Job 36:1-33
-
Elihú naʼni mba̱a̱ xúgíʼ dí mitsaanʼ rí naʼni Dios (1-33)
36 Elihú niʼthí xóó:
2 “Gaʼngo̱o̱ a̱jkia̱a̱nʼ xóó xtayoʼ índo̱ xtáá ra̱ta̱,numuu dí kaʼníí gúʼdoo dí ma̱ta̱ ga̱jma̱a̱ numuu Dios.
3 Ma̱ta̱ kuduun dí nda̱yo̱o̱,masngajmá rí bi̱ Niʼniún naʼni dí májánʼ.+
4 Na̱nguá nindxu̱u̱ nduwaʼ dí xtáá ratha̱a̱nʼ,bi̱ ndaʼyoo xúgíʼ*+ xtáa gi̱i̱ náa inaaʼ.
5 Gajkhun rí Dios gíʼdoo tsiaki̱i̱+ ga̱jma̱a̱ tséniñuuʼ nimbáa,ma̱ngaa ra̱ʼkhá tháán ejmañuu.
6 Xániñúún makuwá xa̱bu̱ ra̱míjíinʼ,+mú maʼniún dí májánʼ bi̱ numíniiʼ.+
7 Nayejxu̱u̱n má xúʼko̱ bi̱ míjíinʼ,+ naniñúúnʼ matri̱gi̱i̱n gajmiún reyes* náa xílí* dí nutañajunʼ,+ga̱jma̱a̱ nundrigú gamajkhu asndu kámuu.
8 Mú, á mu xa̱bu̱ míjíinʼ naxtugui̱i̱n ga̱jma̱a̱ naxtuʼwún numuu dí nakiéʼkúún,o á mu numíníiʼ numuu dí kaxtuʼwún ga̱jma̱a̱ cadena,
9 Dios nasngájmúún dí raʼkhí nindxu̱u̱ dí nini̱,ga̱jma̱a̱ nasngájmúún dí nikiéʼkhúún numuu rí nini̱ mbaʼumíjna̱.
10 Mambáʼtoo cháʼwúún mu mudxawíín dí naxprígúnga̱jma̱a̱ naʼthúún dí muniña̱a̱ʼ runi̱ dí ra̱májánʼ.+
11 Á mu ninimbu̱u̱n kuyáá ga̱jma̱a̱ nuni̱ ñajuunʼ,makuwá májánʼga̱jma̱a̱ makuwá tsímáá náa mbiʼi dí xóó kúwá.+
12 Mú á mu tsénimbu̱u̱n, makhañún ga̱jma̱a̱ espada,*+tséjmañún má gákháñún.
13 Xa̱bu̱ ra̱míjíinʼ* muyejxi̱i̱ sia̱nʼ.
Ni má tsénda̱ʼa̱ rí mixtambáñún índo̱ naruʼwún Dios.
14 Kaʼníí jiámá ekháñún,+ga̱jma̱a̱ nakúwá* gajmiún xa̱bekha bi̱ nugujuamíjna̱ náa guʼwá rí nduyamajkhún dioses.+
15 Mú Dios nambáñúún bi̱ kúwá rumíniiʼ ga̱jma̱a̱ mbá gaʼkhu,ga̱jma̱a̱ naʼni rí mudxawíín aʼwóo índo̱ kúwá rumíniiʼ.
16 Maʼni kríña̱a̱nʼ náa gamiéjunʼ dí xtaa+ga̱jma̱a̱ maʼga kañáán náa nda̱a̱ gamíi, náa dí ni xátamíníiʼ,+náa kri̱ga̱ mesa dí trámáʼ ganitsu rí itháán májánʼ mu maʼni̱i̱ a̱jkia̱a̱nʼ.+
17 Maʼni̱i̱ a̱jkia̱a̱nʼ índo̱ gáta̱ya̱a̱ dí gáguáʼníí xa̱bu̱ ra̱míjíinʼ,+índo̱ gájuiʼthá rí maguáʼníí ga̱jma̱a̱ índo̱ gárígá dí májánʼ.
18 Mú tsu̱ma̱á gátani̱: Xátatsiʼñááʼ rí nakhásngaña̱a̱nʼ maʼni rí matiejxíi̱ sia̱nʼ,*+ga̱jma̱a̱ xátatsiʼñááʼ dí mbá regalo mba̱a̱ maʼni dí magajnúríya̱a̱ʼ náa kamba̱a̱.
19 Lá maʼngo̱o̱ maʼni kríña̱a̱nʼ náa gamiéjunʼdí natatsaʼwá rí mixtambáyáaʼ o ga̱jma̱a̱ xúgíʼ tsiaki̱i̱ dí natani̱ ráʼ.+
20 Xáʼndaaʼ wéñuuʼ dí maʼni mbruʼun,índo̱ xa̱bu̱ nakháñún mbá nacha̱.
21 Atiewumínáʼ mu xátani̱ dí ra̱májánʼ,numuu dí ikháán nitraʼwíí matani̱ dí ra̱májánʼ ki xóo matamíniiʼ.+
22 ¡Atayáá! Dios naguma mba̱a̱ ga̱jma̱a̱ tsiaki̱i̱ dí gíʼdoo,lá xtáa imba̱a̱ bi̱ najmañuu naʼsngáa xóo ikhaa xáʼ.
23 Tsáá lá nixnúu ikha* náa maʼga xá.+O tsáá lá niʼthúu̱n: ‹Raʼkhí nindxu̱u̱ dí nitani̱›.+
24 Xámbumaaʼ matani̱ mba̱a̱ dí ikhaa niʼni,+dí xa̱bu̱ nini̱ ajmúú ga̱jma̱a̱ numuu.+
25 Xúgíinʼ xa̱bu̱ numbaaʼ ndiyáá,xa̱bu̱ numbaaʼ tséʼngo̱o̱ gákru̱ʼu̱u̱n májánʼ rígi̱.
26 Xúʼko̱, Dios nindxu̱u̱ itháan mba̱a̱ ki xóo dí naʼngo̱o̱ nakru̱ʼu̱lú,+nimbáa xáʼngo̱o̱ gáguxnuu* nguáthá tsiguʼ xtáa.+
27 Ikhaa naʼni rí matujxi̱i̱ iyu̱u̱ iyaʼ,+ikhú iyu̱u̱ iyaʼ naʼni̱i̱ ruʼwa,
28 ga̱jma̱a̱ du̱u̱n naʼni dí maxnúu ruʼwa+náa kúwá xa̱bu̱ numbaaʼ.
29 Lá maʼngo̱o̱ mbáa makro̱ʼo̱o̱ xóo tri̱ga̱ du̱u̱n,o makro̱ʼo̱o̱ xóo nindxu̱ún a̱jkhu̱u̱n* bi̱ nagájnún náa guʼwá xtíin ndrígóo* Dios ráʼ.+
30 Atayáá xóo expíbínʼ*+ náa ikhaa xtáa,ga̱jma̱a̱ naʼni majnííʼ iyaʼ náa lamáa.*
31 Najmuu xúgíʼ rígi̱ mu maxnún rí nda̱ñúunʼ* xa̱bu̱ xuajin,ra̱ʼkhá tháán mba̱a̱ ganitsu exnún.+
32 Narkaʼwu agiuuʼ a̱jkhu̱u̱n náa ñawúunʼga̱jma̱a̱ nada̱ʼ maʼga náa má eyoo ikhaa.+
33 A̱jkhu̱u̱n naʼthí ga̱jma̱a̱ numuu ikhaa,asndu xedi̱ ndaʼyoo tsáá* ekuʼmaminaʼ.
Mbaʼa nota
^ Gi̱i̱ naʼthí ga̱jma̱a̱ numuu Dios.
^ O mbáa “nagrui̱gi̱i̱n mu manindxu̱ún reyes”.
^ O “trono”.
^ O “mbá a̱jua̱nʼ”.
^ O “Apóstatas”.
^ O mbáa “nakháñún”.
^ O “maraxna̱a̱ ñawáanʼ ga̱jma̱a̱ sia̱nʼ”.
^ O mbáa “niʼthá numuu”, “ninda̱ʼa̱a̱ cuenta ga̱jma̱a̱ numuu”.
^ O “xáʼngulú gúʼyáá”.
^ O “bi̱gu̱”.
^ Náa ajngáa hebreo naʼthí, “náa goʼwóo”.
^ Náa ajngáa hebreo naʼthí, “agiuuʼ”.
^ O “mar”.
^ O mbáa “maʼnimbánuu numún”.
^ O mbáa “ndiéjunʼ”.
