Numeri 8:1-26
8 Yehova ôr kwagh a Mose kaa ér:
2 “Ôr kwagh a Aron kaa a na wer, ‘Shighe u u tsar amenger la yô, amenger a ataankarahar ne a ta iwanger hen ishigh ki daarimenger la.’”+
3 Tsô Aron er kwagh ne, a tsar amenger la sha er aa ta iwanger hen ishigh ki daarimenger la yô,+ vough er Yehova kaa Mose nahan.
4 Kape i er daarimenger la je ne: I var un a var sha zanaria. Hii shin itine na zan zan due sha uikparen nav cii i var a var.+ I er daarimenger la er Yehova tese Mose ken mpase nahan.+
5 Yehova shi ôr kwagh a Mose kaa ér:
6 “Tsua Mbalevi ken Iserael, wanger ve.+
7 Ka kwagh u u er sha u wanger ve je ne: Tôô mngerem ma wanger isholibo mishi ve iyol, shi ve tôô atsem ve hondo ice i i lu ve iyol cii, shi ve kire akondo a ve, nahan ve wanger ayol a ve.+
8 Maa ve̱ kôr gumbua,+ shi ve tôô mwem ma kengese ma i nongo mkurem sha mi, ma ma lu nagh ku sha samuyia+ ku i ne a mi imôngo la, we di gema kôr gumbua ugen sha ci u nagh ku isholibo.+
9 Va a Mbalevi hen ishigh ki tenti u kohol ker la, shi kohol nongoior u Iserael cii.+
10 U vaan a Mbalevi sha ishigh ki Yehova yô, Mbaiserael ve penda ave sha Mbalevi.+
11 Aron maa a gema Mbalevi a na* sha ishigh ki Yehova, i lu nagh ku cian+ ku ken Mbaiserael, nahan vea eren tom u Yehova.+
12 “Maa Mbalevi vea penda anomabua la ave sha ityo,+ a been yô, gema môm na nagh ku isholibo a mi, ugen la di na Yehova nagh ku nanden a mi, sha u nan iwom+ sha ci u Mbalevi.
13 Maa kaa Mbalevi ve tile sha ishigh ki Aron vea ônov nav, gema ve maa na* Yehova nagh ku cian a mi.
14 Pav Mbalevi ver kposo a Mbaiserael mbagenev, Mbalevi vea hingir mba av.+
15 A been yô, Mbalevi vea nyôr vea va er tom ken tenti u kohol ker la. Kape u wanger Mbalevi, u gema ve u na* nagh ku cian a mi je la.
16 Gadia ve ka mba i ne ve yô, i dugh ve ken Mbaiserael i nam. Me ngohol ve vea hingir mba av, sha ityough ki ônovmbaiundav* mba Mbaiserael cii.+
17 Gadia hanma waniunda ken Mbaiserael cii ka u wam, u orumace man u zendenya cii.+ Sha iyange i m wua hanma waniunda u ken tar u Igipiti la je, m tsegha ve sha ci wam.+
18 Me ngohol Mbalevi sha ityough ki ônovmbaiundav mba Mbaiserael cii.
19 Me dugh Mbalevi ken Mbaiserael, vea hingir mba i ne ve yô, me na Aron kua ônov nav, vea eren tom sha ci u Mbaiserael ken tenti u kohol ker la,+ shi vea naan iwom sha ci u Mbaiserael, sha er bouange una va ken Mbaiserael sha ci u ior i Iserael kporom ikyua a icighanjiir la yum ga yô.”+
20 Nahan Mose man Aron man nongo u Iserael cii, er kwagh ne a Mbalevi. Mbaiserael er a Mbalevi vough er Yehova kaa a Mose ér i er a ve nahan.
21 Nahan Mbalevi wanger ayol a ve shi ve kire akondo a ve,+ mba been yô, Aron tôô ve na* nagh ku cian a mi sha ishigh ki Yehova.+ Maa Aron na iwom sha ci ve, sha u wanger ve.+
22 Ka been cii yô, Mbalevi nyôr ken tenti u kohol ker la sha u za eren tom ve sha ishigh ki Aron man ônov nav. I er a Mbalevi vough er Yehova kaa a Mose ér i er a ve nahan.
23 Yehova maa ôr kwagh a Mose, a kaa ér:
24 “Kape kwagh u Mbalevi una lu je ne: Or u hii anyom 25 yem hemen cii, nana fatyô u nyôron nongo u mba eren tom hen tenti u kohol ker la.
25 Kpa nana nyôron anyom 50 yô, nana mem, nana kera lu ken nongo u mba eren tom la ga.
26 Nana fatyô u eren tom sha ci u anmgbianev mba nan mba ve lu eren ityom i hen tenti u kohol ker la, kpa nana de kera eren tom her ga. Ka kwagh u u er sha kwagh u Mbalevi man ityom ve je la.”+
Ngeren mba shin kpe
^ Zwa Heberu, “cia,” inja na yô, ka u kaan a ve ér ve yem ken hemen shi ve hide ken ijime je la.
^ Zwa Heberu, “cia,” inja na yô, ka u kaan a ve ér ve yem ken hemen shi ve hide ken ijime je la.
^ Zwa Heberu, “cia,” inja na yô, ka u kaan a ve ér ve yem ken hemen shi ve hide ken ijime je la.
^ Shin “ônovmbaiundav mba ve bugh sagh.”
^ Zwa Heberu, “cia,” inja na yô, ka u kaan a ve ér ve yem ken hemen shi ve hide ken ijime je la.
