Numeri 30:1-16
30 Tsô Mose ôr kwagh a mbahemenev+ mba uipyaven mba Iserael, a kaa ér: “Ka kwagh u Yehova a ôr je ne:
2 Aluer or tsegha zwa+ a Yehova, shin nan bum,+ nan tsegha zwa ér nana tswer iyol i nan kwagh yô, nana de geman zwa ga,+ nana er hanma kwagh u nan tsegh zwa ér nana er la.+
3 “Aluer kwase tsegha zwa a Yehova, shin nan er iceghzwa i tsweren iyol i nan kwagh, zum u nan lu gumkwase, nan lu hen ya u ter u nan her la
4 man ter u nan va ungwa kwagh u iceghzwa i nan, shin iceghzwa i tsweren iyol i nan* kwagh i nan er la, man ter u nan venda ga yô, uiceghzwa mba nan cii vea lu her, shi hanma iceghzwa i tsweren iyol i nan kwagh i nan er cii, kwagh a gema sha mi ga.
5 Kpa aluer ter u nan va ungwa er nan bum shin nan er iceghzwa i tsweren iyol i nan kwagh man a venda yô, iceghzwa la ia saa ishe. Yehova una de nan kwaghbo u nan sha ci u ter u nan yange nan.+
6 “Nahan kpa, aluer nan va er nom zum u nan er iceghzwa shin nan tende zwa gagher sha kwagh u nana er a iyol i nan la kera,
7 man nom u nan va ungwa kwagh sha mi kpa a venda kwagh u iceghzwa la sha iyange i a ongo kwagh sha mi la ga yô, iceghzwa i nan kua akaa a nan tsegh zwa ér nana tswer iyol i nan la cii, a lu her nahan.
8 Kpa aluer nom u nan venda a nan sha iyange i a ongo kwagh la, shi a yange iceghzwa shin ityendezwa i nan er gagher sha iyol i nan la yô,+ Yehova una de nan kwaghbo u nan.
9 “Kpa aluer kwasecôghol shin kwase u nan pav a nom u nan, nan er iceghzwa yô, hanma kwagh u nan tsegh zwa u eren cii una lu her nahan.
10 “Nahan kpa, aluer kwase er iceghzwa shin nan er iceghzwa i tsweren iyol i nan kwagh, shighe u nan lu hen ya u nom u nan la
11 man nom u nan ungwa kwagh sha mi kpa a huna ga shi a venda ga yô, uiceghzwa mba nan cii, shin iceghzwa i nan er u tsweren iyol i nan kwagh cii, ia lu her nahan.
12 Kpa aluer sha iyange i nom u nan a ongo kwagh sha mi la je, a venda nyityô iceghzwa i nan er la gbindigh gbindigh, shin kwagh u nan bum, nan tsegh zwa ér nana tswer la yô, a kera lu nahan ga.+ Nom u nan venda kwagh la, nahan Yehova una de nan kwaghbo.
13 Hide sha kwagh u iceghzwa shin nyityôkwagh i kwase nan bum ér nana nyume iyol i nan* cii yô, nom u nan nana fatyô u lumun a mi shin vendan.
14 Kpa aluer ayange kar kpa nom u nan venda ga yô, tese je ér a lumun a uiceghzwa mba nan, kua uiceghzwa mba nan er u tsweren iyol i nan akaa la cii. Er a vende sha iyange i a ongo kwagh sha mi la ga yô, a lumun a lumun a mi je.
15 Kpa aluer a ungwa kwagh sha mi shighe kar cii ve a va vende yô, una ya mtsaha sha ibo i kwase la.”+
16 Ka atindi a Yehova wa Mose sha kwagh u nom man kwase u nan, kua sha kwagh u ter man wan u nan u kwase u a lu hen ya vea nan* her la je la.
