Job 1:1-22
1 Náa ku̱ba̱ʼ Uz nixtáa mbáa xa̱biya̱ bi̱ mbiʼyuu Job,*+ ninindxu̱u̱ mbáa xa̱bu̱ bi̱ nda̱a̱ aʼkhúun ga̱jma̱a̱ jmbii,*+ bi̱ namíñuu kaʼyoo Dios ga̱jma̱a̱ tséʼni nimbá dí ra̱májánʼ.+
2 Nigiʼdiin juwiin jiámá ga̱jma̱a̱ ajtsíin wa̱ʼxa̱ʼ.*
3 Nigiʼdiin mbaʼin xujkiúu, mbá 7,000 mugu̱, 3,000 camello, 1,000 xedi̱* ga̱jma̱a̱ 500 búrru.* Ma̱ngaa ra̱ʼkhá tháán mbaʼin bi̱ numbayíí nigiʼdiin, ikha jngóo ni̱jkha̱nú ninindxu̱u̱ mbáa xa̱bu̱ bi̱ itháan gíʼdoo numuu náa mbá xúgíinʼ xa̱bu̱ bi̱ kúwá xígií náa nagájnuu a̱jkha̱ʼ.*
4 E̱ji̱i̱n nuni̱ ndxa̱a̱ náa guʼwún, mámbáa naʼni náa mbiʼi rí kaʼyoo maʼni ga̱jma̱a̱ nuthúún a̱ngiu̱ún wa̱ʼxa̱ʼ* dí magún gúpiʼtsu ga̱jma̱a̱ muwa̱a̱n gajmiún.
5 Índo̱ naguámbu̱u̱n runi̱ ndxa̱a̱ mbá xúgíinʼ e̱ji̱i̱n, ikhú Job nandxaʼwún e̱ji̱i̱n mu maʼni kaʼwi̱ín, ndajui̱i̱ miʼcha̱ ga̱jma̱a̱ naxnájxi̱ tsigijñaʼ dí nakarámáʼ+ ga̱jma̱a̱ numuu mámbáa dí ikhiin. Numuu rí naʼthí: “Mbáa e̱ji̱nʼ nixudamíjna̱ aʼkhá ga̱jma̱a̱ nitatsríguíi Dios náa a̱jkiu̱ún”. Rúʼko̱ dí Job naʼni má xúʼko̱.+
6 Ni̱jkha̱nú mbiʼi dí e̱ji̱i̱n Dios bi̱ gajkhun*+ nitu̱ʼu̱u̱n ga̱jma̱a̱ niguájun náa inuu Jeobá,+ ga̱jma̱a̱ xúʼko̱ má niʼni Gixa̱a̱* ma̱ngaa.+
7 Ikhú Jeobá nirajxu̱u̱ Gixa̱a̱: “Náá edxa̱a̱ʼ rá.” “Naʼkháaʼ dí ni̱jkhá náa tsu̱du̱u̱ ku̱ba̱ʼ mu mba̱yo̱o̱ dí rígá”, xúʼko̱ niriʼña̱a̱n Gixa̱a̱ dí nirajxu̱u̱ Jeobá.+
8 Ga̱jma̱a̱ Jeobá niʼthúu̱n Gixa̱a̱: “Nitayáá xa̱bi̱ʼ Job ráʼ. Ndawa̱a̱ nimbáa xóo ikhaa náa tsu̱du̱u̱ ku̱ba̱ʼ. Nindxu̱u̱ mbáa xa̱biya̱ bi̱ nda̱a̱ aʼkhúun ga̱jma̱a̱ nindxu̱u̱ jmbii,+ ikhaa namíñuu kaʼyoo Dios ga̱jma̱a̱ tséʼni nimbá dí ra̱májánʼ”.
9 Ikhú Gixa̱a̱ niriʼñuu Jeobá: “Á mu nda̱a̱ rí ekánáá Job, lá xóó mamiñúu kaʼyoo Dios xáʼ.+
10 Lá tátani̱ mbá xtájtsí dí mañewu̱u̱n mbájndi náa ikhaa,+ mangiin bi̱ kúwá náa goʼwóo, ga̱jma̱a̱ náa mbá xúgíʼ rí gíʼdoo xáʼ. Nitani̱ tsajkurámááʼ ñajunʼ dí naʼni ga̱jma̱a̱ ñawúunʼ,+ ga̱jma̱a̱ xujkiúu niʼni mbaʼin náa mbá xúgíʼ tsu̱du̱u̱ ku̱ba̱ʼ.
11 Dí xúgi̱, ataxruíya̱ʼ ñawáanʼ ga̱jma̱a̱ atrígú káyííʼ xúgíʼ dí gíʼdoo, ma̱ta̱ya̱a̱ á mu xáʼthá wéñaaʼ náa inaaʼ”.
12 Ikhú Jeobá niʼthúu̱n Gixa̱a̱: “Natayáá ráʼ. Xúgíʼ dí gíʼdoo rígá náa ñawáanʼ. ¡Mú ikhaa nda̱a̱ rí gátani̱i̱!”. Ikhú Gixa̱a̱ nigájna̱a̱ náa xtáa* Jeobá.+
13 Nda̱wa̱á, mbiʼi dí e̱ji̱i̱n jiámá ga̱jma̱a̱ wa̱ʼxa̱ʼ kúwá ruphiʼtsu ga̱jma̱a̱ kúwá raʼwa̱a̱n vino náa goʼwóo ndxájúún bi̱ giʼnii,+
14 ni̱ʼkha̱nú mbáa bi̱ na̱jkha̱ kayóo ajngáa ga̱jma̱a̱ niʼthúu̱n Job: “Xedi̱ kúwá ruxnáá xku̱bi̱ ga̱jma̱a̱ búrru kúwá ruphiʼtsu náa níjniúu,
15 índo̱ sabeos niguwáʼ gúxmijná ga̱jma̱á nindxu̱xu̱, niradíin bi̱ numbayáaʼ ga̱jma̱a̱ espada, ga̱jma̱a̱ nigún kudiin xujkhúʼ. Mbáwún ikhúún nikríñu̱u̱nʼ mu matha̱nʼ dí nirígá”.
16 Índo̱ bugi̱ kaʼníí xtáa raʼthí, ni̱ʼkha̱nú imba̱a̱ ga̱jma̱a̱ niʼthí: “¡Nigajtaa mekhuíí agiuuʼ Dios,* ga̱jma̱a̱ riʼyu̱u̱ aguʼ nitsikhíin mugu̱ ga̱jma̱a̱ bi̱ numbayáaʼ! Mbáwún ikhúún nikríñu̱u̱nʼ mu matha̱nʼ dí nirígá”.
17 Índo̱ bugi̱ kaʼníí xtáa raʼthí ni̱ʼkha̱nú imba̱a̱ ga̱jma̱a̱ niʼthí: “Xa̱bu̱ caldeos+ niruwamíjna̱ ajtsú grupo, niguwáʼ nirugui̱i̱n camello ga̱jma̱a̱ nigún kudiin, ma̱ngaa niradíin xa̱bia̱a̱ʼ ga̱jma̱a̱ espada. Mbáwún ikhúún nikríñu̱u̱nʼ mu matha̱nʼ dí nirígá”.
18 Índo̱ bugi̱ kaʼníí xtáa raʼthí, ni̱ʼkha̱nú imba̱a̱ ga̱jma̱a̱ niʼthí: “E̱jña̱a̱ʼ jiámá ga̱jma̱a̱ wa̱ʼxa̱ʼ kúwá ruphiʼtsu ga̱jma̱a̱ kúwá raʼwa̱a̱n vino náa goʼwóo ndxájúún bi̱ giʼnii.
19 Nda̱a̱ tsu̱ma̱, ni̱ʼkha̱ giñánʼ xígií náa ku̱ba̱ʼ mijxooʼ* ga̱jma̱a̱ nixnúu náa mbá nájkhu̱ eskíniu̱u̱ guʼwá, ikhú guʼwá ninga̱jxi̱i̱. Ga̱jma̱a̱ rígi̱ nigudíin e̱jña̱a̱ʼ. Mbáwún ikhúún nikríñu̱u̱nʼ mu matha̱nʼ dí nirígá”.
20 Ikhú Job nitu̱jxu̱u̱, nixkuʼtu xtíñuu ga̱jma̱a̱ niʼda̱ edxu̱u̱, ikhú nigiʼnduti̱ga̱ mbayííʼ, nismbáti̱go̱o̱
21 ga̱jma̱a̱ niʼthí:
“Tsaʼtsúnʼ nigájnuʼ náa awúu̱n* ru̱dúʼ,*ga̱jma̱a̱ tsaʼtsúnʼ má gátanga̱án.+
Jeobá má nixná+ ga̱jma̱a̱ Jeobá má nigruigúu.
Gaguma mba̱a̱ má xúʼko̱ mbiʼyuu Jeobá”.
22 Maski ajndu nigíʼnuu xúgíʼ rígi̱, Job na̱nguá nikudaminaʼ aʼkhá, ni má táʼni tsu̱du̱u̱ Dios rí naʼni dí ra̱májánʼ.
Mbaʼa nota
^ Mbáa nandoo gáʼthúu̱n ‹bi̱ eʼwíinʼ nawiñu̱u̱nʼ kuyáá›.
^ O “jmbii náa Dios”.
^ O “i̱jín go̱ʼo̱”.
^ Náa ajngáa hebreo naʼthí, “500 yunta xedi̱”.
^ Náa ajngáa hebreo naʼthí, “búrra”.
^ O “este”.
^ O “wa̱ʼtiu̱ún wa̱ʼxa̱ʼ”. Ajngáa hebreo dí najmaa gi̱i̱, ma̱ndoo mani̱ndxu̱ún bi̱ guaʼnii o bi̱ wa̱ʼta̱á.
^ Náa hebreo, ajngáa rígi̱ naʼthí ga̱jma̱a̱ numún ángeles.
^ Náa ajngáa hebreo naʼthí, “náa inuu”.
^ O mbáa “a̱jkhu̱u̱n”.
^ O “desierto”.
^ Náa ajngáa hebreo naʼthí, “xtíjyúu”.
^ O “náneʼ”.
