Numeri 27:1-23
27 Tsô ônov mba kasev mba Selofehadi,+ wan u Hefer, wan u Gileadi, wan u Makir, wan u Manase, u ken icombor i Manase wan u Yosev, ve va. Ati a ônov nav mba kasev mban lu Mahela man Noa man Hogela man Milka kua Tirsa.
2 Ve va tile sha ishigh ki Mose man pristi Eleasar kua mbavesen+ man nongoior la cii, hen hunda u tenti u kohol ker la, ve kaa ér:
3 “Ter wase yange kpe ken taaikyôngo, kpa yange lu ken ior mba ve kohol imôngo ve lu hendan a Yehova la ga, ka mba suen Kora la je la,+ yange kpe sha ci u isholibo na, kpa gema ngu a wan u nomso ga.
4 A er nan ve iti i ter wase ia gba saan hen tsombor na sha ci u ngu a wan u nomso ga yumu? Na se kwar vea anmgbianev mba ter wase imôngo.”
5 Nahan Mose va a ikyaa ve la sha ishigh ki Yehova.+
6 Yehova maa kaa a Mose ér:
7 “Ônov mba Selofehadi kaa vough. Na ve kwar vea anmgbianev mba ter ve kpee je, i lu dyako ve, gema dyako u ter ve na ve.+
8 Shi kaa a Mbaiserael wer, ‘Aluer or kpe man nan ngu a wan u nomso ga yô, gema nen dyako u nan, na nen wan u nan u kwase.
9 Man aluer nan ngu a wan u kwase ga yô, gema nen dyako u nan, na nen anmgbianev mba nan mba nomso.
10 Aluer nan ngu a anmgbianev mba nomso ga yô, gema nen dyako u nan, na nen anmgbianev mba ter u nan mba nomso.
11 Aluer ter u nan ngu a anmgbianev mba nomso ga yô, gema nen dyako u nan la na nen anmgbian u nan u sha tsombor u a hembe lun ikyua ikyua la, i hingir kwagh u nan. Kwaghôron u ijirigh ne a lu Mbaiserael tindi, vough er Yehova kaa Mose nahan.’”
12 Tsô Yehova kaa a Mose ér: “Unde sha uwo u Abarim ne,+ za nenge tar u m lu nan Mbaiserael la.+
13 U nengen a u kera yô, we kpa u kpe*+ vough er anngôu Aron nahan,+
14 sha ci u zum u nongoior ne lu gban ahon a mo ken taaikyôngo u Zin la, ne hembam ato sha kwagh u m ôr mer tsegham nen sha ishigh vev, sha kwagh u mnger la.+ Ka mngerem ma Meriba+ ma ma lu hen Kadeshi,+ ken taaikyôngo u Zin la je la.”+
15 Tsô Mose kaa a Yehova ér:
16 “Yô Yehova, Aôndo u jijingi u ior cii a tsua or u nana hemen nongoior ne
17 u nana duen shi nana nyôron sha ishigh vev, man u nana hemen ve nana duen a ve shi nana nyôron a ve yô, sha er nongoior u Yehova ua hingir er iyôngo i i lu a orkuran ga nahan ga yô.”
18 Nahan Yehova kaa a Mose ér: “Va a Yoshua wan u Nun, or u a kom u hemen* la, va penda ave sha a na.+
19 Va a na a va tile sha ishigh ki pristi Eleasar man sha ishigh ki nongoior la cii, tsegha un sha ashe a ve, a hingir orhemen.+
20 Pande tahav ou* na un,+ sha er nongoior u Iserael cii ua ungwan un yô.+
21 Una tilen sha ishigh ki pristi Eleasar, pristi di una pinen kwagh u ijirôron i Urim+ sha ishigh ki Yehova sha ci na. Ka sha imo na vea duen, shi ka sha imo na kpaa vea nyôron ye, un kua Mbaiserael mba ve lu vea na la cii, man nongoior la cii.”
22 Nahan Mose er vough er Yehova kaa un nahan. A va a Yoshua va tile sha ishigh ki pristi Eleasar, kua sha ishigh ki nongoior la cii,
23 maa a penda ave sha a na, a ver un sha tom,+ vough er Yehova kaa Mose nahan.+
