Job 42:1-17
42 Ikhú Job niriʼñuu Jeobá ga̱jma̱a̱ ajngáa rígi̱:
2 “Dí xúgi̱ na̱jkhánú nda̱yo̱o̱ dí maʼnga̱a̱ʼ matani̱ asndu ndiéjunʼ mága̱jma̱a̱ xúgíʼ dí natatsaʼwáminaʼ matani̱, maʼnga̱a̱ʼ matani̱.+
3 Ikháán niratá: ‹Tsáá xtáa raʼni dí xákujmaa kaʼwu dí nandoʼ ma̱ni̱* ga̱jma̱a̱ dí mbaʼ naʼthíí rá.›+
Gajkhun má dí ikhúún mbaʼ ni̱tha̱ága̱jma̱a̱ numuu dí ra̱ʼkhá tháán mitsaanʼ* dí ikhúún tséniʼnuuʼ.+
4 Ikháán niratá: ‹Atadxawíín, mbá péñu,* ga̱jma̱a̱ ikhúún matha̱a̱nʼ.
Ikhúún marajxa̱a̱ʼ ga̱jma̱a̱ ikháán matriʼñuʼ›.+
5 Nákha ginii nidxa̱wu̱ún nuthi ga̱jma̱a̱ numaaʼ,mú dí xúgi̱ nda̱ya̱a̱’ ga̱jma̱a̱ iduʼ.
6 Nagáwíinʼ a̱jkiu̱nʼ dí ni̱tha̱,+ikha jngóo naʼgúnʼ náa yujndaʼ ga̱jma̱a̱ náa idiʼ”.+
7 Índo̱ Jeobá niguámbóo niʼtámíjná ga̱jma̱a̱ Job, Jeobá niʼthúu̱n Elifaz bi̱ na̱ʼkha̱ náa Temán:
“Ra̱ʼkhá tháán ekásnga̱ñu̱ʼ etani̱ ga̱jma̱a̱ nakásngañu̱ʼ eni̱ a̱jmi̱i̱n bi̱ nambájxáaʼ gajmiáanʼ,+ numuu dí ikháanʼla na̱nguá ni̱tha̱ dí gajkhun ga̱jma̱a̱ numuʼ,+ raʼkháa xóo niʼthí xa̱bi̱ʼ Job.
8 Dí xúgi̱, aʼgua kudiin mbá juwiin xedi̱ ga̱jma̱a̱ mbá juwiin mugu̱ e̱jmba̱a̱, aʼguala gúya̱a̱ xa̱bi̱ʼ Job. Guxnajxí mbá tsigijñaʼ dí nakarámáʼ ga̱jma̱a̱ numala ga̱jma̱a̱ xa̱bi̱ʼ Job maʼtájkáan ga̱jma̱a̱ numala.+ Nathala gajkhun dí madxawun dí ikhaa gáʼtájkáan,* xáni̱ dí mumíniiʼla maski ajndu ikháanʼ ni̱nila xóo xa̱bu̱ skágunʼ, na̱nguá ni̱tha̱ dí gajkhun ga̱jma̱a̱ numuʼ, raʼkháa xóo niʼni xa̱bi̱ʼ Job”.
9 Ikha jngóo Elifaz bi̱ na̱ʼkha̱ náa Temán, Bildad bi̱ na̱ʼkha̱ náa Súah ga̱jma̱a̱ Zofar bi̱ na̱ʼkha̱ náa Naamá nigún gúni̱ dí Jeobá niʼtáñajúúnʼ muni̱. Ga̱jma̱a̱ Jeobá niʼdxawuun dí niʼtájkháan Job.
10 Nda̱wa̱á dí Job niʼtájkháan ga̱jma̱a̱ numún bi̱ nambájxu̱u̱ gajmíi̱n,+ Jeobá nirígúu dí naʼni mamínuuʼ Job+ ga̱jma̱a̱ niʼni dí mata̱nga̱a̱ magiʼdoo mbu̱júu̱ dí niʼnimbáti̱ga̱.* Jeobá niʼni dí magiʼdoo a̱jma̱ nuthu itháán ki xóo dí nigiʼdoo nákha ginii.+
11 Xúgíinʼ a̱ngui̱i̱n xa̱bekha ga̱jma̱a̱ a̱ngui̱i̱n gu̱ʼu̱, xó má xúgíinʼ bi̱ nimbájxu̱u̱ gajmíi̱n nákha ginii,+ nigún gúyáá Job ga̱jma̱a̱ nipiʼtsu gajmiún náa goʼwóo. Nigáwíinʼ a̱jkiu̱ún kuyáá ga̱jma̱a̱ nini̱i̱ a̱jkiu̱u̱n náa mbá xúgíʼ gamiéjunʼ dí Jeobá niniñuuʼ mamínuuʼ. Mámbáa nixnúu mbújkha̱a̱ ga̱jma̱a̱ mbá anillo dí oro.
12 Nda̱wa̱á dí Job nimínuuʼ, Jeobá niʼni tsajkurámaaʼ itháan ki xóo nákha ginii.+ Job ni̱jkha̱nú nigiʼdiin mbá 14,000 mugu̱, 6,000 camello, 2,000 xedi̱* ga̱jma̱a̱ 1,000 búrru.*+
13 Ma̱ngaa nigiʼdiin mbá juwiin jiámá ga̱jma̱a̱ ajtsíin wa̱ʼxa̱ʼ.*+
14 Bi̱ timbáa wáxióo nixná mbiʼyuu Jemimá, bi̱ raga̱jmi̱i̱n Quesías ga̱jma̱a̱ bi̱ maʼni ajtsíin Querén-Hapuc.
15 Ndawi̱i̱n eʼwíinʼ wa̱ʼxa̱ʼ bi̱ itháan mitsiʼñíin náa xúgíʼ xuajin ki xóo waʼxiinʼ Job, ga̱jma̱a̱ ikhaa nixníín muda̱a̱ herencia waʼxiinʼ gajmiún a̱ngiu̱ún.
16 Nda̱wa̱á dí Job nigíʼnuu rígi̱, ikhaa nixtáa i̱mbá 140 tsiguʼ, ndiʼñún e̱ji̱i̱n, ejín xíñíiʼ ga̱jma̱a̱ ejín xíñí egoo.
17 Job nixtáa mba̱yu̱u̱ʼ tsiguʼ, ma̱ngaa nixtáa gagi* ga̱jma̱a̱ nda̱wa̱á nikháñuu.
Mbaʼa nota
^ O “consejo ndrígóʼ”.
^ O “nagui̱i̱”.
^ O “atani̱ mbá rí májánʼ”.
^ Náa ajngáa hebreo naʼthí, “makujxíi inuu”.
^ Náa ajngáa hebreo naʼthí, “Jeobá niʼni dí maguanúu kidííʼ dí nimínuuʼ Job”.
^ Náa ajngáa hebreo naʼthí, “1,000 yunta xedi̱”.
^ Náa ajngáa hebreo naʼthí, “búrra”.
^ O “i̱jín go̱ʼo̱”.
^ Náa ajngáa hebreo naʼthí, “nikhi̱i̱ ga̱jma̱a̱ mba̱yu̱u̱ʼ nixtáa”.
