Numeri 12:1-16
12 Tsô Miriam man Aron gba lamen sha Mose, sha ci u Kwasekushi u a vôso la, gadia a vôso kwase ken Kushi.+
2 Ve lu kaan ér: “Ka sha zwa u Mose tseegh Yehova a er kwagh yee? Se yô ôron kwagh sha zwa wase gaa?”+ Yehova gema lu ungwan.+
3 Mose yô, lu ishima legh legh* hemba hanma orgen+ u nan lu sha tar cii.
4 Her ave ave je Yehova ôr a Mose man Aron man Miriam ér: “Due nen ne utar cii, za nen hen tenti u kohol ker la.” Nahan ve utar cii ve due ve za her.
5 Maa Yehova sen ken ibyeenegh ki lun er ityôgh la,+ a va tile hen hunda u tenti la, maa a yila Aron man Miriam. Nahan ve uhar cii ve kporom.
6 Maa a kaa ér: “Ungwa nen ase mkaanem am man. Luun er profeti u Yehova ngu her a ven yô, ma m pasen iyol yam her a nan ken mpase u sha mnenge,+ shi ma m lamen a nan ken mnyam ma cien.+
7 Kpa wanakiriki wam Mose yô ka nahan ga! M wa un ya wam cii sha ikyev.*+
8 Ka m lam a na ishigh a ishigh,+ m lamen a na wang, ka sha anzaakaa ga, shi nengen a mluashe u Yehova. Man er nan ve ne cie u lamen sha wanakiriki wam Mose ga?”
9 Nahan ishima vihi Yehova a ve tsung, maa a kar her a ve kera.
10 Ibyeenegh kira kar sha tenti la kera, maa nenge! Miriam gba imande, kungu pung er ka senou nahan.+ Aron gem kenger Miriam yô, a nenge lu a imande iyol.+
11 Maa fese je Aron kaa a Mose ér: “M zamber we terem! Wea lumun yô, de kôron se kwar sha isholibo ne ga! Se er kwagh sha ibume je gande.
12 M zamber we, de den wer a lu er ka wan u i mar nan kpenegh, nan hii u hôôn nahan ga!”
13 Tsô Mose gba vaan a Yehova kaan ér: “Aye Aôndo, shi bee un angev mbun! M zamber we!”+
14 Yehova gema kaa a Mose ér: “Aluer ter na ta un azer sha ishi yô, una hee ayange ataankarahar ga zee? I due a na i za ver un kposo ken akôngoafoogh ayange ataankarahar,+ aa been yô, una hide a nyôr ker.”
15 Nahan i due a Miriam i za ver kposo ken akôngoafoogh ayange ataankarahar,+ ior kera hembe hen afo ga zan zan i kar hiden a Miriam ker.
16 Maa ior mough hen Haseroti+ gba za haan afo ken taaikyôngo u Paran.+
