Numeri 21:1-35
21 Zum u tor u Aradi,+ Orkaanan u tema ken Negebi la ungwa ér Iserael ngu van sha gbenda u Atarim yô, a va ta num sha Iserael a kura mbagen a yem a mi uikyangen.
2 Nahan Iserael tsegha zwa a Yehova kaa ér: “Aluer u na ior mban sha ikyev yam yô, me tim agar a ve kpee je, a bunde ga.”
3 Nahan Yehova ungwa imo i Iserael, a na Mbakaanan sha ikyev ve, ve tim ve kua agar a ve cii. Sha nahan yô, ve ii ijiir la iti ér Horma.*+
4 Er ve mough hen Uwo u Hor,+ ve lu yemen gbenda u Zegemnger u Nyian sha er vea ningir tar u Edom la,+ ior mbara vôr a zende.
5 Nahan ior hingir ayôôso a Aôndo kua Mose,+ ve lu kaan ér: “Er nan ve yange ne due a vese ken tar u Igipiti kera ner se va kpe ken taaikyôngo? Kwaghyan ngu ga, mngerem kpa ma ga,+ shi due se ishima* a kwaghyan u injaa ga ne.”+
6 Nahan Yehova haa iyô i bo* hen atô u ior, i gba va nyiman ior, nahan Mbaiserael kpishi kpe.+
7 Tsô ior va hen Mose va kaa a na ér: “Se er isholibo, er se hingir ayôôso a Yehova kua we yô.+ Zamber a Yehova sha ci wase, sha er una bee a iyô ne her a vese kera yô.” Tsô Mose zamber sha ci u ior.+
8 Maa Yehova kaa a Mose ér: “Er eev mbu iyô i bo* hambe sha ityô. Nahan zum u iyô ia nyima or yô, nana kenger sha mi, sha er nana lu uma her yô.”
9 Tsô fese je, Mose er iyô i togula+ hambe sha ityô,+ nahan zum u iyô ia nyima or man nana kenger iyô i togula la yô, nan war.+
10 Tsô Mbaiserael mough za haa afo hen Oboti.+
11 Maa ve va mough hen Oboti ve za haa afo hen Iye-abarim,+ hen taaikyôngo u a ver ishigh ken Moabi, vegher u sha ityoughkitaregh la.
12 Ve va mough heela ve za haa afo hen Pev* u Seredi.+
13 Ve va mough heela ve za haa afo hen ningir u Arnon,+ u a lu hen taaikyôngo u a mough hen ikighir i tar u Mbaamor la, sha ci u Arnon ka ikighir i Moabi, ngu hen atô u Moabi man Mbaamor.
14 Ka nahan ve takeda u ityav mbi Yehova u er kwagh u “Vahebi u ken Sufa man upev mba* Arnon,
15 man mtingir* u upev mba ve* sen shin agar a Ar, ve za zough hen ikighirtar i Moabi la” ye.
16 Ve va mough heela ve yem hen Beer. Ka ijôr i Yehova yange ôr Mose kwagh u i kaa ér: “Kohol ior imôngo m na ve mngerem” la je ne.
17 Hen shighe la, Iserael wa icam ne nahan ér:
“Due a mngerem, we ijôr!—Wa* nen i icam!
18 Ijôr i mbahemenev time, i ashagbaior dugh,Sha gbough ku kurutya man sha igbough vev la.”
Maa ve mough hen taaikyôngo la ve yem hen Matana,
19 ve va mough hen Matana ve yem Nahaliel, shi ve mough Nahaliel ve yem Bamoti.+
20 Ve va mough hen Bamoti ve yem hen pev u lu hen haregh u Moabi,+ sha igyungu i Pisega,+ ape u tile ve u nenge shin Yeshimon*+ tseer tseer la.
21 Iserael maa tindi loho hen Shihon, tor u Mbaamor, a kaa ér:+
22 “De se kar hen tar wou. Se kaha se nyôr hen ma sule u uyia shin ma sule u wain ga. Shi se ma mngerem hen ijôr i môm kpaa ga. Se kar sha Gbenda u Tor zan zan se due hen tar wou kera.”+
23 Kpa Shihon lumun ér Iserael a kar hen tar na ga. Shihon gema kohol ior nav cii, due gba van ityav sha Iserael ken taaikyôngo, maa a va ar hen Yahashi, a gba nôngon ityav a Iserael.+
24 Kpa Iserael hemba un sha sanker,+ a ngohol tar na,+ hii hen Arnon+ je zan zan za kighir Yaboki,+ ikyua a Mbaamon, sha ci u Yaser+ ka ikighir i haregh u Mbaamon.+
25 Iserael ngohol agar ne cii, maa ve tema ken agar a Mbaamor cii,+ ken Heshebon man agar a a kase un la cii.
26 Sha ci u Heshebon lu gar u Shihon tor u Mbaamor, u yange nôngo num vea tor u Moabi, nahan ngohol tar na cii zan zan za ar hen Arnon la.
27 Ka nahan man i hii u ôron injakwagh i nahan or tar ne ye, ér:
“Va hen Heshebon.
I̱ maa gar u Shihon, a̱ tile her dông.
28 Gadia usu due ken Heshebon, nomborusu kpaa ken gar u Shihon.
U hia Ar u Moabi, mbavesen mba ajiir a taven a Arnon.
29 Kwagh a tser u, we Moabi! A tim ne kera, ne ior i Kemoshi!+
Ka a er ônov nav mba nomso ve hingir mba-azende-azende, ônov nav mba kasev kpaa, ve hingir mba Shihon tor u Mbaamor a yem a ve uikyangen yô.
30 Se ta nen num sha a ve;A tim Heshebon zan zan a za ar Dibon;+Se gema un a hingir ice zan zan i ar Nofa;Usu ua samber zan zan a nyôr Medeba.”+
31 Nahan Iserael tema hen tar u Mbaamor.
32 Mose maa tindi ior mbagen ér ve za nenge Yaser mker.+ Ve ngohol agar a a kase un la, shi ve zenda Mbaamor mba ve tema ker la kpaa.
33 Tsô ve kôr ve goom, ve gba kôndon sha Gbenda u Bashan la. Nahan Ogo+ tor u Bashan, due a ior nav cii, va u va nôngon ityav a ve hen Ederei.+
34 Yehova kaa a Mose ér: “De cie un ga,+ sha ci u me gema un kua ior nav man tar na cii me na sha ikyev you;+ u er a na vough er yange u er a Shihon tor u Mbaamor, u tema ken Heshebon la nahan.”+
35 Nahan ve wua un kua ônov nav man ior nav cii, zan zan or na môm war ga,+ ve ngohol tar na.+
