Numeri 35:1-34
35 Yehova shi lam a Mose hen taaikyôngo u Moabi, hen Yordan,+ ikyua a Yeriko, a kaa ér:
2 “Kaa Mbaiserael wer, ve dugh agar ken dyako u vea ngohol la ve na Mbalevi ve tema ker,+ shi ve na Mbalevi ajiir a ilev yan toho a a lu ikyua a agar shon la.+
3 Vea tema ken agar la, ajiir a ilev yan toho la di aa lu sha ci u ilev vev, man ikyav vev kua uzendenya vev mbagen cii.
4 Ajiir a ilev yan toho aa ugar mba ne na Mbalevi la yô, igbanger i a, hii hen kpekpe u gar yem ken toho, a lu aseva 1,000.*
5 Kar nen inya ken won u gar la aseva 2,000 vegher u sha ityoughkitaregh, aseva 2,000 vegher u ken imbusutariyan, aseva 2,000 vegher u shin ityôtar man aseva 2,000 vegher u ken imbusutarimese, gar la a gema a lu hen atô. A lu ajiir a ilev yan toho a ugar mbara je la.
6 “Agar a ne na Mbalevi la, a lu agar 6 a yeren ker,+ a ne na sha ci u or u nan woo or nana yevese a yem ker yô,+ kua agar agen 42.
7 Agar a ne na Mbalevi cii yô, a kohol a lu 48, kua ajiir a a, a ilev yan toho.+
8 A lu ken dyako u i ne Mbaiserael la ne dugh agar ne na ve ye.+ Nongo u u ngee yô ne dugh ker kpishi, nongo u u ngee ga yô shi ne dugh ker kpuaa.+ Hanma nongo ua pande agar ua na Mbalevi, sha indi i dyako u u zough a mi la.”
9 Yehova shi ôr kwagh a Mose, a kaa ér:
10 “Ôr kwagh a Mbaiserael kaa ve wer, ‘Ne mba peren Yordan ne nyôr ken tar u Kaanan.+
11 Tsua nen agar a a doo ne yô, ver nen a lu agar a yeren ker, ape orwuanor u nan woo or* a ishima i nan ga la nana yevese a yem ker yô.+
12 Agar la aa lu ne agar a yeren or u oron iyev i awambe,+ sha er orwuanor la una kpe ga zan zan a kar ôron un ijir sha ishigh ki mkohol la yô.+
13 Ka kwagh u ne eren a agar a ataratar a yeren ker la je la.
14 Ne tsua agar atar ne ver yande Yordan ne,+ shi ne tsua agar atar agenegh ken tar u Kaanan,+ aa lu agar a yeren ker.
15 Agar a ataratar la aa lu ijiir i yeren sha ci u Mbaiserael man shiror+ kua or u nan tem her atô ve la, sha er hanma or u nan woo or* a ishima i nan ga cii, nana fatyô u yevese yemen her yô.+
16 “‘Kpa aluer ka iyôgh nan gbidi or a mi man or shon nan kpe yô, nan ngu orwuanor, i wua or u a woo or la kpee je, i de bundu ga.+
17 Shi aluer ka iwen i ia fatyô u wuan or nan te or, man or la nan kpe yô, nan ngu orwuanor, i wua or u a woo or la kpee je, i de bundu ga.
18 Man aluer ka kwagh u i er sha kon u una fatyô u wuan or nan gbidi or a mi man or la nan kpe yô, nan ngu orwuanor, i wua or u a woo or la kpee je, i de bundu ga.
19 “‘Ka or u oron iyev i awambe la una wua or u a woo or la ye. Shighe u a zough a na yô, a wua un iyol na.
20 Aluer a vande kôron or la ihyom man a daa un, nahan a kpe, shin a ker un kwagh a awashima u bo,*+
21 shin a ta un iju sha ci u a kôr un ihyom man a kpe yô, i wua or u a er un kwagh la kpee je, ka orwuanor. Or u oron iyev i awambe la a wua or u a woo or la, zum u a zough a na yô.
22 “‘Kpa aluer a daa un ka sha apera ga, shi ka sha ci u a vande kôron un ihyom ga, shin ka sha awashima u bo* a ker un kwagh la ga,+
23 shin aluer a nenge a na ga man a ker iwen za ta un, man a vande kôron un ihyom ga, shi ngu vanden keren u bulan un ga, man a kpe yô,
24 nongoior la u ôr ijir her atô u or u a te or kwagh la a or u oron iyev i awambe la, er ajiraôron ne a tese nahan.+
25 Nongoior la u yima or u a woo or la sha ikyev i or u oron iyev i awambe la, maa u hide a na ken gar na u yeren ker u a yevese a yem ker la. A̱ tema ker zan zan zegepristi u i shigh un icighanmkure la una kar kpen.+
26 “‘Kpa aluer or u a woo or la due hen ikighir i gar u yeren ker u a yevese a za te ker la kera
27 man or u oron iyev i awambe la nenge a na, er a dugh ken ikighir i gar na u yeren ker la kera, man a wua or u a woo or la yô, ngu a iboawambe ga.
28 Sha ci u gba u una lu ken gar na u yeren ker la zan zan zegepristi una kar kpen. Kpa zegepristi una kpeen kera yô, or u a woo or la una fatyô u hiden yemen hen ijiir na.+
29 Akaa ne aa lu ne tindi u ne ôron ajir a mi sha ajiir a ne tema la cii, sha ikyov ikyov yô.
30 “‘Or u nan woo or* man ior ve* er shiada+ ér nan wua or cii yô, i wua nan sha ci u nan wua or,+ kpa i de woo or* sha shiada u or môm tseegh ga.
31 De ngohol nen kwagh u paan uma u or u nan woo or, nahan i gbe u a wua nan la ga. I̱ wua nan kpee, i de bundu ga.+
32 Shi de ngohol nen ipaan sha ityough ki or u nan yevese nan yem ken gar u yeren ker la ner nana hide a va lu hen inya i nan cii man zegepristi una kpe ga.
33 “‘De za hôngor nen a tar u ne lu za teman ker la ga, sha ci u awambe nga hôngor tar.+ Shi a fatyô u nan iwom sha awambe a i hee inya ken tar shon la ga, saa di sha awambe a or u nan hee a inya la tsô.+
34 De hôngor nen a tar u ne tem ker la ga, tar u m lu ker la. Gadia mo Yehova m ngu hen atô u ior i Iserael.’”+
