Numeri 13:1-33
13 Tsô Yehova ôr kwagh a Mose kaa ér:
2 “Tindi ior ve za gba mker ken tar u Kaanan u m lu nan Mbaiserael la. Ken hanma ipyaven u uter vev yô, tsua or môm u nan lu orvesen+ ker yô,+ tindi nan.”
3 Nahan Mose tindi ve sha imo i Yehova, ve mough ken taaikyôngo u Paran+ ve yem. Ve cii ve lu mbavesen ken Mbaiserael.
4 Ka ati a ve je ne: ken ipyaven u Ruben yô, lu Shamua wan u Sakur;
5 ken ipyaven u Shimion yô, lu Shafati wan u Hori;
6 ken ipyaven u Yuda yô, lu Kalebu+ wan u Yefune;
7 ken ipyaven u Isakar yô, lu Igal wan u Yosev;
8 ken ipyaven u Eferaim yô, lu Hoshea+ wan u Nun;
9 ken ipyaven u Benyamin yô, lu Palti wan u Rafu;
10 ken ipyaven u Sebulon yô, lu Gadiel wan u Sodi;
11 ken ipyaven u Manase+ u ken ipyaven u Yosev+ yô, lu Gadi wan u Sushi;
12 ken ipyaven u Dan yô, lu Amiel wan u Gemali;
13 ken ipyaven u Asher yô, lu Setur wan u Mikael;
14 ken ipyaven u Nafetali yô, lu Nahebi wan u Vofeshi;
15 ken ipyaven u Gadi yô, lu Gehuel wan u Maki.
16 Ka ati a ior mba Mose tindi ér ve za nenge tar la mker je la. Mose gema na Hoshea wan u Nun iti ér Yoshua.*+
17 Zum u Mose lu tindin ve ér ve za nenge tar u Kaanan mker la, a kaa a ve ér: “Kôndo za nen hen Negebi, maa za kar kôndo za nen hen haregh u iwoogh la.+
18 Za nenge nen mlu u tar la,+ shi nenge nen aluer ior mba ve tem ken tar la vea lu ior mba taver ayol, shin mba taver ga, vea lu kpuaa shin vea ngee kpaa.
19 Shi nenge nen aluer tar la ua doo shin ua doo ga, man aluer i maa agar a ve tem ker la i kase shin i kase ga kpaa.
20 Shi nenge nen aluer tar la ka u doon iyiav* shin ka u doon iyiav ga,*+ man aluer ikyon ngi ker shin ngi ga kpaa. Taver nen ishima,+ hide nen a iyiav mbi ken tar la.” Shighe la gema lu shighe u atam a wain a hiihii.+
21 Tsô ve kôndo ve za nenge tar la mker, hii hen taaikyôngo u Zin+ zan zan za nyôr Rehobi,+ ikyua a Lebo-hamati.*+
22 Mba kôndon mba ze sha Negebi yô, ve za ar hen Heberon,+ ape Ahiman man Sheshai man Talmai+ ve lu la, ka Mbaanaki je la.+ Kwagh ka a er yô, yange i maa Heberon anyom kar ataankarahar cii ve i mase maan Soan u ken Igipiti la ye.
23 Mba va nyer hen Pev* u Esekol+ yô, ve gber gbaa u lu a sumegh ku wain sha mi yô, ve hambe un sha aga, iorov uhar tôô, shi ve va a atam a pomegraneti man a tur kpaa.+
24 Ve yila ijiir la iti ér Pev* u Esekol,*+ sha ci u sumegh ku Mbaiserael gber her la.
25 Ayange nga karen 40 yô,+ mba ve za u nengen tar la mker la za hide.
26 Nahan ve hide ve va hen Mose man Aron man nongoior u Iserael, ken taaikyôngo u Paran, hen Kadeshi.+ Ve hide a ibaver ve va ôr nongoior la cii, shi ve tese ve iyiav mbi ken tar la.
27 Ka kwagh u ve va ôr Mose je ne, ve kaa ér: “Se za ken tar u u tindi se ker la, man mimi je, ka tar u u mgbough a atumba man iyough yô,+ shi ka iyiav mbi ker je ne.+
28 Nahan kpa, ior mba ve tem ken tar la ka ior mba taver ayol, i maa agar a ve i kase shi a kehe kpaa. Shi se nenge a Mbaanaki kpa ker.+
29 Mbaamaleki+ tema ken tar u Negebi,+ Mbahiti man Mbayebushi+ man Mbaamor+ gema tema hen haregh u iwoogh, Mbakaanan+ di ve tema hen kpezegemnger+ man hen kpe u Yordan.”
30 Maa Kalebu gba nôngon ér asema a gba ior shimi, er ve tile sha ishigh ki Mose la, sha u kaan a ve ér: “Se kôndo nen fese, se fatyô u za ngohol u, sha ci u se fatyô u hemban ve kpee je.”+
31 Kpa ior mba ve za a na imôngo la gema kaa ér: “Se fatyô u kôndon za nôngon ityav a ior mbara ga, sha ci u ve taver iyol hemba se.”+
32 Ve zer ôron Mbaiserael ibaver i bo+ sha kwagh u tar u ve za u za nengen u mker la, kaan ér: “Tar u se za zende ker se nenge u mker la, ka tar u u timin ior mba ve tem ken u yô, shi ior mba se nenge a ve ker la cii, ve gba ikyôr* je zua ga.+
33 Shi se nenge a Akôraior* ker, ônov mba Anaki+ mba ken tsombor u Mbagbanakôr la, se lu hen a ve er ka mbaahungwa nahan, shi ve kpa kape ve nenge se je la.”
