Amos 7:1-17
7 Saya so impanengneng na Soberanon Katawan a Jehova ed siak: Sikatoy angiyakar na amungkog a duron sanen ginmapon tinmubo so unor a tanem.* Saya so unor a tanem kayarin tinipon so dayami a parad ari.
2 Sanen naupot la na saray duron so tanaman ed dalin, inkuan ko: “O Soberanon Katawan a Jehova, ipangasim, mamerdona ka!+ Panoy pakaliktar* na Jacob? Ta sikatoy makapuy!”+
3 Kanian ninonot lamet* iya nen Jehova.+ “Agla itan nagawa,” so inkuan nen Jehova.
4 Saya so impanengneng na Soberanon Katawan a Jehova ed siak: Inyabawag na Soberanon Katawan a Jehova so pananusa ed panamegley na apoy. Apoolan so maawang tan araralem a danum, tan sakey a kabiangan na dalin.
5 Insan inkuan ko: “O Soberanon Katawan a Jehova, ipangasim, agmo iya gagawaen.+ Panoy pakaliktar* na Jacob? Ta sikatoy makapuy!”+
6 Kanian ninonot lamet* iya nen Jehova.+ “Agmet la itan nagawa,” so inkuan na Soberanon Katawan a Jehova.
7 Saya so impanengneng to ed siak: Akaalagey si Jehova ed padir a ginawad panamegley na patawin,* tan walay sankaegnaan ton patawin.
8 Insan inkuan nen Jehova ed siak: “Antoy nanenengneng mo, Amos?” Kanian inkuan ko: “Sakey a patawin.” Insan inkuan nen Jehova: “Mangiyan ak na patawin ed limog na Israel a totook. Agko la ra perdonaen.+
9 Nataynanan iray atagey a pasen nen Isaac,+ tan naderal iray santuaryo na Israel;+ tan onsumpa ak ed sankaabungan nen Jeroboam ed panamegley na espada.”+
10 Oniay mensahen impasabi nen Amazias a saserdote na Bethel+ ed si Arin Jeroboam+ na Israel: “Mikokomplot si Amos ya onlaban ed sika diad mismon loob na sankaabungan na Israel.+ Agla makaanos ed amin ya ibabaga to iray totoo ed sayan dalin.+
11 Ta oniay inkuan nen Amos, ‘Ompatey ed espada si Jeroboam, tan nibantak ed arum a dalin so Israel.’”+
12 Insan inkuan nen Amazias ed si Amos: “O sikan makakanengneng na pasingawey, batik kad dalin na Juda, tan diman ka mananap na tinapay mo,* tan diman ka manpropesiya.+
13 Balet agka la manpropropesiya diad Bethel,+ ta santuaryo iya na ari+ tan abung na sakey a panarian.”
14 Insan inmebat si Amos ed si Amazias: “Aliwa ak nensaman a propeta, odino anak na propeta, noagta sakey ak a managpastol+ tan sakey a manag-asikaso na saray kiew na igos a sikomoro.*
15 Balet inala ak nen Jehova manlapud panagpastol na pulok, tan inkuan nen Jehova ed siak, ‘La ka, manpropesiya ka ed Israel a totook.’+
16 Kanian natan, dengel moy salita nen Jehova, ‘Ibabagam ya: “Agka manpropropesiya na kontrad Israel,+ tan agka manpupulong+ na kontrad sankaabungan nen Isaac.”
17 Kanian oniay inkuan nen Jehova: “Magmaliw a paabang a bii ed syudad so asawam, tan ompatey ed espada iray anak mon lalaki tan bibii. Naapag-apag so dalin mod panamegley na lubir a panagsukat, tan ompatey kad marutak a dalin; tan nibantak ed arum a dalin so Israel.”’”+
Paimanod leksab
^ Salanti, legan na Enero tan Pebrero.
^ Literal, “pakatalindeg.”
^ Odino “nagbabawian.”
^ Literal, “pakatalindeg.”
^ Odino “nagbabawian.”
^ Sayan instrumento ya akabitin ed lubir et uusaren pian naseguron maptek so kipaalagey na sakey a bengatla.
^ Literal, “mangan na tinapay.”
^ Odino “managturok na bungay igos a sikomoro.”
