Numeri 20:1-29
20 Ken uwer u hiihii la, nongoior u Iserael cii va nyôr hen taaikyôngo u Zin, maa ior haa afo hen Kadeshi.+ Lu her Miriam+ kpe shi i ii un ye.
2 Tsô ior zua a mngerem ga,+ nahan ve kohol ve mough ayôôso a Mose man Aron.
3 Ior mbara gba zôhôn a Mose+ kaan ér: “Guda yange ma se kpe zum u anmgbianev asev kpe sha ishigh ki Yehova la!
4 Er nan ne ve a ior mba Yehova ken taaikyôngo ne ner se kua ilev yasev se va kpe heenee?+
5 Er nan ne dugh a vese ken Igipiti kera, ne ve a vese hen bojiir nee?+ Ka ijiir i a fatyô u lôôn iyiav shin ikyon i tur shin ikyon i wain shin pomegraneti ga, shi mngerem ma man kpa ma heen ga.”+
6 Maa Mose vea Aron kar hen nongoior la sha, ve va hen hunda u tenti u kohol ker la, ve va yav ve cir ishigh inya, tsô iengem i Yehova ande hen a ve.+
7 Yehova maa kaa a Mose ér:
8 “Tôô gbough kura, yila nongoior la u kohol imôngo, we vea anngôu Aron lam nen a vande la sha ashe ve, sha er ua due a mngerem yô, er mngerem ma due ken vande la, na nongoior la kua uzendenya vev ve ma.”+
9 Tsô Mose tôô gbough kura sha ishigh ki Yehova,+ vough er a kaa a na nahan.
10 Maa Mose man Aron kohol nongoior la hen vande la, tsô a kaa a ve ér: “Kegh nen ato ne mba hemban ato mban! Ka u se due a mngerem ken vande ne se na ne zee?”+
11 Tsô Mose kende uwegh gbidye vande la kwa har a gbough nagh kura, maa mngerem due kpishi gba haan, nahan nongoior la gba man a uzendenya vev.+
12 Shighe karen yô, Yehova kaa a Mose man Aron ér: “Er ne kera nem jighjigh ga, shi ne tsegham sha ishigh ki ior i Iserael ga yô, ne nyôr a nongoior ne ken tar u m lu nan ve la ga.”+
13 Ka mngerem ma Meriba*+ je ne, ka heen Mbaiserael zôhô a Yehova, nahan a tsegha iyol na hen atô ve ye.
14 Maa Mose tindi ior ve mough hen Kadeshi, ve za hen tor u Edom, ve za kaa a na ér:+ “Ka kwagh u anngôu Iserael+ a kaa je ne, ‘U fa ican i se ye la tsembelee.
15 Uter asev yange ve yem ken Igipiti,+ se za tema ken Igipiti anyom imôngo,*+ Mbaigipiti gema er se kua uter asev ican.+
16 Ken masejime yô, se vaa a Yehova,+ nahan a ungwa se, a tindi ortyom+ na za due a vese ken Igipiti kera, hegen se mban hen Kadeshi, gar u a lu hen ikighirtar you heen ne.
17 Nahan wea lumun yô, de se kar hen tar wou. Se nyôr hen ma sule u uyia shin ma sule u wain ga, shi se ma mngerem ma hen ijôr i môm kpaa ga. Se kar sha Gbenda u Tor a u geman ken iyan shin ken imese ga zan zan se kar duen hen haregh wou kera.’”+
18 Nahan kpa, Edom kaa a na ér: “De karen hen ijiir yase ga. Aluer u kar yô, me due a sanker me va kohol we.”
19 Mbaiserael gema kaa a na ér: “Se mba karen ka sha igbudu, shi aluer se shin ilev yasev ma mngerem ou yô, se kimbi.+ Se ker kwagh ugen môm ga, ka u karen angahar di tseegh tsô.”+
20 Kpa shi a kaa ér: “De karen ga.”+ Maa Edom va u va tan ityav sha a na, a va a ior kpishi kua ikyumutya i ageegh.*
21 Edom venda ér Iserael a de karen hen ijiir na ga; nahan Iserael kar her a na kera.+
22 Tsô ior i Iserael, nongoior la cii, mough hen Kadeshi va ar hen uwo u Hor.+
23 Maa Yehova kaa a Mose man Aron hen uwo u Hor, sha ikighir i tar u Edom la ér:
24 “Ka u a ii Aron a ior nav imôngo.*+ Una nyôr ken tar u m lu nan Mbaiserael la ga, sha ci u ne uhar cii yange ne hembam ato sha kwagh u m ôr sha kwagh u mngerem ma Meriba la.+
25 Kua a Aron man wan na Eleasar, unde a ve sha uwo u Hor.
26 Er akondo a Aron,+ gema hua wan na Eleasar,+ ka heregh Aron una kpe ye.”*
27 Tsô Mose er vough er Yehova kaa nahan, ve unde sha uwo u Hor sha ashe a nongoior la cii.
28 Maa Mose er akondo a Aron la, gema hua wan na Eleasar. Tsô Aron kpe sha ityough ki uwoogh.+ Mose man Eleasar maa kar sha uwo la hungwa shin inya.
29 Nongoior la cii ngu nengen ér Aron kpe yô, ya u Iserael cii vaa ku u Aron ayange 30.+
