Numeri 17:1-13
-
Gbough ku Aron kpar, lu ikyav (1-13)
17 Yehova maa kaa a Mose ér:
2 “Lam a Mbaiserael, nahan hen hanma ya u ter yô, ngohol gbough môm hen orvesen u her.+ Kohol cii, i lu igbough 12. Nger iti i hanma or sha gbough ku nan.
3 Nger iti i Aron sha gbough ku Levi la, sha ci u hanma orvesen u hen ya u ter nana lu a gbough môm.
4 Ver igbough mbira ken tenti u kohol ker la, sha ishigh ki Shiada+ ape m anden hen a we hanma shighe la.+
5 Gbough ku or u m tsough la+ kua kpar, nahan me bee a ahon a Mbaiserael ve lu gban a mo,+ kua ahon a ve lu gban a ven kpaa la.”+
6 Nahan Mose lam a Mbaiserael, tsô mbavesen mbara cii na un igbough—gbough môm sha hanma orvesen u hen ya u ter, ka igbough 12 je la—gbough ku Aron kpa lu ken igbough vev mbin.
7 Maa Mose gema igbough mbin ver hen ishigh ki Yehova, ken tenti u Shiada la.
8 Kpernan Mose za nyer ken tenti u Shiada la yô, nenge! gbough ku Aron u hen ya u Levi la kpar; ku kpar, ku mondo, shi ku ume atam a amondi a vian.
9 Mose maa tôô igbough mbira sha ishigh ki Yehova due a mi, va a mi hen Mbaiserael cii. Ve nenge a mbi, shi hanma or tôô gbough ku nan.
10 Yehova maa kaa a Mose ér: “Hide a gbough ku Aron kura+ za ver sha ishigh ki Shiada her, i ver ku her ku lu ônov mba ihyembeato+ mban ikyav,+ sha er vea de u gban ahon a mo, man sha er vea kpe ga yô.”
11 Fese je maa Mose er vough er Yehova kaa un nahan. A er nahan vough.
12 Mbaiserael maa gba kaan a Mose ér: “Ka u se kpe, timin yase kpee je, se cii se mba timin!
13 Aluer ma or kporom a kporom a tabernakel u Yehova tseegh kpa nana kpe!+ Kape se gbaa kpen nee?”+
