Numeri 6:1-27
6 Yehova shi ôr kwagh a Mose kaa ér:
2 “Lam a Mbaiserael, kaa ve wer, ‘Aluer nomsoor shin kwase nan er iceghzwa i lun Ornasari*+ u Yehova yô,
3 nana nyagh wain man hanma ikyôhô igen cii. Nana de me viniger u i er sha wain shin viniger u i er sha nyityô ikyôhô igen kpaa ga.+ Nana de me ma zarkwagh u i er sha atam a wain ga, shi nana de ye atam a wain ga, a lu a ndor shin a uman kpaa.
4 Sha ayange a nan lu Ornasari la cii, nana de ye ma kwagh môm u i zough a mi sha itine i wain ga, hii sha atam a na a kô zan zan due sha apusu a na.
5 “‘Sha ayange a nan lu ken iceghzwa i nan i Ornasari la cii, i de ze nan atsem sha ityo ga.+ Nana za hemen u lun icighanor sha u den ityough ki nan ér ki ume zan zan ayange a i pav nan i ver kposo sha ci u Yehova la a kar been.
6 Nana de mgbôghom* a orkpen ga, sha ayange a i pav nan kposo sha ci u Yehova la cii.
7 Aluer ter u nan shin ngô u nan shin anmgbian u nan u nomso shin anmgbian u nan u kwase una kpe je kpaa, nana de hôngor iyol i nan ga,+ sha ci u ikyav i tesen ér nan ngu Ornasari u Aôndo u nan ngi sha ityough ki nan.
8 “‘Nan ngu Yehova icighanor sha ayange a nan lu Ornasari la cii.
9 Kpa aluer or va tôndo kpe kpoo ikyua a nan,+ nahan nan hôngor a ice i i lu ikyav i tesen ér i pav nan kposo sha ci u Aôndo la yô,* nana hondo ityough ki nan+ sha iyange i nan ve u va wanger iyol i nan la. Nana hondo ki sha iyange i sha utaankaruhar la.
10 Sha iyange i sha anigheni la yô, nana va a mbaatii uhar, shin mkungum ma kiriki mhar, hen pristi hen hunda u tenti u kohol ker la.
11 Pristi a gema u môm a na nagh ku isholibo a mi, ugen la di a na nagh ku nanden a mi. Nahan a na iwom sha ci u nan, sha ci u isholibo i nan+ er sha kwagh u orkpen la. Maa nana tsegha ityough ki nan sha iyange la.
12 Nahan shi nana hide nana pav iyol i nan nana ver kposo sha ci u Yehova, sha ayange a nan vande kaan ér nana lu Ornasari la. Nana va a gumiyôngo u a hembe inyom i môm ga yô, sha ci u nagh ku iboogh. Nahan kpa, a kera wa ayange a yange nan vande lun Ornasari la ker ga, sha ci u nan hôngor iyol i nan shighe u yange nan lu Ornasari la.
13 “‘Gema ka tindi u sha kwagh u Ornasari je ne: Zum u nan bee ayange a nan a Ornasari la yô,+ i va a nan hen hunda u tenti u kohol ker la.
14 Ka her nana va na Yehova nagh ku nan ye: i lu gumiyôngo u lun a ihyogholough iyol ga u a hembe inyom i môm ga yô, sha ci u nagh ku nanden,+ man tuleiyôngo u lun a ihyogholough iyol ga, u a hembe inyom i môm ga yô, sha ci u nagh ku isholibo,+ man nomiyôngo u lun a ihyogholough iyol ga, sha ci u nagh ku bem,+
15 man ikyese i ikpenberedi i vingir, i i kaa sha mwem ma kengese, i we kwa sha mi ga, i nongo mkurem sha mi yô, man uberedi mba par par mba i we kwa sha mi ga, i shighe mkurem sha mi yô, kua nagh vev ku sha samuyia+ man iniav vev mbi kwaghman.+
16 Pristi a va a akaa ne sha ishigh ki Yehova, a va na nagh ku nan ku isholibo kua nagh ku nan ku nanden.
17 Pristi a gema nomiyôngo la a na Yehova nagh ku bem a mi, a ikyese i ikpenberedi i i we kwa sha mi ga la imôngo, shi pristi a na nagh ku sha samuyia ku sha mi kura,+ kua nagh ku kwaghman ku sha mi kura kpaa.
18 “‘Ornasari la maa nana hondo ityough ki nan tsegha la,*+ hen hunda u tenti u kohol ker la, nana gema ice i yange nan tsegha shighe u nan lu Ornasari la, nana haa ken usu u i nande nagh ku bem sha mi la.
19 Pristi a dugh kpaakpawe u nomiyôngo u i jiidi la,+ shi a dugh kpenberedi u vingir u i we kwa sha mi ga yô shin ikyese la, kua beredi u par par môm, a gema a penda Ornasari la sha ave, er nan hondo ikyav i nan i Ornasari kera la.
20 Pristi a cia ve keen man keen, i lu nagh ku cian sha ishigh ki Yehova.+ Ka icighankwagh u pristi, kua gugu u nagh ku cian kura man namegh ku i er iyua a mi la.+ A been yô, Ornasari la nana fatyô u man wain.
21 “‘Ka tindi u sha kwagh u Ornasari+ u nan er iceghzwa je ne: Aluer nan tsegha zwa man nan ngu a kwagh u nana na Yehova a hemba kwagh u i tese ér Ornasari nana na la yô, nana kure iceghzwa i nan la kpee, sha u tesen ér nan wa tindi u Ornasari la ikyo.’”
22 Yehova maa kaa a Mose ér:
23 “Kaa Aron man ônov nav wer, ‘Ka gbenda u ne veren ior i Iserael doo doo je ne.+ Kaan nen a ve ner:
24 “Yehova a ver u doo doo+ shi a kura u.
25 Yehova a saan ishigh sha a we,*+ shi a er a we doo doo.
26 Yehova a gema ishigh nagh her a we, shi a na u bem.”’+
27 Ve veren Mbaiserael doo doo ken iti yam,+ sha er me haan ve iveren yô.”+
Ngeren mba shin kpe
^ Zwa Heberu, “nasir,” inja na yô ér, “Or u I Tsough Nan; Or u I Tsegha Nan; Or u I Pav Nan I Ver Kposo.”
^ Shin “Nana de ze ikyua.”
^ Shin “nan hôngor a ityough ki nan ki Ornasari la yô.”
^ Shin “ityough ki nan ki Ornasari la.”
^ Zwa Heberu, “a er ishigh nagh ki wanger sha a we.”
