Numeri 15:1-41
15 Yehova shi lam a Mose kaa ér:
2 “Lam a Mbaiserael kaa ve wer, ‘Zum u ne va nyôr ken tar u m lu nan ne mer tema nen ker la+
3 man ne naan Yehova nagh ku sha usu ken ibua yen shin ken iyôngo yen yô—aluer ka nagh ku nanden+ shin nagh ku i lu nan sha u kuren ma iceghzwa i vesen, shin aluer ka nagh ku or nan lu nan sha ishima i nan,+ shin nagh ku sha uiniongo enev mba sha ashighe ashighe,+ sha u i lu Yehova ihyuma i dedoo* kpaa+—
4 or u nan lu nan nagh ku shon la, nana na Yehova nagh ku sha samuyia kpaa, i̱ lu sha mwem ma kengese+ ma kuman môm-ken-pue u efa,* i nungwa mkurem sha mi ma ma kom môm-ken-unyiin u hin* yô.
5 Shi naan nen nagh ku kwaghman sha wain u kuman môm-ken-unyiin u hin, vea nagh ku nanden imôngo,+ gayô sha hanma nagh ku i ne sha nomiyôngo cii.
6 Man aluer ka nomiyôngo yô, naan nen nagh ku sha samuyia sha mwem ma kengese, ma kuman uikyaren uhar-ken-pue u efa, ma i nongo mkurem ma kuman môm-ken-utar u hin sha mi yô.
7 Shi naan nen nagh ku kwaghman sha wain u kuman môm-ken-utar u hin, a lu Yehova ihyuma i dedoo.*
8 “‘Kpa aluer u tsua nom ken ilev you, u na Yehova nagh ku nanden a mi,+ shin nagh ku kuren ma iceghzwa i vesen,+ shin nagh ku bem yô,+
9 na nagh ku sha nom u ken ilev you la a nagh ku sha samuyia imôngo,+ i lu mwem ma kengese ma kuman utar-ken-pue u ikyaren i efa, ma i nongo mkurem sha mi ma ma kom tiôn u hin yô.
10 Shi na nagh ku kwaghman sha wain+ u a kom tiôn u hin yô, i lu nagh ku i ne Yehova sha usu sha ci u ihyuma i dedoo* yô.
11 Kape a er a hanma nombua shin hanma nomiyôngo shin agumaiyôngo shin ikpev kpaa je la.
12 Er iyenge i kwagh u ne lu nan la i lu cii, ka kwagh u ne er a hanma na je la.
13 Kape hanma Oriserael u nan lu marnya cii nana naan nagh sha usu, sha u i lu Yehova ihyuma i dedoo* je la.
14 “‘Aluer or u van a va u nan lu hen atô wen, shin shiror u nan tse hen atô wen sha ikyov ikyov, nan ngu nan nagh sha usu sha u i lu Yehova ihyuma i dedoo* yô, nana̱ er vough er ne eren nahan.+
15 Ne mba ne lu nongoior ne, man or u van a va u nan tem her atô wen la cii, ka tindi shon môm ne kuran ye. Ka tindi u tsan gbem, sha ikyov yen cii. Or u van a va nana lu kwaghmôm a ven sha ishigh ki Yehova.+
16 Or u van a va u nan tem hen atô wen kua ne cii, ka tindi môm man kwaghwan môm ne dondon ye.’”
17 Yehova shi kaa a Mose ér:
18 “Lam a Mbaiserael kaa a ve wer, ‘Zum u ne za nyôr ken tar u m lu zan a ven ker la
19 man ne ya nyityô kwaghyan* u ken tar la yô,+ na nen Yehova iyua.
20 Tôô nen mwem* ken iyiav mbi ne hii sundan la,+ kaa nen beredi u vingir va na nen iyua a mi. Na nen er ka iyua i i tôô hen vande u gbidyen iyiav i ve a mi nahan.
21 Panden nen mwem ma geran ma ken iyiav mbi ne hii sundan la, va naan nen Yehova iyua a mi sha ikyov yen cii.
22 “‘Aluer ne nzughul kwagh, ne kera kura atindi a Yehova a kaa Mose ne cii ga yô,
23 ka hanma kwagh u Yehova yange kaa a Mose ér ne eren, hii sha iyange i Yehova wa ne tindi la zan zan sha ikyov ikyov je la,
24 man aluer yange i per un lu sha apera ga, shi nongoior la fa ga yô, nongoior la cii u va a gumbua môm u nagh ku nanden, sha er a lu Yehova ihyuma i dedoo* yô, a nagh nagh ku sha samuyia man nagh nagh ku kwaghman imôngo, er i vanden eren keke nahan,+ kua anivo môm sha ci u nagh ku isholibo.+
25 Pristi a na iwom sha ci u nongoior u Iserael cii, nahan a de ve isholibo ve,+ sha ci u yange ve er i lu sha apera ga, shi ve va a nagh ve va na Yehova nagh ku sha usu, shi ve va a nagh ku isholibo sha ishigh ki Yehova sha ci u kwagh u ve er sha apera ga la.
26 A de nongoior u Iserael cii kwaghbo ve la, kua or u van a va u nan tem her atô ve la kpaa, sha ci u nongoior la cii er kwagh la lu sha apera ga.
27 “‘Aluer or er isholibo abu yô, nana va a tuleivo u a hembe inyom i môm ga yô, sha ci u nagh ku isholibo.+
28 Pristi una na iwom sha ci u or u nan er kwaghbo la, sha ci u nan er isholibo abu sha ishigh ki Yehova, sha er a wam Aôndo sha isholibo i nan la, nahan una de nan i yô.+
29 Marnya u ken Mbaiserael man or u van a va u nan tem her atô ve la cii, ka tindi môm vea kuran sha kwagh u shighe u i er kwagh sha apera ga la ye.+
30 “‘Kpa or u nan er kwaghbo sha apera yô,+ a lu marnya shin or u van a va kpaa, nan ngu lahan iti i Yehova, i wua nan* kpee je.
31 Er or la nan laha kwaghôron u Yehova shi nan per tindi na yô, i wua nan kpee je.+ Kwaghbo u nan la una lu sha ityough ki nan.’”+
32 Zum u Mbaiserael lu ken taaikyôngo la, ve za kôr orgen lu taven ikyon sha Iyange i Memen.+
33 Tsô mba ve kohol un taven ikyon la, ve za a na hen Mose man Aron man hen nongoior la cii.
34 Ve wuhe un,+ sha ci u i lu a tese kwagh u a er a na jighilii ga.
35 Nahan Yehova kaa a Mose ér: “I wua or la kpee je,+ nongoior la cii u ta un awen ken akôngoafoogh.”+
36 Nahan nongoior la cii due a na ken akôngoafoogh, ve za ta un awen a kpe, vough er Yehova kaa Mose nahan.
37 Yehova shi ôr kwagh a Mose, a kaa ér:
38 “Lam a Mbaiserael kaa ve wer ve tumen ica* shin akur a akondo a ve, sha ikyov ve cii. Shi ve ta mou u buluu-buluu* sha akur a akondo a ve, a lu ica la sha.+
39 ‘Tume nen ica i sha akur a akondo a en ne, sha er ne nengen a i nahan ne umbur atindi a Yehova cii, shi ne kuran a yô.+ De dondon nen ishima yen shin ashe a en ga, sha er ne hingir u za civir mbaaôndo mbagen* ga yô.+
40 Kwagh ne una wase ne u umbur atindi a am cii shi kuran a, sha er ne lu uicighanmbaiorov hen Aôndo wen yô.+
41 Mo m ngu Yehova Aôndo wen, u yange m due a ven ken tar u Igipiti kera sha u me tese mer m ngu Aôndo wen la.+ Ka mo Yehova Aôndo wen.’”+
Ngeren mba shin kpe
^ Shin “ihyuma i doon; ihyuma i kundun iyol.” Zwa Heberu, “ihyuma i nan mmem.”
^ Môm-ken-pue u efa yange a kuma ulita 2.2. Nenge Ngeren u Seer u B14 la.
^ Hin môm yange a kuma ulita 3.67. Nenge Ngeren u Seer u B14 la.
^ Shin “ihyuma i doon; ihyuma i kundun iyol.” Zwa Heberu,“ihyuma i nan mmem.”
^ Shin “ihyuma i doon; ihyuma i kundun iyol.” Zwa Heberu, “ihyuma i nan mmem.”
^ Shin “ihyuma i doon; ihyuma i kundun iyol.” Zwa Heberu, “ihyuma i nan mmem.”
^ Shin “ihyuma i doon; ihyuma i kundun iyol.” Zwa Heberu, “ihyuma i nan mmem.”
^ Zwa Heberu, “beredi.”
^ Zwa Heberu, “samuyia u dorough.”
^ Shin “ihyuma i doon; ihyuma i kundun iyol.” Zwa Heberu, “ihyuma i nan mmem.”
^ Zwa Heberu, “i bee a nan hen ior mba nan kera.”
^ Shin “anzôr.”
^ Shin “mou u kwer.”
^ Shin “ne hingir u za eren idya i ken jijingi.”
