Job 2:1-13
2 Ni̱jkha̱nú mbiʼi dí e̱ji̱i̱n Dios bi̱ gajkhun*+ nitu̱ʼu̱u̱n ga̱jma̱a̱ niguájun náa inuu Jeobá,+ ma̱ngaa Gixa̱a̱* nito̱ʼo̱o̱ ga̱jma̱a̱ niwi̱ji̱ náa inuu Jeobá.+
2 Ikhú Jeobá nirajxu̱u̱ Gixa̱a̱: “Náá edxa̱a̱ʼ rá.” “Naʼkháaʼ dí ni̱jkhá náa tsu̱du̱u̱ ku̱ba̱ʼ mu mba̱yo̱o̱ dí rígá”,+ xúʼko̱ niriʼña̱a̱n Gixa̱a̱ dí nirajxu̱u̱ Jeobá.
3 Ga̱jma̱a̱ Jeobá niʼthúu̱n Gixa̱a̱: “Nitayáá xa̱bi̱ʼ Job ráʼ. Ndawa̱a̱ nimbáa xóo ikhaa náa tsu̱du̱u̱ ku̱ba̱ʼ. Nindxu̱u̱ mbáa xa̱biya̱ bi̱ nda̱a̱ aʼkhúun ga̱jma̱a̱ nindxu̱u̱ jmbii,+ ikhaa namíñuu kaʼyoo Dios ga̱jma̱a̱ tséʼni nimbá dí ra̱májánʼ. Maski ajndu ikháán nandaaʼ dí maxíyáa*+ rí asndu nda̱a̱ mbá numuu, mú ikhaa nawi̱ji̱ jmbu má xúʼko̱ náa ikhúún”.+
4 Mú Gixa̱a̱ niriʼñuu Jeobá: “Mámbáa xa̱bu̱ naxmiéjuunʼ kaʼyaminaʼ.* Ikha jngóo maxná mbá xúgíʼ dí gíʼdoo mu maʼni kríyamínáʼ.
5 Dí xúgi̱, ataxruíya̱ʼ ñawáanʼ ga̱jma̱a̱ atani̱ gawíínʼ xuyuuʼ ga̱jma̱a̱ itsu̱u̱ mu ma̱ta̱ya̱a̱ á mu xáʼthá wéñaaʼ náa inaaʼ”.+
6 Ikhú Jeobá niʼthúu̱n Gixa̱a̱: “Natayáá ráʼ. Ma̱ndoo matani̱i̱ asndu ndiéjunʼ má eyaaʼ.* ¡Mú xátaxíyáa!”.
7 Ikhú Gixa̱a̱ nigájna̱a̱ náa xtáa* Jeobá ga̱jma̱a̱ niʼni gawúunʼ Job, niʼni dí magu̱ ska mbiiʼ,+ nigi̱ʼdu̱u̱ náa rajkhúu asndu náa nuʼwu̱u̱n.
8 Ikhú Job ndiyá mbá xuíʼtóo rayaʼ dí niwiʼtá mu mañewinʼ ga̱jma̱a̱ xtóo ga̱jma̱a̱ niguanúu nigi̱ʼi̱ náa idiʼ.+
9 Nda̱wa̱á a̱ʼgiu̱u̱ niʼthúu̱n: “Kaʼníí natraʼwíí dí mariejún jmbu náa Dios ráʼ. ¡Aratátsríguíi Dios ga̱jma̱a̱ gakañáaʼ!”.
10 Mú ikhaa niriʼñuu: “Xtaa raratá xóo ethi gu̱ʼu̱ bi̱ tséndxa̱ʼwa̱a̱ májánʼ edxu̱ún. Á mu dí náa Dios bi̱ gajkhun nundrígú rí májánʼ, lá xúndrígú dí ra̱májánʼ ma̱ngaa ráʼ.”+ Maski ajndu Job nigíʼnuu xúgíʼ rígi̱, mú ikhaa na̱nguá niʼthí nimbá dí ra̱májánʼ.*+
11 Índo̱ ajtsíin bi̱ nambájxu̱u̱ gajmíi̱n* Job, Elifaz+ xa̱bu̱ Temán, Bildad+ xa̱bu̱ Súah+ ga̱jma̱a̱ Zofar+ xa̱bu̱ Naamá nidxawíín gamiéjunʼ dí niraʼnuu Job, mámbáa nigájnuu náa xuajñuu. Nindúún dí magún mbóó gúni̱i̱ a̱jkiu̱u̱n Job mu xúʼko̱ musngajmáá dí naxmiéjúúnʼ kuyáá.
12 Índo̱ ndiyáá asndu nákha mitsínguánʼ, na̱nguá niniʼniiʼ. Ikhú nigíʼdi̱i̱ nindxa̱ʼwa̱ská ga̱jma̱a̱ nixkuʼtu xtíñún, nidaʼ yujndaʼ náa giñánʼ ga̱jma̱a̱ nigrigu náa edxu̱ún.+
13 Nitri̱gi̱i̱n mbayííʼ gajmiún mbá juwan mbiʼi ga̱jma̱a̱ mbá juwan mbruʼun. Nimbáa dí ikhiin nda̱a̱ dí niʼthí, numuu rí ndiyáá dí ra̱ʼkhá tháán xtáa ramínúuʼ.+
Mbaʼa nota
^ Náa hebreo, ajngáa rígi̱ naʼthí ga̱jma̱a̱ numún ángeles.
^ Náa ajngáa hebreo naʼthí, “miʼkhu rajngióʼ”.
^ Náa ajngáa hebreo naʼthí, “Xuwiʼ ga̱jma̱a̱ i̱mba̱ xuwiʼ”.
^ Náa ajngáa hebreo naʼthí, “Ikhaa xtáa náa ñawáanʼ”.
^ Náa ajngáa hebreo naʼthí, “náa inuu”.
^ Náa ajngáa hebreo naʼthí, “tákudaminaʼ aʼkhá ga̱jma̱a̱ rawuunʼ”.
^ O “bi̱ naʼniniún”.
