ICIGWA CA 6
Abantu umunani ni bo barokotse
Nowa n’umuryango wiwe hamwe n’ibikoko barinjiye mu bwato. Yehova yarugaye umuryango, imvura ica iratangura kugwa. Haraguye imvura nyinshi ku buryo ubwato butangura kureremba. Isi yose yahavuye irengerwa n’amazi. Abantu bose batari mu bwato barapfuye. Ariko Nowa n’umuryango wiwe bararokotse. Ibaze ingene banezerewe kubera bari bagamburukiye Yehova!
Imvura yamaze imisi 40 n’amajoro 40 igwa maze irahita. Amazi yagiye aragabanuka bukebuke. Amaherezo, bwa bwato bwarahagaze ku musozi. Ariko kubera amazi yari akiri menshi, Nowa n’umuryango wiwe ntibashobora gusohoka.
Buhorobuhoro, amazi yaratevye arakama. Nowa n’umuryango wiwe bamaze umwaka urenga bari mu bwato. Yehova yaciye ababwira ngo bave mu bwato. Bashikiye mw’isi yari yakuwemwo abantu babi. Barashimiye cane Yehova kubera yabarokoye, baca baramushikanira ikimazi.
Yehova yarahimbawe n’ico kimazi. Yarasezeranye ko atazosubira gukoresha umwuzure mu gukuraho ibintu vyose biri kw’isi. Yaciye ashira umunywamazi wa mbere mu kirere ngo uzoze uributsa abantu iryo sezerano. Uramaze kubona umunywamazi?
Yehova yaciye kandi abwira Nowa n’umuryango wiwe ngo bavyare buzure isi.
‘Nowa yarinjiye mu bwato, kandi abantu ntibagize ico bitaho gushika aho isegenya riziye rikabakukumura bose.’—Matayo 24:38, 39
Raba kandi
NIWIGANE UKWIZERA KWABO
Nowa: “Yagendana n’Imana y’ukuri”
Ni ingorane izihe zashikiye Nowa n’umukenyezi wiwe mu kurera abana babo? Berekanye gute ko bafise ukwizera mu kwubaka ubwato?
