Numeri 32:1-42
-
Ajiir a teman a sha ityoughkitaregh ki Yordan (1-42)
32 Ônov mba Ruben+ man ônov mba Gadi+ gema lu a ilev kpishi, man ve nenge yô, tar u Yaser+ man u Gileadi lu haregh u dedoo sha ci u ilev.
2 Nahan ônov mba Gadi man ônov mba Ruben va hen Mose kua hen pristi Eleasar man hen mbavesen mba nongoior la, ve va kaa ér:
3 “Ataroti man Dibon man Yaser man Nimra man Heshebon+ man Eleale man Sebam man Nebo+ man Behon,+
4 haregh u Yehova yange hemba un sha ishigh ki nongo u Iserael la,+ ka haregh u a doo sha ci u ilev yô, man mbayev ou gema mba a ilev kpishi.”+
5 Shi ve kaa ér: “Aluer doo u a vese yô, i lu haregh ne i na mbayev ou a hingir kwagh ve ye. De kaan wer se per Yordan yande la ga.”
6 Mose maa gema kaa a ônov mba Gadi man ônov mba Ruben ér: “Ka u anmgbianev enev ve yem ityav, ne di ne hide ne tema heene?
7 Er nan ve ne lu nan ner iyol i kpe ior i Iserael, ve de peren nyôron ken tar u i gbe keng u Yehova una na ve la ga?
8 Ka kwagh u uter enev yange ve er zum u m tindi ve mer ve mough hen Kadeshi-barnea ve va nenge tar ne je la.+
9 Zum u ve za nyôr hen Pev* u Esekol,+ ve nenge a tar la yô, ve na iyol kpe ior i Iserael u nyôron ken tar u gba u Yehova una na ve la.+
10 Tsô ishima vihi Yehova sha iyange la tsung, nahan a bum ér:+
11 ‘Mba yange ve due ken Igipiti, mba hii anyom 20 yem hemen cii, vea nenge a tar+ u m bum mer me na Aberaham man Isaka man Yakob la ga,+ sha ci u ve dondom a ishima ve i môm ga—
12 saa Kalebu+ wan u Yefune, Orkenishi, kua Yoshua+ wan u Nun tseegh, sha ci u ve dondo Yehova a ishima ve i môm.’+
13 Nahan ishima vihi Yehova a Iserael, a er ve ve zende ken taaikyôngo wue wue anyom 40,+ zan zan kov u u lu eren ifer sha ishigh ki Yehova la kar kpen been.+
14 Hegen ne kar ne tile sha ityough ki uter enev, ne mba ikpela-uôn ve i eren asorabo, ne na ishima i i vihi Yehova a Iserael tsung la ngi seer a seer.
15 Aluer ne de u dondon un yô, shi una undu ior mban ken taaikyôngo, nahan ne va a mtim sha ior mban cii.”
16 Shighe kar yô, ve va hen a na ve va kaa ér: “De se maa atôr sha awen heen sha ci u ilev yasev man agar sha ci u ônov asev.
17 Kpa se yô, se wa iyol i utya,+ se lu zan Mbaiserael sha hemen, zan zan se kar nyôron a ve hen ijiir ve, mbayev asev vea gema a tema ken agar a i maa a i kase yô, sha er ior mba ken tar ne vea er ve kwagh ga yô.
18 Se hide hen uya asev ga zan zan hanma Oriserael nana ngohol inya a hingir dyako u nan.+
19 Gadia ka u se ngohol dyako a ve imôngo ken vegher u Yordan yande la ga, sha ci u se vande ngohol dyako wase ken vegher u Yordan u sha ityoughkitaregh ne.”+
20 Mose gema kaa a ve ér: “Aluer ne tôô ikyav mbi utyaav sha ishigh ki Yehova ne za ityav,+
21 man aluer hanmô wen nan tôô ikyav mbi utyaav nan per Yordan sha ishigh ki Yehova er a lu zendan mbahyomov nav sha ishigh nagh kera la+
22 zan zan i ngohol tar la cii sha ishigh ki Yehova yô,+ ne hide+ a ishô iyol sha ishigh ki Yehova man Iserael, nahan tar ne ua hingir dyako wen sha ishigh ki Yehova.+
23 Kpa aluer ne er nahan ga yô, ne er Yehova isholibo je ve. Nahan fa nen ner, isholibo yen ia zaan a ven ityô.
24 Nahan yô, maa nen agar sha ci u ônov enev, man atôr a uile sha ci u ilev yenev,+ kpa a gba u ne er kwagh u ne tende zwa la kpee.”
25 Ônov mba Gadi kua ônov mba Ruben gema kaa a Mose ér: “Mbayev ou vea er vough er terem a kaa nahan.
26 Ônov asev man kasev asev man ilev yasev kua uzendenya asev cii, vea lu ken agar a Gileadi keela,+
27 kpa mbayev ou vea per yande la, hanma or a wa iyol u za nôngon ityav sha ishigh ki Yehova,+ vough er terem a kaa nahan.”
28 Nahan Mose ôr pristi Eleasar kua Yoshua wan u Nun man mbayaav mba uipyaven mba Iserael kwagh ve.
29 Mose kaa a ve ér: “Aluer ônov mba Gadi man ônov mba Ruben per yande Yordan la a ven, hanmô ve nan wa iyol i utya sha ishigh ki Yehova man ne za ngohol tar la yô, ne na ve tar u Gileadi a lu u ve.+
30 Kpa aluer ve tôô ikyav mbi utyaav ve per yande la a ven ga yô vea tema a ven imôngo ken tar u Kaanan.”
31 Tsô ônov mba Gadi kua ônov mba Ruben kaa ér: “Ka kwagh u Yehova a ôr a mbayev ou la se er ye.
32 Se tôô ikyav mbi utyaav se per sha ishigh ki Yehova, se za ken tar u Kaanan,+ kpa dyako u i lu u se ya yô, a lu Yordan yande ne.”
33 Tsô Mose gema tartor u Shihon+ tor u Mbaamor, kua tartor u Ogo+ tor u Bashan a na ônov mba Gadi kua ônov mba Ruben+ man vegher-ipyaven u Manase+ wan u Yosev, a na ve inya i agar a hen uharegh mbara, kua agar a a dondo la cii.
34 Nahan ônov mba Gadi maa* Dibon+ man Ataroti+ man Oraroer,+
35 man Ataroti-sofan man Yaser+ man Yogbeha,+
36 man Bete-nimra+ kua Bete-haran,+ agar a i maa a i kase yô, shi ve maa atôr a uile sha awen sha ci u ilev vev.
37 Ônov mba Ruben di maa Heshebon+ man Eleale+ man Kiriataim,+
38 man Nebo+ man Baal-meon+ (i hide i ii agar ne ati agen) kua Shibema; maa ve gba iin agar a ve hide ve maa la ati agen.
39 Ônov mba Makir+ wan u Manase za ta ityav sha Gileadi ngohol un shi ve zenda Mbaamor mba ve tema ker la.
40 Nahan Mose gema Gileadi na Makir wan u Manase, a tema ker.+
41 Yair wan u Manase kpa za ta ityav sha ve ngohol agar a ve a kiriki, maa a ii a ati ér Havoti-yair.*+
42 Noba di za ta ityav sha Kenati ngohol un kua agar a a kase un la, maa a gema yilan un sha iti na ér Noba.
