Zacarias 14:1-21
14 “Onsabi so agew, sakey ya agew a parad si Jehova, sano apag-apagen ed arapan mo iray asamsam ed sika.*
2 Tiponen koy amin a nasyon pian miguerra ed Jerusalem; tan nasakop so syudad tan nasamsaman iray kaabungan tan puersaan dan akdolan iray bibii. Tan nibantak ed arum a pasen so kapaldua ed saray manaayam ed syudad, balet mansiansia ed syudad iray akeran totoo.
3 “Ompaway si Jehova tan miguerra ed saraman a nasyon+ a singa impiguerra tod saray kalaban to nensaman.+
4 Diad satan ya agew et sikatoy onalagey diad Palandey na Saray Olibo,+ a satan et akaarap ed Jerusalem diad bandad bukig; tan napaldua so Palandey na Saray Olibo, manlapud bukig* ya anggad sagur,* kanian walay naporman maawa-awang a lawak; tan niyalis diad bandad amianen so kapaldua na palandey, tan say kapaldua et diad bandad abalaten.
5 Ombatik kayo ed lawak a walad baetan na saray palandey ko, lapud onsabi ya anggad Azel so lawak a walad baetan na saray palandey. Ombatik kayo, a singa imbatik yo lapud yegyeg ya agawa ed panaon nen Arin Uzias na Juda.+ Tan onsabi si Jehova a Dios ko, tan kaiba to so amin a masanto.+
6 “Diad satan ya agew et anggapo so masnag a liwawa+—onkigtel* iray bengatla.
7 Tan magmaliw itan a nikadkaduman agew a kabkabat bilang say agew nen Jehova.+ Aliwa itan ya agew odino labi; tan maliwawa ni anggano labi la.
8 Diad satan ya agew et onagus manlapud Jerusalem iray danum a mabilay,+ a say kapaldua et mamaarap ed dayat ed bukig*+ tan say kapaldua et mamaarap ed dayat ed sagur.*+ Nagawa itan ed panaoy tiagew tan panaoy ambetel.
9 Tan si Jehova so magmaliw ya Ari ed interon dalin.+ Diad satan ya agew, si Jehova labat so bidbiren na amin,+ tan say ngaran to et saksakey.+
10 “Satan ya interon dalin et magmaliw a singa say Araba,+ manlapud Geba+ ya anggad Rimon+ diad bandad abalaten na Jerusalem; tan sikatoy onalagey ed pasen to tan sikatoy panayaman,+ manlapud Puerta na Benjamin+ ya anggad kawalaan na Unonan Puerta, ya anggad Suyok a Puerta, tan manlapud Tori nen Hananel+ ya anggad saray panagpespesay ubas* a kien na ari.
11 Tan manayam ed sikato iray totoo; tan anggapo lay nisamba parad kadederal,+ tan maligen lan panayaman so Jerusalem.+
12 “Tan saya so salot ya idapo nen Jehova ed amin a totoo a miguerra ed Jerusalem:+ Nabulok so laman da legan ya akaalagey ni ra, nabulok iray mata ra diad abot a kawalaan na saratan, tan nabulok so dila ra diad sangi ra.
13 “Diad satan ya agew et dakdakel ed sikara so wetweten nen Jehova; tan singkaten na balang sakey so kaulop to, tan manlalaban ira tan atakien day sakey tan sakey.+
14 Miguerra met so Juda diad Jerusalem; tan natipon so kayamanan na amin a nasyon ed kaliberliber, saray dakerakel a balitok tan pilak tan saray kawes.+
15 “Tan mipadparan salot so ondapo ed saray kabayo, mula,* kamelyo, asno, tan ed amin ya ayayep a walad saraman a kampo.
16 “Amin ya akera ed amin a nasyon ya onlaban ed Jerusalem et tinaon ya onla pian ondakmomo*+ ed Ari, si Jehova na saray armada,+ tan selebraan day Piesta na Saray Alolong.*+
17 Balet no walay siopaman ed saray pamilya ed dalin ya ag-onlad Jerusalem pian ondakmomo ed Ari, si Jehova na saray armada, anggapoy uran ya ompelag ed sikara.+
18 Tan no say pamilya na Ehipto et ag-onla tan ag-onloob, anggapoy uran ya ompelag ed sikara. Imbes, onsabi ed sikara so salot ya idadapo nen Jehova ed saray nasyon ya ag-oonla pian manselebray Piesta na Saray Alolong.
19 Saya so dusa parad kasalanan na Ehipto tan ed kasalanan na amin a nasyon ya ag-oonla pian selebraan so Piesta na Saray Alolong.
20 “Diad satan ya agew et nisulat ed saray kampanilya na saray kabayo iray salitan ‘Si Jehova so masanto!’+ Tan saray banga*+ diad abung nen Jehova et magmaliw a singa saray yaong+ ed arap na altar.
21 Tan amin a banga* a walad Jerusalem tan Juda et magmaliw a masanto tan kayarian nen Jehova na saray armada, tan onloob so amin a manbabagat tan usaren dan panlambongan so arum ed saratan. Diad satan ya agew et anggapo lay Canaanita* ed abung nen Jehova na saray armada.”+
Paimanod leksab
^ Say syudad ya atukoy ed bersikulo 2.
^ Odino “bubutayan na agew.”
^ Literal, “dayat.”
^ Odino “agmakagalaw,” a singa inmawet ed betel.
^ Say Dayat a Mediteraneo.
^ Say Inatey a Dayat.
^ Odino “saray pananginan na apespes ya ubas.”
^ Say Hebreon salita et manutukoy ed nanlaok a poli na asno tan kabayo.
^ Odino “Saray Temporaryon Siroman.”
^ Odino “mandayew.”
^ Odino “saray banga a baleg so sangab da.”
^ Odino “banga a baleg so sangab to.”
^ Odino posiblin, “negosyante.”
