Job 24:1-25
24 Náá numuu dí bi̱ gíʼdoo xúgíʼ Tsiaki̱i̱ tségíʼ mbá mbiʼi dí manda̱ʼa̱a̱ cuenta rá.+
Náá numuu dí bi̱ nuniʼniiʼ tséyáá mbiʼi ndrígóo xá.
2 Xa̱bu̱ nurajxingaa tsinaʼ* dí tri̱ga̱ náa ndawaa,+nuni̱ kuʼwíinʼ mugu̱ ga̱jma̱a̱ nuxnún muphiʼtsu náa mbañúúnʼ.
3 Asndu nagún kudiin burriu̱ún e̱jín wáʼa,ga̱jma̱a̱ naguanún gajmiún xediu̱u̱ a̱ʼgú xuáʼa náa nasngájma dí ikhaa maʼni numa̱a̱ dí nitíʼñuu.+
4 Nutsudiin xa̱bu̱ ngíníi dí magajnún náa kamba̱a̱,bi̱ tséjmiin gúmbáyúmíjná náa tsu̱du̱u̱ ku̱ba̱ʼ, ndayóoʼ dí murkaʼwumijná mu xúñúún.+
5 Xa̱bu̱ ngíníi nagájnún gúyáʼ ganitsu, xóo eni̱ búrru xáná+ bi̱ kúwá náa ku̱ba̱ʼ mijxooʼ,*nduyáʼ dí mu̱phu̱ e̱jñu̱ún náa ku̱ba̱ʼ mijxooʼ.
6 Ndayóoʼ dí murajxi̱i̱ náa dí nidu eʼwíinʼ,*ga̱jma̱a̱ mbuyáaʼ náa mbaaʼ dí niʼdu uva xa̱bu̱ ra̱májáanʼ.
7 Tsaʼtsiinʼ enuʼ dí mbruʼun, nda̱a̱ xtíñún,+ga̱jma̱a̱ nda̱a̱ dí muguʼwúúnʼ índo̱ naʼni migúwán.
8 Narmijiin ruʼwa dí naxnúu náa kúbá,ikha jngóo asndu jxa̱ʼ timii náa kuʼmuu itsí, numuu rí nda̱a̱ náa ma̱ta̱wu̱u̱nʼ.
9 Nurigú káyííʼ a̱ʼdióo a̱ʼgú xuáʼa índo̱ xtáa raʼxúuʼ,+naguanún ga̱jma̱a̱ xtíñún xa̱bu̱ ngíníi rí nasngájma dí muni̱ numa̱a̱ dí nitiʼñáán.+
10 Nutsudiin dí majngruigu̱u̱n tsaʼtsiinʼ, nda̱a̱ xtíñún,ga̱jma̱a̱ naxkidxu̱u̱n, ma̱ngaa ikhú má nuxieʼdúún muda̱ xtájxu̱u̱ dí nijma̱a̱.
11 Nuñajunʼ gakhi̱i̱ wéñuuʼ maski ajndu naʼni mijkha náa mijngii* xtájtsí dí kúgumaʼá ga̱jma̱a̱ náa kiʼdu uva,nuxujmbi̱i̱ uva náa iñáʼ, maski ajndu xúʼko̱ nakándawúúnʼ.+
12 Bi̱ na̱jkha̱ rakháñún kúwá ruxieʼkhá náa xuajin,bi̱ gi̱í tsékáñún nundxa̱ʼwa̱ rí mixtambáñún,+mú Dios na̱nguá eʼyoo dí raʼkhí kúwá raguáʼníí.*
13 Kúwá bi̱ tsíñún gúyáá aguʼ,+tséniʼnuuʼ kambo̱o̱,ni má tségún ikhí.
14 Bi̱ nagudíin xa̱bu̱ natu̱jxu̱u̱ miʼcha̱,naxíyáa xa̱bu̱ bi̱ tséʼngo̱o̱ gámbáyuminaʼ ga̱jma̱a̱ xa̱bu̱ ngínáa,+ga̱jma̱a̱ dí mbruʼun naʼni kúwáʼ.
15 Bi̱ nakudaminaʼ aʼkhá gajmíi̱n eʼwíinʼ nagi̱ʼthu̱u̱n dí maʼni mbruʼun,+ikhaa naʼthí ‹¡Nimbáa má xáʼyoʼ!›,+
ga̱jma̱a̱ narugoo inuu.
16 Dí mbruʼun nuxkudiraʼa guʼwá mu matu̱ʼu̱u̱n,dí mbiʼi nuruguara’a mijnáa.
Tsiánguá e’ni a̱jkiu̱ún índo̱ kúwá náa mbiʼi.+
17 Ikhiin namíñúún eʼni miʼcha̱ xó má eʼwíinʼ namíñúún eʼni rí mikína,mú ikhiin naguʼwún má eʼni dí gamíi dí narígá náa mikína.
18 Mú mbá nacha̱ gáʼga kagui̱i̱n iyaʼ.*
Majuiʼtátsríguíi mbañúúnʼ.+
Ga̱jma̱a̱ ni xátangi̱ín mbuyáá mbañúúnʼ náa kiʼdu uva.
19 Xó má dí mijxooʼ ga̱jma̱a̱ dí mijkha naʼni dí majuiya̱a̱ʼ idiʼ,¡xúʼko̱ kaʼnii Iñá wajinʼ* na̱jkha̱ kagui̱i̱n bi̱ nuxudamíjna̱ aʼkhá!+
20 Ru̱dún* mambumún kuñúún, ra̱ʼkhá tháán miʼtsíin gúyáá ñu̱u̱.
Nditháan ni xármáʼáan a̱jkiu̱ún kuñúún.+
Ga̱jma̱a̱ dí ra̱májánʼ mu̱thu, xóo ethu mbá ixi̱.
21 Nuni̱i̱ dí raʼkhí a̱ʼgu̱ bi̱ tségiʼdiin e̱ji̱n,ga̱jma̱a̱ nuni̱ ngínáa a̱ʼgú xuáʼa.
22 Dios* majmuu tsiaki̱i̱ ndrígóo mu maʼni gámbíin bi̱ xkujiinʼ,maski ajndu matujxu̱u̱n, mú tséyáá á mu makuwá o na̱nguá.
23 Dios* naniñuuʼ dí maku̱mu̱ún kuyamíjna̱, ga̱jma̱a̱ dí maku̱mu̱ún rí nda̱a̱ gamíi kúwá,+mú nayejxu̱u̱ xúgíʼ dí kúwá runi̱.*+
24 Nundrigú gamajkhu mbá nguáthá tiempo, ga̱jma̱a̱ nda̱wa̱á nuniña̱a̱nʼ rakúwá.+
Nindxu̱ún xóo iña dí nuthu+ ga̱jma̱a̱ naxtagimbóo,nánguá guáʼdáá numún ga̱jma̱a̱ naguánú nakháñún xó má xúgíinʼ.
25 Á mu dí raʼkháa xúʼko̱, tsáá gándoo gásngájma dí nindxu̱ʼ mbáa xa̱bu̱ minduwaaʼ,o maʼni gaʼduunʼ rí na̱tha̱ rá.”
Mbaʼa nota
^ O “mujúun”.
^ O “desierto”.
^ O mbáa “rajxa̱ náa mbaaʼ”.
^ O mbáa “Nurawíi aceite náa majñuuʼ”.
^ O mbáa “Dios tséʼyoo dí gíʼdoo aʼkhúun mbáa ga̱jma̱a̱ numuu dí ra̱májánʼ dí narígá”.
^ Náa ajngáa hebreo naʼthí, “Ikhaa na̱jkha̱ nacha̱ náa inuu iyaʼ”.
^ O “Nániu̱ún”.
^ Náa ajngáa hebreo naʼthí, “Ikhaa”.
^ Náa ajngáa hebreo naʼthí, “Ikhaa”.
^ Náa ajngáa hebreo naʼthí, “iduu rígá náa kambu̱ún ikhiin”.
