Numeri 24:1-25
24 Zum u Balam nenge er doo* Yehova u veren Iserael doo doo yô, a kera shi yem u za keren akombo a vihin ikyôr ga,+ kpa a gema ishigh a ver ken taaikyôngo.
2 Zum u Balam gema ashe nenge er Iserael haa afo sha uipyaven nav yô,+ jijingi u Aôndo maa sen sha a na.+
3 Maa a ôr injakwagh ne, a kaa ér:+
“Kwaghôron u Balam wan u Beor,Kwaghôron u or u i bugh nan ashe yô,
4 Kwaghôron u or u a lu ungwan mkaanem ma Aôndo,U a nenge mpase u sha mnenge u Uhembanagee Cii,U a yav inya, ashe na a lu ivegher la:+
5 Nenge utenti ou ve doo shawon, Yakob,Utabernakel ou kpaa, we Iserael!+
6 Ve lihe gôgônan er ka upev* nahan,+Er ishule i hen kpeifi nahan,Er ikyon i alou i Yehova a môôr nahan,Man er ikyon i sedar i hen kpemnger yô.
7 Mngerem ma shin ubokoti nav uhar ka ma zer nôndon,Shi vor na* kpaa i lôô u hen kpe u mngerem ma kpishim.+
Tor na+ kpaa una hemba Agagu,+Shi tartor na kpaa a kende a u sha.+
8 Aôndo ngu duen a na ken Igipiti;Ngu ve er ka akor a bua-toho nahan.
Una tim akuraior a a lu kighir un la,+Una ngegher ikyuhe ve, shi una hembe i avur avur sha avaan a na.
9 A naregh inya, a yav inya er ka begha nahan,Man ka an nana cihi a kpoghor un u a lu er ka begha nahan laa?
Mba ve ver u doo doo yô, vea lu a iveren,Kpa mba ve we u ifyan yô, ifyan a kôr ve.”+
10 Tsô ishima vihi Balaki a Balam tsung. Balaki maa kure ave sha igyer, gba kaan a Balam ér: “Ka ifyan yange m yila u mer va wa mbahyomov av ye,+ kpa u er nahan ga, u gema u na ve iveren ka acin atar je ne.
11 Nahan mough yem hen ya wou hegen je. Yange m wa ishima u nan we icivir kpishi,+ kpa nenge! Yehova bunde u icivir.”
12 Balam gema kaa a Balaki ér: “Yange m vande kaan a mba u tindi ve her a mo la mer,
13 ‘Aluer Balaki una nam ya na a azurufa man zanaria ker poo je kpa, me fatyô u gban eren kwagh môm a ishima yam tsô, hemban kwagh u Yehova a ôrom la ken inya ga, a lu u dedoo shin u bo kpaa, ka kwagh u Yehova a ôrom la tseegh me ôr ye’ gaa?+
14 Hegen ka u me hide me yem hen ior av. Va m ôr u kwagh u ior mban vea er a ior ou ken hemen* yô.”
15 Maa a ôr injakwagh ne a kaa ér:+
“Kwaghôron u Balam wan u Beor,Kwaghôron u or u i bugh nan ashe yô,+
16 Kwaghôron u or u a lu ungwan mkaanem ma Aôndo,U a fe kwagh u Uhemban Cii la,A nenge a mpase u Uhembanagee CiiZum u a yav inya, ashe na lu ivegher la:
17 Me nenge a na kpa a lu hegen ga;Me ta ashe me nenge a na, kpa a lu fele fele ne ga.
Ishan+ ia due ken Yakob,Tôgh+ kpaa kua mough ken Iserael.+
Una pav icul i Moabi kpee je+Kua igbôndo i ônov mba tswamev.
18 Edom una hingir kwagh u orgen,+Een, Seir+ una hingir kwagh u mbahyomov nav,+Zum u Iserael una lu tesen ishimataver na la.
19 Or a due ken Yakob nana hemba mbahyomov,+Nana tim hanma or u waren cii ken gar kera.”
20 Nengen a Amaleki yô, a za hemen u ôron injakwagh na, a kaa ér:
“Ka Amaleki yange lu u hiihii ken akuraior ye,+Kpa ken masejime yô, una tim.”+
21 Nengen a Mbakeni yô,+ a za hemen a injakwagh na, a kaa ér:
“Ijiir you i teman taver gbang gbang, ya wou kpa ngu ka sha vande.
22 Kpa or nana nande Kayin una hia kera.
Shighe shi kuma nena u Ashiria una yem a we uikyangenee?”
23 Shi a za hemen a injakwagh na, a kaa ér:
“Ikyaa er ve! Ka an nana war zum u Aôndo una er kwagh ne laa?
24 Utso vea mough hen kpemnger u Kitim+ vea va,Vea er Ashiria+ ican,Shi vea er Eber ican.
Kpa un kpa una tim vindi vindi.”
25 Tsô Balam+ mough hide yem hen ijiir na. Balaki kpaa kar yem kwagh na.
