Numeri 22:1-41
22 Maa Mbaiserael haa afo hen taaikyôngo u Moabi, hen kpe Yordan, Yeriko gema lu vegher la.+
2 Balaki+ wan u Shipor, gema nenge akaa a Iserael yange er a Mbaamor la cii,
3 nahan Moabi gba cian ior mbara kpishi, gadia ve ngee. Jim je yô, mciem gba Moabi iyol sha kwagh u Mbaiserael je gande.+
4 Nahan Moabi kaa a mbatamen mba Midian ér:+ “Nongoior ne ua tim ajiir a ase cii, vough er bua ka a ya toho hen inya vindi vindi nahan.”
Hen shighe la, Balaki wan u Shipor lu tor u Moabi.
5 A tindi ior hen Balam wan u Beor, hen Petor,+ u lu hen kpe Ifi* hen tar na la. A tindi ér a va, a kaa ér: “Nenge! Ior due ken Igipiti. Man nenge! ve cir sha tar cii,+ ve va haa afo hen ishigh yagh jigh jigh.
6 Nahan wea lumun yô, va wam ior mban ifyan,+ gadia ve hembam. Nahan alaghga me fatyô u hemban ve, zendan ve hen tar ne kera, sha ci u m fa dedoo mer, or u u ver nan doo doo yô nana lu a iveren, shi or u u we nan ifyan cii, ifyan ia kôr nan.”
7 Nahan mbatamen mba Moabi man mbatamen mba Midian mough tôô injar-ishor za hen Balam,+ ve za ôr un loho u Balaki.
8 Tsô a kaa a ve ér: “Tsa nen heen, tsô me va ôr ne kwagh u Yehova a kaam cii.” Nahan mbavesen mba Moabi tsa vea Balam.
9 Maa Aôndo va hen Balam va pine un ér:+ “Ka unô ior ve lu vea we nee?”
10 Balam gema kaa a Aôndo u mimi ér: “Balaki wan u Shipor, tor u Moabi tindi loho her a mo kaa ér,
11 ‘Nenge! Ior mba ve dugh ken Igipiti ne, mba samber sha tar cii. Yô va wam ve ifyan,+ nahan alaghga me fatyô u nôngon ityav a ve zendan ve kera.’”
12 Kpa Aôndo kaa a Balam ér: “De ze a ve imôngo ga. Shi de we ior mbara ifyan ga, sha ci u ka ior mba ve lu a iveren yô.”+
13 Tsô Balam mough pepe kaa a mbavesen mba Balaki tindi la ér: “Hide yem nen ken tar wen, sha ci u Yehova venda ér m de ze a ven imôngo ga.”
14 Nahan mbavesen mba Moabi mbara mough hide hen Balaki va kaa a na ér: “Balam venda u van a vese imôngo.”
15 Nahan kpa, Balaki shi hide tindi mbavesen mbagen mba hemban ngeen shi hemban lun a icivir a mba hiihii mbara.
16 Ve va hen Balam, ve va kaa a na ér: “Balaki wan u Shipor ngu kaan nahan ér, ‘M zamber we, de den wer kwagh môm a yange u u van her a mo ga,
17 sha ci u me na u icivir kpishi, shi me er hanma kwagh u u kaa wer m er cii. Yô, ma u shi va wem ior mban ifyan.’”
18 Kpa Balam kaa a mbatomov mba Balaki mbara ér: “Aluer ka u Balaki una nam ya na a azurufa man zanaria ker poo je kpa, me fatyô u eren kwagh môm hemban kwagh u Yehova Aôndo wam a kaam la ga, a lu kwagh u cuku shin a lu u vesen kpaa.+
19 Kpa nea lumun yô, tsa nen tugh mbun kpaa, shi me ungwa kwagh ugen u Yehova una ôrom yô.”+
20 Maa Aôndo va hen Balam tugh va kaa a na ér: “Aluer ior mban va u va kuan a we yô, za vea ve imôngo. Kpa ka kwagh u me kaa u la tseegh u ôr ye.”+
21 Tsô Balam mough pepe kange jaki* na shidi,* a gba yemen vea mbavesen mba Moabi mbara.+
22 Kpa ishima vihi Aôndo tsung er lu zan yô, nahan ortyom u Yehova za tile sha gbenda sha u yangen un. Balam henda jaki na, mbatomov nav uhar lu vea na imôngo.
23 Jaki la nengen er ortyom u Yehova tile sha gbenda tsua sanker kôr ken uwe yô, i gba nôngon ér ia goom a nyôr ken toho. Kpa Balam gba gbidyen jaki la ér i hide sha gbenda.
24 Maa ortyom u Yehova za tile hen angbenda u hogholoo, hen atô u ishule i wain ihiar, i maa igyar i sha awen keen man keen.
25 Jaki la nengen a ortyom u Yehova yô, i gba kômbon iyol ken kpekpe, maa i za kighir Balam nguhar ken kpekpe, tsô Balam shi gba gbidyen i.
26 Ortyom u Yehova maa kar shi za tile hen ijiir i hogholoo, ape ian lu i goom ken iyan shin ken imese ga yô.
27 Jaki la nengen a ortyom u Yehova yô, i sen i gure inya a Balam sha ijime, nahan ishima vihi Balam, a gema gbough nagh a gba gbidyen jaki la a mi.
28 Ken masejime yô, Yehova er jaki la gba lamen,*+ i kaa a Balam ér: “Kanyi m er u ve u gbidyem acin atar nee?”+
29 Balam gema kaa a jaki la ér: “Ka sha ci u u ngu heen mo. Mea lu a sanker ken uwe yô, ma m wua u a wua jim!”
30 Maa jaki la kaa a Balam ér: “Ka mo m lu jaki you i u ndera hendan ken uma wou cii zan zan nyian gaa? I lu nahan m vande eren imbakwagh ne a wee?” A gema a kaa ér: “Ei!”
31 Yehova maa bugh Balam ashe,+ nahan a nenge ortyom u Yehova tile sha gbenda, tsua sanker kôr ken uwe. Maa fese je, a sen a gure a kuma ishigh inya.
32 Maa ortyom u Yehova kaa a na ér: “Er nan ve u gbidye jaki you acin atar nee? Nenge! Mo iyol yam m va sha u va yangen we, sha ci u gbenda wou ngu hendan a awashima wam.+
33 Jaki ne nenge a mo, i nôngo ér ia palegh mo kuma acin atar.+ Luun er i palegh mo ga yô, hegen nahan ma m wua u ma m undu jaki la uma.”
34 Balam gema kaa a ortyom u Yehova ér: “M er isholibo, sha ci u m fa mer ka we u til sha gbenda u lu keghen mo ga. Man aluer kwagh ne ka sha ishima you ga yô, me hide me yem.”
35 Kpa ortyom u Yehova kaa a Balam ér: “Za a ior mbara imôngo, kpa ka kwagh u me kaa u la tseegh u ôr ye.” Nahan Balam kar gba yemen vea mbavesen mba Balaki tindi la imôngo.
36 Balaki ongo ér Balam va nyôr yô, a due fese a za kohol un hen gar u Moabi, u a lu hen kpe u pev u Arnon, hen ikighir i haregh shon la.
37 Balaki pine Balam ér: “Yange m tindi mer va gaa? Er nan ve yange u va her a mo ga? Yange u hen wer me fatyô u nan we icivir kpishi gaa?”+
38 Balam gema kaa a Balaki ér: “Yô, m va her a we hegen ve. Kpa me fatyô u ôron ma kwagh shinii? Ka kwagh u Aôndo a wem ken zwa la tseegh me fatyô u ôron ye.”+
39 Tsô Balam kar yem vea Balaki imôngo, ve va ar hen Kiriati-husoti.
40 Maa Balaki na nagh sha ibua man iyôngo, a pande a tindi Balam a mi, kua mbavesen mba ve lu vea na imôngo la.
41 Sev mbu aven yô, Balaki kua a Balam yem a na hen Bamoti-baal, ape una fatyô u nengen a ior mbara* cii yô.+
