Job 5:1-27
5 ¡Mbá péñu,* atatsaʼwá mu mumbayáaʼ! Lá maxtáa mbáa bi̱ mariʼñaaʼ ráʼ.
Lá naku̱ma̱a̱ʼ dí mbáa ángel bi̱ kaʼwii ma̱ndoo mambáyáaʼ ráʼ.
2 Rí nayéjxi̱i̱ sia̱nʼ xa̱bu̱ skágunʼ maʼni rí makhañúuga̱jma̱a̱ bi̱ naʼnimbo̱o̱ xúgíʼ rí nutháán maxíyáa rí naxígúu.
3 Ni̱jkhánú ndi̱yo̱o̱ rí xa̱bu̱ skágunʼ nakúwá májánʼ, xó má mbá ixi̱ dí naxkuaʼán ajmu̱u̱,mú mbá nacha̱ na̱ʼkha̱nú gamiéjunʼ náa kúwá.
4 E̱jñu̱ún kúwá ga̱jma̱a̱ gamíi,ma̱ngaa nuni̱ ngíníi náa riejuun xkrugoo xuajin+ rí asndu nimbáa ndawa̱a̱ tsáa maʼni káwíin.
5 Rí nagujxi̱i̱ na̱ʼkhu̱ bi̱ naxkidxu̱u̱,asndu naguwíi na̱ʼkhu̱ rí nda̱ja̱a̱ náa majñu̱u̱ʼ tsuwanʼga̱jma̱a̱ xúgíʼ rí gíʼdoo na̱jkha̱ kagu̱u̱ i̱mba̱a̱.
6 Numuu rí ga̱ʼkhu̱ tséʼkha̱ náa yujndaʼni má tsingíná tséjma̱a̱ náa ku̱ba̱ʼ.
7 Xó má ekha mbá aguʼ,xúʼko̱ má mbaʼa xkujndu eraʼnuu xa̱bu̱ índo̱ naxtáa.
8 Á mu ikhúún nindxu̱ʼ xóo ikháán,maʼgá gákruígamínáʼ náa Dios, mathu̱u̱n Dios ga̱jma̱a̱ numuʼ,
9 bi̱ naʼni rí mba̱ʼu̱ rí nimbáa tséʼngo̱o̱ gákro̱ʼo̱o̱ga̱jma̱a̱ ra̱ʼkhá tháán mbaʼa rí mitsaanʼ.*
10 Ikhaa naʼni rí maxnúu ruʼwa náa ku̱ba̱ʼga̱jma̱a̱ nakuʼma iyaʼ náa xanáá.
11 Ikhaa natsriguii mitsídánʼ bi̱ naguma májti̱i̱ʼga̱jma̱a̱ bi̱ nikáguabaaʼ nakujxi̱i̱ mu makríya̱a̱ʼ.
12 Ikhaa naʼni rí awan dí nuri̱ya̱ʼ bi̱ lístíin xágájnuu májánʼ,mu ñajunʼ rí nuni̱ ga̱jma̱a̱ ñawúúnʼ xágájnuu májánʼ.
13 Ikhaa naʼni majngrádiinʼ bi̱ najmañún ga̱jma̱a̱ rí nuni̱,+mu awan dí nuri̱ya̱ʼ xágájnuu májánʼ.
14 Dí mbiʼi naruguamiʼíinʼ dí mikína,ga̱jma̱a̱ dí wakhaʼ najngrui̱gu̱u̱n xóo xa̱bu̱ bi̱ tsékruigu̱u̱n dí mbruʼun.
15 Ikhaa naʼni káwíin mu nda̱a̱ rí gúniu̱u̱n bi̱ juáʼwíi espada rawúúnʼ,ga̱jma̱a̱ naʼni kríya̱a̱ʼ bi̱ ngínáa náa xngáñuuʼ bi̱ gíʼdoo tsiaki̱i̱.
16 Mu marigá dí muguáʼthi̱i̱n bi̱ tséxtambáñún,mú magugóo má xúʼko̱ rawúúnʼ bi̱ nuni̱ dí ra̱májánʼ.
17 ¡Xtáa tsímáá xa̱bu̱ bi̱ Dios naxprígúu!Ikha jngóo, ¡xátani gaʼduunʼ dí naxpríguáaʼ bi̱ gíʼdoo xúgíʼ Tsiaki̱i̱!
18 Numuu rí ikhaa naʼni dí mi̱khu̱, mú nambróʼoo xtíin náa nigawúunʼ mbáa,najkúmigu, mú naʼni thanuu ga̱jma̱a̱ ñawúunʼ.
19 Ikhaa maʼni kríña̱a̱nʼ náa mbá majun gamiéjunʼ,ni má rí maʼni juwan nda̱a̱ rí gáʼniaaʼ.
20 Mbiʼi dí gárígá ewiʼ ikhaa maʼni kríña̱a̱nʼ mu xákáñáaʼ,mbiʼi dí gárígá guerra ikhaa maʼni kríña̱a̱nʼ mu xákáñáaʼ ga̱jma̱a̱ espada.
21 Dios gáñewa̱a̱nʼ náa raju̱ún dí naxpájtíín+ga̱jma̱a̱ xámíñáaʼ índo̱ gáʼga̱nú mbiʼi rí mambáa.
22 Xáxmiéjuaanʼ* índo̱ gárígá gamiéjunʼ ga̱jma̱a̱ índo̱ gárígá ewiʼ,ma̱ngaa xámíñáaʼ xtañún xujkhú xáná bi̱ kúwá náa tsu̱du̱u̱ ku̱ba̱ʼ.
23 Numuu dí itsí dí rígá xanáá xáʼni gawáanʼ,*ma̱ngaa makuwá tsímáá ga̱jma̱á nindxa̱a̱ʼ xujkhú xáná.
24 Phú gajkhun dí maraxtaa tsímáá náa guʼwáaʼ,índo̱ gájngrui̱ga̱a̱ʼ náa rajxa̱a̱ʼ ma̱ta̱ya̱a̱ rí nda̱a̱ dí eyóoʼ.
25 Ra̱ʼkhá tháán mbaʼin e̱jña̱a̱ʼ gáraʼdiinga̱jma̱a̱ bi̱ gáguwáʼ náa ikháán maʼni mbaʼin wéñuuʼ xó má rajxa̱ dí rígá náa tsu̱du̱u̱ ku̱ba̱ʼ.
26 Kaʼni̱í xkujíínʼ xóó índo̱ gídxu̱u̱ʼ náa iñá wajinʼ,xó má xtáxu̱u̱ trigo dí nigijxi̱i̱ wapháá.
27 Natayáá ráʼ. Ndi̱ʼyáʼ ga̱jma̱a̱ numuu rígi̱, xígi̱ kaʼnii nindxu̱u̱.
Atadxawíín ga̱jma̱a̱ gakrua̱ʼa̱a̱ʼ dí natha̱a̱nʼ”.
