Numeri 2:1-34
-
I pav afo ker ikwe itiar itiar (1-34)
2 Yehova maa lam a Mose man Aron, a kaa a ve ér:
2 “Mbaiserael ve haa afo, hanma or hen kwe*+ u i tese nan la, hanma or nana tema ikyua a ikyav i ya u ter u nan. Ve haa afo ve na ishigh ken tenti u kohol ker la, ve kase un ve ningir.
3 “Mba vea tema vegher u sha ityoughkitaregh, ape iyange i duen la, a lu afo a kwe u Yuda sha akum a ve; orvesen u ônov mba Yuda ka Nashon,+ wan u Aminadabi.
4 Mbautyaav nav mba i nger ve ati yô, mba 74,600.+
5 Mba vea haa afo a dondo a na yô, ka ipyaven u Isakar; orvesen u ônov mba Isakar ka Netanel,+ wan u Suar.
6 Mbautyaav nav mba i nger ve ati yô, mba 54,400.+
7 Mba vea dondo a na yô, a lu ipyaven u Sebulon; orvesen u ônov mba Sebulon ka Eliabi,+ wan u Helon.
8 Mbautyaav nav mba i nger ve ati yô, mba 57,400.+
9 “Mba i nger ve ati ken mbautyaav mba hen afo a Yuda cii, mba 186,400. Ka ve ve̱ hii moughon ye.+
10 “Afo a kwe u Ruben+ aa tema vegher u ken imbusutariyan la, sha akum a ve; orvesen u ônov mba Ruben ka Elisur+ wan u Sedeur.
11 Mbautyaav nav mba i nger ve ati yô, mba 46,500.+
12 Mba vea haa afo a dondo a na yô, a lu ipyaven u Shimion; orvesen u ônov mba Shimion ka Selumiel+ wan u Surisadai.
13 Mbautyaav nav mba i nger ve ati yô, mba 59,300.+
14 Mba vea dondo yô, a lu ipyaven u Gadi; orvesen u ônov mba Gadi ka Eliasav+ wan u Reuel.
15 Mbautyaav nav mba i nger ve ati yô, mba 45,650.+
16 “Mba i nger ve ati ken mbautyaav mba hen afo a Ruben cii, mba 151,450. Ka ve vea dondo sha mba ve hii moughon la ye.+
17 “Zum u i mough a tenti u kohol ker la yô,+ afo a Mbalevi a lu hen atô u afo agen la cii.
“Ve yemen er ka ve haa afo nahan,+ hanma or hen ijiir i nan, sha ikwe ve la vough vough.
18 “Afo a kwe u Eferaim aa tema vegher u shin ityôtar, sha akum a ve; orvesen u ônov mba Eferaim ka Elishama+ wan u Amihudi.
19 Mbautyaav nav mba i nger ve ati yô, mba 40,500.+
20 Mba vea dondo ken a na yô, a lu ipyaven u Manase;+ orvesen u ônov mba Manase ka Gamaliel+ wan u Pedasur.
21 Mbautyaav nav mba i nger ve ati yô, mba 32,200.+
22 Mba vea dondo yô, a lu ipyaven u Benyamin; orvesen u ônov mba Benyamin ka Abidan+ wan u Gidiôni.
23 Mbautyaav nav mba i nger ve ati yô, mba 35,400.+
24 “Mba i nger ve ati ken mbautyaav mba hen afo a Eferaim cii, mba 108,100. Vea lu mba sha utar mba moughon.+
25 “Afo a kwe u Dan aa tema vegher u ken imbusutarimese, sha akum a ve; orvesen u ônov mba Dan ka Ahieser+ wan u Amisadai.
26 Mbautyaav nav mba i nger ve ati yô, mba 62,700.+
27 Mba vea haa afo a dondo ken a na yô, ka ipyaven u Asher; orvesen u ônov mba Asher ka Pagiel+ wan u Okeran.
28 Mbautyaav nav mba i nger ve ati yô, mba 41,500.+
29 Mba vea dondo yô, a lu ipyaven u Nafetali; orvesen u ônov mba Nafetali ka Ahira+ wan u Enan.
30 Mbautyaav nav mba i nger ve ati yô, mba 53,400.+
31 “Mba i nger ve ati ken afo a Dan cii, mba 157,600. Ve̱ lu mba masetyô mba moughon,+ sha ikwe ve la.”
32 Ka Mbaiserael mba i nger ve ati sha uya mba uter vev je ne; iyenge i ior mba ken afo mba i nger ve ati u nyôron shoja cii yô, kohol lu 603,550.+
33 Kpa Mbalevi yô i nger ve ati+ a Mbaiserael mbagenev mbara imôngo ga,+ vough er Yehova kaa Mose nahan.
34 Mbaiserael er hanma kwagh u Yehova kaa Mose cii. Kape ve lu haan afo sha ikwe i i pav ve ker la,+ shi ve lu moughon+ sha icombor ve, man sha uya mba uter vev vough vough je la.
Ngeren mba shin kpe
^ Hanma kwe yange u lu a uipyaven ker utar.
