.”+
34 Tsô Mose man Aron man mbavesen+ mba nongoior la, nger ati a ônov mba Kohati+ sha icombor ve man sha ya u ter ve,
35 hii sha mba lun anyom 30 zan zan kighir sha mba lun anyom 50, mba ve lu ken mba i na ve u eren tom u tenti u kohol ker la.+
36 Iyenge i mba i nger ve ati sha icombor ve la cii, kohol lu 2,750.+
37 Ka mba i nger ve ati ken icombor i Mbakohati je la, ve mba ve eren tom ken tenti u kohol ker la cii. Mose man Aron nger ve ati er Yehova na zwa sha ikyev i Mose nahan.+
38 I nger ônov mba Gershon+ ati sha icombor ve man sha ya u ter ve,
39 hii sha mba lun anyom 30 zan zan kighir sha mba lun anyom 50, ken mba i na ve u eren tom ken tenti u kohol ker la cii.
40 Iyenge i mba i nger ve ati sha icombor ve man sha ya u ter ve la cii, kohol lu 2,630.+
41 Ka mba i nger ve ati ken icombor i ônov mba Gershon je la, ve mba ve lu eren tom ken tenti u kohol ker la cii. Mose man Aron ôr i nger ve ati er Yehova kaa nahan.+
42 I nger ônov mba Merari ati sha icombor ve man sha ya u ter ve,
43 hii sha mba lun anyom 30 zan zan kighir sha mba lun anyom 50, ken mba i na ve u eren tom ken tenti u kohol ker la cii.+
44 Iyenge i mba i nger ve ati ken a ve sha icombor ve cii, kohol lu 3,200.+
45 Ka mba i nger ve ati ken icombor i ônov mba Merari je la, ka ve mba Mose man Aron nger ve ati er Yehova kaa Mose nahan je la.+
46 Mose man Aron man mbavesen mba Iserael nger Mbalevi mban cii ati, sha icombor ve man sha uya mba uter vev;
47 lu mba hii anyom 30 zan zan kighir anyom 50, ve cii i na ve ityom i vea eren man ikyav mbi vea tôôn sha ci u tenti u kohol ker la yô.+
48 Iyenge i mba i nger ve ati la cii kohol lu 8,580.+
49 I nger ve ati er Yehova ôr sha ikyev i Mose nahan, hanma or sha tom u nana eren man ikyav mbi nana tôôn yô; i nger ve ati vough er Yehova kaa Mose nahan.
Ngeren mba shin kpe
^ Shin “kwer.”
^ Gayô lu annyam ugen u shin mnger u a bee a bee ayu yô.
^ Shin “kwer.”
^ Gayô lu annyam ugen u shin mnger u a bee a bee ayu yô.
^ Shin “akambe a na a dughun usu a mi.”
^ Shin “kwer.”
^ Gayô lu annyam ugen u shin mnger u a bee a bee ayu yô.
^ Shin “kwer.”
^ Gayô lu annyam ugen u shin mnger u a bee a bee ayu yô.
^ Gayô lu annyam ugen u shin mnger u a bee a bee ayu yô.
^ Shin “kwer.”
^ Shin “mtwem ma lun a ahôm.” Ka mtwem ma ahôm a iniav a nongo sha mi je la.
^ Gayô lu annyam ugen u shin mnger u a bee a bee ayu yô.
^ Gayô lu annyam ugen u shin mnger u a bee a bee ayu yô.
