Job 9:1-35
9 Job niriʼña̱a̱ ga̱jma̱a̱ ajngáa rígi̱:
2 “Xúʼko̱, ikhúún má nda̱yo̱o̱ májánʼ dí xúʼko̱ kaʼnii.
Mú xú káʼnii gándoo mbáa xa̱bu̱ numbaaʼ maʼthí dí ragíʼdoo aʼkhúun náa inuu Dios rá.+
3 Á mu mbáa nandoo magi̱ʼdu̱u̱ ga̱jma̱a̱,+asndu xájmaa gáriʼña̱a̱ kááʼ mbóó dí mbá mil grajxe̱ dí gáʼniuu.
4 Ikhaa ra̱ʼkhá tháán ejmañuu ga̱jma̱a̱ gíʼdoo tsiaki̱i̱,+
tsáá gáʼngo̱o̱ maxmína̱ʼ ga̱jma̱a̱ dí asndu xágawúunʼ xá.+
5 Asndu nimbáa tséʼyoo, ikhaa naʼba̱a̱n kúbá,narngajxi̱i̱ ga̱jma̱a̱ rí nakásngañu̱u̱ʼ.
6 Naʼba̱tigú ku̱ba̱ʼ ga̱jma̱a̱ naʼni rí maʼba̱a̱n,ikhú dí gíʼ ga̱jma̱a̱ naʼba̱a̱n.+
7 Naʼtáñajuunʼ a̱jkha̱ʼ dí xámbiʼiiga̱jma̱a̱ narugoo agiúúnʼ a̱ʼgua̱a̱n,+
8 ikhaa mbáwíí naxtri̱ga̱ mekhu+ga̱jma̱a̱ na̱jkha̱ kruámuuʼ náa tsu̱du̱u̱ lamáa* rí naʼbajxu̱u̱.+
9 Ikhaa niʼnii mbá grupo a̱ʼgua̱a̱n Ash,* Kesil* ga̱jma̱a̱ Kimá,*+ma̱ngaa a̱ʼgua̱a̱n bi̱ tri̱gi̱i̱n xígií náa sur,
10 naʼni dí ra̱ʼkhá tháán mba̱ʼu̱ dí nimbáa tséʼngo̱o̱ gákro̱ʼo̱o̱,+ga̱jma̱a̱ dí ra̱ʼkhá tháán mitsaanʼ* dí xáʼnga̱a̱ʼ gátra̱xnuu.+
11 Nanújngoo náa níjniúʼ, mú tséʼngo̱ʼ gáyóo,nanújngoo náa inuʼ, mú tséʼngo̱ʼ gáyóo tsáá ñajuunʼ.
12 Índo̱ ikhaa rígá mbá dí narígúu, tsáá gáʼngo̱o̱ gáʼni ga̱jma̱a̱ xá.
Tsáá gándoo maʼthúu̱n, ‹ndiéjunʼ xtaa ratani̱ rá.›+
13 Dios xárikoo dí nakásngañu̱u̱ʼ,+asndu bi̱ numbayíí Rahab*+ musmbati̱gu̱u̱n náa inuu ikhaa.
14 ¡Iwáá lá índo̱ ikhúún gáriʼñuu xá!¡Índo̱ gági̱ʼdu̱ʼ ga̱jmu̱ʼ, mbaʼyóoʼ dí maraʼwi̱i̱ tsu̱ma̱á ajngáa dí gáthúu̱n!
15 Maski ajndu ragúʼdoo aʼkhúnʼ, mú xáriʼñuu.+
I̱ndó ma̱ndoo matakáñuu bi̱ naʼnimbánuu numuʼ* dí magáwíinʼ a̱jkiu̱u̱n kaʼyoʼ.
16 Á mu na̱thu̱u̱n, lá mariʼñuʼ xáʼ.
Tsiánguá á mu ma̱ndoo maʼdxawunʼ,
17 numuu dí ikhaa nakujmbiri̱gu̱u̱n ga̱jma̱a̱ mbaʼa gamiéjunʼ rí nindxu̱u̱ xóo mbá giñámbiʼ,ga̱jma̱a̱ naʼni maʼni mbaʼa rí namínúuʼ rí asndu nda̱a̱ mbá numuu.+
18 Tséniñuʼ mbaya jxu̱ʼ,nángi eʼni e̱ʼkha̱ kagu̱u̱ gamiéjunʼ.
19 Á mu nuʼthá ga̱jma̱a̱ numuu tsiaki̱i̱, ikhaa gíʼdoo tsiaki̱i̱,+
á mu nuʼthá ga̱jma̱a̱ numuu dí májánʼ, ikhaa naʼthí ‹Tsáá gándoo manda̱ʼa̱a̱ cuenta* rá.›
20 Á mu nakujmaa kaʼwu dí ragúʼdoo aʼkhúnʼ, rawunʼ má gáʼthí dí magíʼnuʼ.Maski ajndu ikhúún nda̱a̱ aʼkhúnʼ, ikhaa maʼthí rí gúʼdoo aʼkhúnʼ,*
21 maski ajndu ragúʼdoo aʼkhúnʼ, tséyóo dí gágíʼnuʼ,nawi̱yu̱ʼ ka̱yo̱o̱ vida ndrígóʼ.
22 Ikha̱á má mbá xúgíʼ, ikha jngóo ikhúún na̱tha̱:‹Xa̱bu̱ bi̱ nda̱a̱ aʼkhúun ga̱jma̱a̱ xa̱bu̱ ra̱májáanʼ, ikhaa mbóó má xóo eʼni gámbíin›.
23 Á mu nda̱a̱ tsu̱ma̱ gájnííʼ iyaʼ dí maʼni makhañún mbá nacha̱ xa̱bu̱,ikhaa manduʼwájmiin rí tséʼngo̱o̱ a̱jkiu̱ún bi̱ nda̱a̱ aʼkhúún.
24 Ku̱ba̱ʼ nijuixnájxi̱ náa ñawúunʼ xa̱bu̱ ra̱májáanʼ,+ikhaa narugoo idún* bi̱ nunimbaníí xkujndu.
Á mu raʼkháa ikhaa, tsáá ñajuunʼ rá.
25 Dí xúgi̱, mbiʼi rí xtáá, nanújngoo itháán nacha̱ ki xóo mbáa bi̱ nagáyúu,+ga̱jma̱a̱ nditháan tséxtáá gagi,*
26 nanújngoo nacha̱ xóo egáyúu barco dí niguma ga̱jma̱a̱ rajxa̱ mbi̱jua̱,xóo bi̱yú bi̱ najngutaʼmíiʼ náa xujkhúʼ bi̱ nurugui̱i̱n.
27 Á mu na̱tha̱ ‹Mambumuʼ gaʼkhu dí gúʼdoo,mariʼkhu̱u̱ inuʼ ga̱jma̱a̱ maxtáá gagi›,
28 maski ajndu xúʼko̱ mamiñúʼ má xúʼko̱ gáʼni dí mamínuuʼ+ga̱jma̱a̱ nda̱yo̱o̱ rí xáta̱ya̱a̱ dí ragúʼdoo aʼkhúnʼ.
29 Majuiʼyáá rí gúʼdoo aʼkhúnʼ.
Ikha jngóo nda̱a̱ má numuu ma̱ni̱ tsiakimínáʼ.+
30 Á mu nawáán ga̱jma̱a̱ iyaʼ kaʼwu*ma̱ngaa najña̱a̱ ñawúnʼ ga̱jma̱a̱ xábú.+
31 Ikháán matuxuʼmúnʼ náa mbá puzu dí kajnííʼ xngaʼchaʼ,dí asndu xtíñúʼ mawi̱yu̱u̱ʼ kaʼyoʼ.
32 Numuu dí ikhaa na̱nguá nindxu̱u̱ mbáa xa̱bu̱ xóo ikhúún mu ma̱ndoo mariʼñuu,mu mu̱ʼguáxu mbóó náa mambanúu numuxu̱.+
33 Ndawa̱a̱ nimbáa tsáa* bi̱ maʼthí á mu ikhúún nindxu̱ʼ xa̱bu̱ májáanʼ o á mu Dios nindxu̱u̱ májáanʼ,ndawa̱a̱ nimbáa bi̱ maʼnimbánuu numuxu̱.*
34 Á mu ikhaa naniñuuʼ raxnúʼga̱jma̱a̱ naniñuuʼ raʼnimíñúʼ,+
35 ikhúún xámíñúʼ mathu̱u̱n,numuu dí tsémíñúʼ matamíjná ga̱jmu̱ʼ.
Mbaʼa nota
^ O “mar”.
^ Mbáa nandoo gáʼthúu̱n grupo a̱ʼgua̱a̱n bi̱ mbiʼyuu Osa Mayor.
^ Mbáa nandoo gáʼthúu̱n grupo a̱ʼgua̱a̱n bi̱ mbiʼyuu Tauro.
^ Mbáa nandoo gáʼthúu̱n grupo a̱ʼgua̱a̱n bi̱ mbiʼyuu Orión.
^ O “nagui̱i̱”.
^ O mbáa “bi̱ xtáa rakrui̱gu̱u̱n”.
^ O “maʼnimbánuu numuʼ”.
^ Náa ajngáa hebreo naʼthí, “kuningúúnʼ”.
^ Náa ajngáa hebreo naʼthí, “inún”.
^ Náa ajngáa hebreo naʼthí, “májánʼ”.
^ Náa ajngáa hebreo naʼthí, “iyooʼ idiʼ dí nijuiya̱a̱ʼ”.
^ O “mediador”.
^ Náa ajngáa hebreo naʼthí, “maxkrámaʼ tsuduxu̱”.
