Numeri 16:1-50
16 Tsô Kora+ wan u Isehar,+ wan u Kohati,+ wan u Levi,+ mough vea Datan man Abiram, ônov mba Eliabi,+ man On wan u Pelete u ken ônov mba Ruben.+
2 Ve mough u hendan a Mose, ve vea Mbaiserael mbagenev 250, ve lu mbavesen mba nongoior la mba i tsua ve ken nongoior la yô, lu ior mba tagher tagher.
3 Nahan ve kohol ve gba hendan a+ Mose man Aron, ve kaa a ve ér: “Kuma se a ven hegen! Nongoior ne cii ka uicighanmbaiorov,+ ve cica cii, shi Yehova ngu her atô ve kpaa.+ Man er nan ve ne lu kenden a ayol a en sha er ne hemba ior mba Yehova nahana?”
4 Mose ongo nahan yô, fese je a gure a kuma ishigh inya.
5 Maa a kaa a Kora kua mba suen un mbara cii ér: “Kper pepe Yehova una tese or u nan lu or na,+ shi nan lu icighanor shi nana fatyô u kporom ikyua a na la,+ or u a tsough cii+ nana kporom ikyua a na.
6 Er nen kwagh ne, we Kora man mba ve lu suen we la cii,+ tôô nen agbande a usu,+
7 kper haa nen usu shimi, shi penda nen insensi sha mi sha ishigh ki Yehova, nahan or u Yehova a tsough la,+ ka nan nan lu icighanor ye. Ne ônov mba Levi,+ kwagh wen ne ngee yum!”
8 Mose maa kaa a Kora ér: “Kegh nen ase ato a mo, ne ônov mba Levi.
9 Er Aôndo u Iserael a pav ne ken nongoior u Iserael a ver kposo,+ shi a na ne ian i kporom her a na sha er ne va er tom ken tabernakel u Yehova, shi ne tile sha ishigh ki nongoior ne ne eren u tom+ nahan kpa, ka ne kwagh u cukuu?
10 Shi a kporom a we hen a na, we kua anmgbianev ou mba ve lu ônov mba Levi la cii, nahan tom u pristi kpa saa ne ngohol keng-nee?+
11 Sha nahan yô, we man ior ou mba ne kohol imôngo ne cii, ne mba hendan a Yehova. Man Aron yô ngu di nyi ve ne gbe ahon a naa?”+
12 Tsô Mose va tindi ér i za yila Datan man Abiram,+ ônov mba Eliabi, kpa ve kaa ér: “Se mba van ga!
13 Er u due a vese ken tar u u mgbough a atumba man iyough, sha u u va wua se ken taaikyôngo ne yô, ka u kwagh u kiriki ha?+ Shi hegen u soo u va yan tor* sha a vese kpaa zee?
14 U nyôr a vese ken tar u u mgbough a atumba man iyough ga,+ shi u na se dyako u sule man ikyon i wain kpaa ga. U soo u ongor ior mbara ashee? Yô se mba van ga!”
15 Nahan ishima vihi Mose tsung, tsô a kaa a Yehova ér: “De gem ashe hen nagh vev ku sha samuyia ga. M ngohol ve jaki i môm tsô kpaa ga, shi m er mô ve môm kwagh u vihin ga.”+
16 Maa Mose kaa a Kora ér: “Kper yô, we vea ior ou cii, va nen sha ishigh ki Yehova, we vea ve man Aron.
17 Hanma ve nana tôô gbande u nan u usu nana wa insensi shimi, shi hanma ve nana va a gbande u nan u usu la sha ishigh ki Yehova, ka agbande a usu 250 je la, ve kua we man Aron kpaa, hanma or a gbande u nan u usu.”
18 Nahan, hanma or tôô gbande u nan u usu, nan haa usu shimi shi nan penda insensi sha mi, nan va tile hen hunda u tenti u kohol ker la vea Mose man Aron.
19 Kora kohol ior nav imôngo sha u hendan a+ ve hen hunda u tenti u kohol ker la yô, iengem i Yehova ande hen nongoior la cii.+
20 Yehova maa kaa a Mose man Aron ér:
21 “Pav nen a annongo ne, sha er me tim un kera fese je yô.”+
22 Tsô ve gure ve kuma ishigh inya ve kaa ér: “Ku, Aôndo, we Aôndo u u ne hanma or uma ne,*+ u de wer isholibo i or môm tseegh i na u vihi ishima a nongoior ne ciili?”+
23 Yehova maa kaa a Mose ér:
24 “Lam a nongoior ne cii, kaa a ve wer, ‘Kar nen hen utenti mba Kora man Datan man Abiram kera!’”+
25 Mose maa mough za hen Datan man Abiram, mbatamen+ mba ken Iserael kpa za vea na.
26 A za kaa a ior ér: “Nea lumun yô, kar nen hen utenti mba aferaior ne kera, shi de benden nen kwagh ve môm ave ga, sha er a tim ne sha ci u isholibo ve la ga yô.”
27 Fese je maa ior kar hen hanma ijiir i ve lu hen utenti mba Kora man Datan man Abiram cii kera. Datan man Abiram maa due tile hen hunda u utenti vev a kasev vev man ônov vev mba nomso man mbayev vev mba kiriki.
28 Tsô Mose kaa ér: “Ka sha kwagh ne man ne fa er i lu Yehova a tindim ér m er akaa ne cii, m gbe eren a a ishima yam tsô ga ye:
29 Aluer ior mban kpe ka ku u sha gbaaôndo er ior cii ve kpen nahan, shi mtsaha ve kpa ngu er mtsaha u uumace mbagenev cii nahan yô, ka Yehova a tindim ga.+
30 Kpa aluer Yehova er kwagh ugen kposo a ve u kpilighyol, inya aver zwa mena ve kua hanma kwagh u ve lu a mi cii, ve yem shin Uwar* uma yô, ne fa dedoo er ior mban ve laha Yehova yô.”
31 Ôron mkaanem man been a bee nahan maa, inya pav ape ve tile la.+
32 Inya aver zwa mena ve kua mba hen uya vev, man ior mba Kora+ kua akaa a ve lu a mi cica cii.
33 Ve kua ior mba ve lu a mi cii ve yem shin Uwar* uma, inya hide cir ve, ve tim her atô u nongoior la kera.+
34 Mbaiserael mba ve kase her la cii mba ongo er ve lu ngoron yô, ve yevese, sha ci u ve lu kaan ér: “Se mba cian ser inya a va mena se!”
35 Usu maa due hen Yehova+ va hia nomso 250 mba ve lu nanden insensi la.+
36 Yehova maa kaa a Mose ér:
37 “Kaa Eleasar wan u pristi Aron, a kura agbande a usu la+ ken usu la kera, sha ci u nga uicighanmbaakaav je. Shi kaa un a tsenda usu la ica.
38 I tôô agbande a usu a ior mba ve kpe sha ci u isholibo ve la,* i cagh a hingir par par, i cir sha atse a nanden nagh la,+ sha ci u ve va a mi sha ishigh ki Yehova, nahan a hingir icighankwagh. A lu ikyav hen Mbaiserael cii.”+
39 Nahan pristi Eleasar tôô agbande a usu a sha togula, a ior mba i nande ve la ve va a mi la, a cagh a sha er a cir sha atse la yô,
40 vough er Yehova kaa un sha zwa u Mose nahan. Kwagh ne lu kwagh u umbur Mbaiserael cii ér or u i ne nan ian ga,* u nan lu wan u Aron ga cii yô, nana de kporom va nanden insensi sha ishigh ki Yehova ga,+ shi or môm nana de hingir er Kora man mba ve dondo un la nahan ga.+
41 Mba ker ken sev mbugen je maa, nongoior u Iserael cii hingir ayôôso a Mose man Aron,+ ve lu kaan ér: “Ka ne mba uhar mban je ne woo ior mba Yehova ye.”
42 Nongoior la ngu kohol imôngo sha u hendan a Mose man Aron yô, ve gema ashe vegher u tenti u kohol ker la, maa nenge! ibyeenegh kira cir un, tsô iengem i Yehova ande ken igbar.+
43 Mose man Aron mba ze hen ishigh ki tenti u kohol ker la yô,+
44 Yehova kaa a Mose ér:
45 “Kar nen her atô u nongoior ne kera, sha er me tim ve kera fese yô.”+ Tsô ve gure ve kuma ishigh inya.+
46 Mose maa kaa a Aron ér: “Tôô gbande u usu, dugh usu ken atse a nan nagh la+ haa shimi, penda insensi sha mi, za hen nongoior la fese za na iwom sha ci ve,+ sha ci u iyugh i Yehova mough. Bouange hii ve!”
47 Tsô Aron tôô un fese er Mose kaa nahan, a yevese a za nyôr hen atô u nongoior la, yô nenge! bouange la hii u van sha ior kera kpaa. Nahan a gema insensi a ver sha gbande u usu la, a gba nan iwom sha ci u ior.
48 A tile her atô u mbakpenev man mbaumav a lu her, maa bouange la va bee.
49 Dugh ior mba ve kpe sha kwagh u Kora la sha yô, mba ve kpe bouange la kuma iorov 14,700.
50 Hen shighe u Aron hide va kohol Mose hen hunda u tenti u kohol ker la nahan, bouange la bee.
Ngeren mba shin kpe
^ Shin “eren tahav.”
^ Zwa Heberu, “we Aôndo u jijingi u akaauma cii ne.”
^ Shin “Sheol,” ka uwar u uumace je la. Nenge Ngeren u Pasen Asember.
^ Shin “Sheol,” ka uwar u uumace je la. Nenge Ngeren u Pasen Asember.
^ Shin “ve er uuma vev isholibo la.”
^ Zwa Heberu, “or u ken inya.”
